Lesadónan di Deporte Korsou bon tardi. Play-off di Beisbòl Dòbel A a start kayente djaweps i sigi djasabra. Wild Cats ta dilanti 2-0, despues di un viktoria feros djasabra ku skor di 15-2. Beisbòl Veterano tin dos wega di semi-final kayente djadumingu awor na Vi Jansen Ballpark. Den e promé wega pa 11’or ekipo Isla ku a klasifiká number 1 lo topa ku Santa Rosa Indians i despues pa 2.30’or Santa Maria Pirates lo hunga kontra di Jandoret Raiders. Tur dos seri ta empatá na unu i ta spera un públiko hopi grandi pa mira e dos weganan menshoná. Ganadónan ta bai final naturalmente. Skèdjel a sali pa loke ta trata weganan di Torneo di Reino. Ekiponan ku ta partisipá ta Curacao Legends (Hulanda), Bulldogs, Santa Rosa Memories, Marlboro (Aruba) i Jandoret Raiders. E weganan ta 4 pa 7 di novèmber na Tio Daou i Vi Jansen Ballpark.
* * * * *
Liga 50 ta sigi na Van Engelen Ballpark ku 4 wega. Pa 10.00 Flamboyan/Tigers – Catpower, 12.00 Ban Serio – Jaws, 14.00 Artemisia – Baranka, 16.00 Marlins – Sluggers. Pitufos tin barwacht i Lions ta liber. Nos tin algun sifra di Liga 40. Gino Valeriaan di Baranka ta number unu den bateo ku average di .652, empatá ku Junny Marselia di Mon Repos Sluggers ku .652. Albert Pieternella di Ban Serio tin .632, Ruben Snoyl di Flamboyan tin 5.83 i Fabianie Orcadio di Ban Serio tin .550. Den kareda empuhá Clifton Ostiana di Artemisia tin 14, Eddy Obispo (Pitufos) 14. Wendell van het Kruys (Ban Serio) 13, Stanley Palm (Flamboyan Tigers) 12 i Amarildo Coffie (Marlins) tin 12.
* * * * *
Gregory Martijn(Lions) ta lider den picheo ku un ERA di 2.74, ta sigi Edison Sambo di Lions ku tin 2.77. Kenny Hellement (Baranka) 3.53, Frensel Martinus (Ban Serio) 3.41 i Michelangleo Boekhoudt (Ban Serio) tin 4.31. Den ponche tirá Johan Cicilia ta lider ku 11, sigí pa Kenny Hellement ku 9, Gregory Martijn (Lions) 8 i Fernando Rosario (Jaws) 8. Di dos buelta tabata pa terminá dia 8, pero algún wega a keda suspendé i lo terminá 6 di novèmber. Liga 50 ta halando basta fanátiko tur djasabra na Van Engelen Ballpark.
Greroy Martijn lider den ERA.
* * * * *
Saludo pa e picher slengu Dudley ‘Dudu’ Penso ku a bolbe gana i e resultadonan no a bai korant. Ta nèt ora Dudley Penso gana e weganan, e resultadonan no ta drenta serka nos. Dudley ‘Dudu’ Penso a tira 5 inning pa gana e ekipo den kabes di Liga 50 Sòftbòl ku ta Lions. Dudu Penso tin rekòrt di 3 ganá i 1 pèrdí pa Marlins den 2021. Standing den Liga 50 ta: Lions 9-2, Baranka 8-2, Ban Serio 7-3, Pitufos 7-4, Marlins 6-4, Flamboyan/Tigers 5-5, Jaws 3-6, Artemisia 3-7, Mon Repos Sluggers 2-7 i Catpower 0-10.
* * * * *
Liga Streanan di ayera tin último weganan di buelta regular djadumingu awor, miéntras Liga Di Nos Tur ta sigi ku play-off djabièrnè i djasabra entre ekiponan Sin Stress i Chilling. Ekipo Un kara kampion di temporada 2019 i 2020 ta pendiente pa ganadó di Sin Stress i Chilling pa bai final. Chilling ku a pèrdè den dos wega kontra Un Kara den e seri entre 1 ku 2 ta faborito pa bini bèk den final. No mester deskartá ekipo Sin Stress ku tabata kampion di e promé kampionato di Liga Di Nos Tur i tin vários hungadó veterano talentoso.
* * * * *
Despues di 17 aña e grandinan di Beisbòl Dòbel A di tur tempu ta topa otro. Ekiponan ku mas titulo i ku mas historia den Beisbòl Dòbel A di Kòrsou. Royal Scorpions tin 18 título i Wild Cats tin 17. Konferensia di Prensa interesante den kuadro di e gran final aki, djarason último na Gondola Restaurant den Riffort Village. Ban spera ku Gobièrnu lo manda toke di keda mas lat i kita e asuntu di 100 fanátiko pa wega pa FEBEKO por haña bon entrada for di e play-off final pa drecha nan kaha. Naturalmente fanátikonan tambe por bini stadion i gosa. Cariflix/Telecuracao ta transmití e wega pa nan abonádonan.
* * * * *
Masha tempu nos no a pone atenshon manera mester ta pa Liga 60+. Ekipo Jaws enkabesá pa Fetty Curie i Wimbert Hato ta na promé lugá despues ku ekipo Nos Tambe Por a pèrdè kontra Lions djadumingu último. Ramon Moreta di Lions a dominá Nos Tambe Por durante 7 inning largu i permití solamente 6 hit. Siegfried Lopez a pèrdè ku relevo di Wim Felicia. Standing ta Jaws 9-1. Nos tambe Por 8-2, Lions 7-4, Amigos 5-5, Sluggers 3-7, Nos Power 2-8 i Curacao Super Stars 1-8. Ayera mester tabata semi-final entre Gamers i Crazy Tigers den Liga 40.
