Fanátikonan di Deporte Kòrsou bon dia. Djasabra pa 7.30 pm den Stadion Johnny Vrutaal tin wega number dos di play-off final kandela entre Wild Cats i Royal Scorpions. Djaweps den un tremendo partido Wild Cats a gana ku skor di 3-1 dilanti un bon publiko den Stadion Johnny Vrutaal. Nos ta bai bèk den e sifranan durante kampionato i play-off di e dos ekiponan. Tantu Wild Cats komo Royal Scorpions a gana nan kontrinkantenan den 4 wega den semi-final. Durante temporada regular Wild Cats a gana Scorpions na dos okashon i Royal Scorpions a derotá Wild Cats na un okashon. Promé buelta 3-2 pa Wild Cats, di dos buelta Wild Cats 5-4 riba Royal Scorpions i e último enkuentro Royal Scorpions a gana di Wild Cats 10 pa 7.
* * * * *
Wild Cats a terminá kampionato regular na promé lugá ku rekòrt di 13-5. Despues Wild Cats a gana 3 wega i pèrdè 1 den play-off semi-final kontra Santa Maria Pirates. Overall Wild Cats ta 16-6. Wild Cats a bati pa un averahe kolektivo ku play-off aden .301, picheo (ERA) di 5.06 i defensa .947. Royal Scorpions a terminá buelta regular 12-6 na di dos lugá, gana Santa Rosa 3-1 den e play-off i tin overall 15-7 promé ku bai play-off final. Royal Scorpions a bati kolektivo, esta temporada regular i play-off pa .309, picheo 4.88 i defensa .956. Riba papel Royal Scorpions tin un bentaha leve pa loke ta sifra.
* * * * *
Den e parti ku hopi fanátiko gusta ku ta homerun, Wild Cats a konektá 22 homerun durante kampionato regular i play-off. Calten Daal tabatin 5 homerun, Rojean Cleofa 3, Yurendell de Caster 3 i algún hungadó ku 2 i 1 homerun. Pa Royal Scorpions Stephan Vidal tin 5 homerun, Levi Carolus 3 homerun, Edinho Meyer 3 homerun i Roderick Bernadina 3 homerun. Calten Daal a konektá 5 homerun durante kampionato regular i terminá komo lider di Beisbòl Dòbel A. Den 4 wega di play-off semi-final e no a konektá homerun pero a bati pa un averahe di .438 kompará ku .286 durante kampionato regular. Stephan Vidal, un dje hòmbernan di poder di Royal Scorpions, a konektá 4 homerun durante kampionato regular i unu den e play-off kontra di Santa Rosa. Stephan Vidal a konektá 4 homerun durante temporada regular i 1 den play-off.
* * * * *
Den picheo Wild Cats tin Shurensley Daantji ku ta e picher ku a tira mas inning 29.1 ku un tremendo ERA di 2.04. Shurensley Daantji a gana 2 di e 3 weganan di Wild Cats den play-off. E hóben Joharvi Martinus a gana otro wega pa Wild Cats den play-off. Dos picher ku lo bira klave pa Wild Cats den play-off huntu ku Risandro Pastor ku ainda no a tira den play-off i Mairon Brunken ku ta na di dos lugá den inning tirá (29 inning) pa Wild Cats den temporada 2021. Rumannan Alexander i Arlyson Rodriguez tambe ta pichernan ku lo tira den final. Alexander Rodriguez ku ta e ruman grandi lo tira relevo kòrtiku i Arlyson Rodriguez habridó. Tur dos ta picher slengu. Kennymar Locadia, Sherson Randt i Klevert Martina tambe tei pa Wild Cats pa loke ta picheo den final.
* * * * *
Royal Scorpions tabatin tremendo atkisishon den pitu na momentu ku Nelmerson Angela a yega for di Hulanda nèt pa kumpli ku e weganan pa ta eligibel pa play-off. Nelmerson a tira 26 inning total, gana 3 i pèrdè 1 ku un ERA di 3.08. Nelmerson a picha den dos wega den semi-final i gana un wega. Cerilio Soleana no a tira den play-off. Ruderly Manuel ta keda e estelar di Royal Scorpions i a tira 2 wega den play-off ganando unu i pèrdè e otro. Ruderly no a tira hopi e aña aki debí na leshon. E kabai di heru Ramses Jamanika a tira 25 inning den temporada regular i 3 inning den play-off. Temesh Lourens lo ta klave tambe den e play-off pa Royal Scorpions. Ta e picher ku a tira mas inning (38 inning) durante kampionato regular i play-off. Den play-off Temesh tabatin tremendo aktuashon kontra di Santa Rosa ku 6.2 inning den 3 wega ku un ERA di 1.35 den play-off.
* * * * *
Laga nos ban pa Slowpitch i Beisbòl Veterano. Djaweps 14 di òktober Crazy Tigers a eliminá Baranka for di play-off Liga 40. Djaweps 7 di òktober e wega a keda suspendé, debí ku umpirenan tabatin un reunion hopi serio ku direktiva di Liga van Engelen debí na aktuashon di sierto dirigente. Nos ta pendiente e situashon. Kòrda djadumingu tin kandela den Beisbòl Veterano ku weganan entre Isla i Santa Rosa sigí pa Santa Maria i Jandoret.
