Lesadónan di Deporte Korsou, bon dia. Hopi moveshon den wikènt den luna di òktober aki i ta play-offnan a kuminsá move den varios liga. Den Liga di Nos Tur tabatin wega djabièrnè i djasabra. Ekipo Un Kara a bolbe gana i klasifiká pa final di Liga di Nos Tur. Un Kara ku a klasifiká number 2 a gana di Chilling ku a klasifiká number 1. Un Kara ta bai final i Chilling lo bai topa ku ekipo Sin Stress djabièrnè i djasabra awor. Ekipo Join Me a keda eliminá. Djabièrnè Un Kara a gana Chilling 14 pa 7 i djasabra Sin Stress a gana Join Me 6 pa 3. Tur dos seri a terminá den un swip di 2-0.
* * * * *
Den Beisbòl Veterano djasabra ekipo Santa Maria a gana di Jandoret ku skor di 5-4 den e seri di 2 kontra 3. Den e otro seri ekipo Isla Crackers a derotá Santa Rosa ku skor di 9 pa 5. Djadumingu Jandoret Raiders a derotá Santa Maria Pirates 6 pa 3 i Santa Rosa Memories a gana Isla Crackers ku skor pèrtá di 6 pa 5. Bon públiko djasabra ku djadumingu pa mira e dos weganan semi-final. No manera kustumbrá, pero ta spera mas fanátiko otro siman. Djadumingu 17 di òktober lo tin e dos weganan desisivo. Pa 11’or Santa Rosa Memories lo topa ku Isla Crackers i pa 2.30’or Jandoret Raiders lo enfrentá Santa Maria Pirates.
* * * * *
Pa loke ta Liga 50 djasabra na Van Engelen Ballpark, ekipo Marlins a logra un viktoria pèrtá ku skor di 6 pa 5 riba Lions ku ta na promé lugá. Lions su rekòrt a bira 9-2 i Marlins 6-4. Pitufos a gana Flamboyan Tigers 10 pa 5 i tin rekòrt di 7-4. By the way, Pitufos tin un protesta pendiente kontra di Baranka. Dia 2 di òktober Baranka a gana Pitufos ku skor di 6-3. Pitufos a protestá e wega, debí ku parse Baranka a subi e hungadó Emeric Agatha promé ku Agatha kumpli 50. Segun regla e hungadó mester tin 50 aña promé ku subi e hungadó riba lista.
* * * * *
Segun nos informante, Agata a kumpli 50 aña dia 30 di sèptèmber i a subi e hungadó enkuestion dia 29 di sèptèmber. Agata a partisipá den e wega di dia 2 di òktober kontra di Pitufos i a risibí base por bola komo batiadؚó emergente. Otro punto ta ku Pitufos a protestá despues di 2 biaha 24 ora, pero Pitufos ta insistí ku pa regla atministrativo, no regla di riba tereno di wega no ta 2 x 24 ora. Interesante e situashon i mester bisa ku Pitufos ta di 1-1 den asuntu di protesta. Pitufos a gana e protesta ku nan a hasi kontra Liga cq Flamboyan/Tigers i a gana esaki.
* * * * *
Situashon ta bastante pèrtá pa loke ta trata ekiponan ku bon chèns di klasifiká. Lions i Baranka ta práktikamente kla ku solamente 2 wega pèrdí. Baranka ta pendiente di e wega ku nan a gana kontra di Pitufos kaminda Pitufos a file un protesta. Ban Serio tin 3 wega pèrdí, ekiponan Pitufos i Marlins tin 4 wega pèrdí, pero Pitufos ta pendiente pa gana e protesta ku chèns di por bai 3 wega pèrdí. Flamboyan a kai na 5 wega pèrdí. E pulnan ta partí den e sigiente forma. Pul A: Lions, Ban Serio, Marlins, Jaws i Sluggers. Pul B: Baranka, Pitufos, Flamboyan, Artemisia i Catpower. Na final di e buelta aki kaminda ekiponan ta hunga den nan pul, lo pone ekiponan bèk den un pul i e promé 4-nan lo klasifiká pa play-off.
* * * * *
Propaganda i poster di e gran final di Beisbòl Dòbel A di spònser pa Amstel Bright a sali i weganan ta start djaweps. Nos lo ta bai chèk ku despues di 1981, e final ku a kibra rekòrt di asistensia den Sentro Deportivo Kòrsou, na kuantu okashon ekiponan di Wild Cats i Royal Scorpions a topa ku otro den final. E último dos kampionnan di Royal Scorpions, na 2011 i na 2012 tabata e ekipo Santa Maria ku a topa Royal Scorpions den final. Johnny Balentina tabata manager di Royal Scorpions i Mompy van Gurp manager di Santa Maria. Awor Johnny ta bèk komo coach di Royal Scorpions i Mompy komo manager. Nos ta keda te aki pa awe.
