Lesadónan di Deporte Kòrsou bon dia. Nos tei atrobe kargá ku informashon di Beisbòl i Sòftbòl..Royal Scorpions a gana Santa Rosa fásil i pasa pa final. Royal Scorpions vs Wild Cats den final despues di bastante aña. Hopi komentario I hopi animo pa e gran final di Beisbòl Dòbel A 2021 entre e dos grandinan di Beisbol Dòbel A. Scorpions ta den final despues di 9 aña.
* * * * *
E dos weganan ku Royal Scorpions a gana tabata pèrtá. Djarason 29 di sèptèmber Royal Scorpions a gana ku skor di 7 pa 6 i djasabra 2 di òktober ku skor di 5 pa 4. E di tres wega siii, ku skor grandi 10 pa 2. Play-off final ta programá pa start djaweps otro siman dia 14 di òktober i si e seri bai 7 wega play-off lo kaba dia 24 di òktober. E promé 3 weganan ta programá pa Stadion Johnny Vrutaal i weganan number 4 i 5 Tio Daou Ballpark. Weganan number 6 i 7 bèk den Stadion Johnny Vrutaal. Wild Cats ta klá pa play-off final i lo train djaweps anochi den Stadion Johnny Vrutaal.
* * * * *
Play-off semi-final di Beisbòl Veterano ta start djasabra awor na Vi Jansen Ballpark. Pa 11’or am ekipo Jandoret Raiders lo topa ku Santa Maria Pirates i despues pa 2.30’or Isla Crackers lo topa ku Santa Rosa Memories. Ekiponan ku a terminá number 1 i 2 lo ta home klup den weganan number 1 i number 3 si ta nesesario. Santa Rosa tabatin un tremendo wikènt kaminda nan a gana dos wega di wild card sigí pa terminá number 4 finalmente. Santa Rosa a sali number 6, gana number 5 ku tabata Quality Stars (12-2) djasabra i djadumingu gana ekipo Bulldog pèrtá 4 pa 3. Ta spera bon públiko na Vi Jansen Ballpark pa mira e play-off di Beisbòl Veterano ku tur aña atrobe ta interesante. Pabien na Gai Lihe ku ta un dje spònsernan di Santa Rosa. Un dje grandinan di Royal Scorpions tambe.
* * * * *
Tur aña nos ta resumí e ekiponan ku tin mas título den Beisbòl Dòbel A. Royal Scorpions ta na kabes ku 18 título, sigí pa Wild Cats ku tin 17 título. Santa Maria tin 11 titulo, Santa Rosa tin 7. Aplha Zelbo tin 3 i Blue Hawks tin 1 título. Ekiponan Alpha Zelbo i Blue Haws no ta eksistí mas. Royal Scorpions a logra su último título na 2012, Wild Cats na 2017, Santa Maria na 2018. 2019 no tabatin final di kampionato despues di 54 aña. Santa Rosa a bira kampion na 2020. Wild Cats ta pegá riba Royal Scorpions pa loke ta trata títulonan.
* * * * *
Nos a risibí un skèdjel di Beisbòl Dòbel A di temporada 1994, kampionato ku Wild Cats a bira kampion pa despues logra en total 8 título sigí, di 1994 pa 2001. Abou riba e skèdjel tin pòtrèt di ekipo Wild Cats, tempu di Drukkerij Scherpenheuvel di Oscar Bolivar. Nos a mira spònsernan manera Firgos, De Jongh Sporthuis, Gasora ku tei ketu bai i Super Jumbo Supermarket ku no tei mas. Riba pòtrèt nos a mira Juan Piña, Rigobert Cijntje, Axel Levenstone, Remick Bernadina, Reumert Monte, Cedric Sebastiana, Renato Anasagasti, Nigel Faneyte, Humprey Granger, Stanley Heerenveen, Emile Haswell, Oscar Bolivar, Fichi Flemming, Dennis Dambruck, Kelvin Winklaar, Ando Cijntje, Cedric Coffie, Miro Daal, Dudley Merien, Hensley Josephina i Nelly Jakoba. Recordar es vivir. Ta 27 aña pasá. Ta Kelvin Winklaar i Cedric Sebastiana so den e grupo aki no a yega 50 aña ainda.
* * * * *
Swift a gana Gamers i pasa pa final di Liga 40 .Na Frank Curiel Ballpark tambe tin play-off kandela den Sòftbòl Femenino Veterano 35+, Liga di Nos Tur. Siman pasá no tabatin wega di Liga Amstel. Parse ku den liga di e hóbennan maskulino, Liga Amstel, Liga van Engelen i Liga 40, tin doló di kabes ku asuntu di picheo. Picheo a bira sumamente velos i opinionnan ta dividí. Algún siman pasá tabatin un umpire èkstra riba tereno pa wak picheo ilegal. Nos ta keda te aki.
