Fanátikonan di Deporte Kòrsou bondia. Medidanan pisá na parke i terenonan di wega durante partidonan di Beisbòl i Sòftbòl. Naturalmente otro deportenan tambe. FEBEKO a anunsiá for di djamars 19 di òktober ku reglanan stipulá dor di gobièrnu mester wòrdu respetá. Ata algu di e komunikado ku a saka djamars último: “Pa medio di esaki nos kier informá tur bishitante/fanátiko di Beisbòl ku pa por risibí akseso na partidonan di final di Liga AA Amstel Bright, e fanátiko mester presentá ku su ‘Digitaal Covid Certificaat’ (DCC) ku tin e QR-code riba dje. ‘PCR-test’, ‘Antigeen-Test’ i karchi di bakunashon NO ta bálido mas. Solamente e DCC, akompañá pa un ID bálido so ta bálido pa por drenta weganan di FEBEKO di awor pa dilanti.” Kosnan a bai basta straño ku yen di vershon pero nos ta lage te einan. Gobièrnu a keda di suavisa e asuntu di QR-Code na tereno den kurso di djabièrnè pa wikènt.
* * * * *
Pa loke ta trata Liga 50, e informashon manda pa ekiponan ta lo sigiente. “Direktiva di Liga 50 kier a informá lo siguiente. Dor di medida di Gobièrnu ku ta drenta na vigor entrante awe kuminsando e wikent aki, tur persona ku bishitá tereno di Van Engelen Ballpark mester mustra na porta su QR code òf karchi di bakuna huntu ku un identifikashon. Esaki ta konta pa tur hungadó i dirigentenan tambe. Un persona ku no por mustra na porta e lokualnan menshoná ariba no por subi e tereno.
* * * * *
Tene na kuenta ku si durante un partido di un òf otro manera detektá ku tin persona hungando ku no ta bakuná òf kompletamente bakuná, lo e wòrdu ekspulsá huntu ku su manager i nan
lo wòrdu saká for di Van Engelen Ballpark. Nota: personanan ku a haña Covid ku tin un bakuna so, mester bin ku su prueba di sea GGD òf otro instansia ku e la haña Covid huntu ku su QR code òf karchi d bakuna i identifikashon. Spera tur ekipo pa avisá su miembro nan pa evitá konfrontashon na porta.” Situashon ta fèrfelu den Slowpith i Beisbòl Veterano. Te ku djamars anochi no tabatin komunikado di BEVEKO.
* * * * *
Final di Beisbòl Veterano ta djasabra i djadumingu na Vi Jansen Ballpark. Jandoret Raiders lo topa Santa Rosa pa 11’or di mainta i despues pa Isla Crackers enfrentá Santa Maria Pirates. No ta konosí ku tin wega di Liga 50 djadumingu mainta 9’or òf 10’or promé ku final. Durante temporada regular Isla a gana Santa Maria ku skor di 8 pa 7 den un wega ku a tuma lugá na Tio Daou Ballpark djadumingu 29 di ougùstùs. Den e wega ei Isla a laga Santa Maria den tereno riba hit di Dennis D’Arnault. Interesante e seri final, ripitishon di e seri di 2019 kaminda ekipo Santa Maria a sweep Isla i bira kampion.
* * * * *
Nos tin resultadonan di Liga 50 i lidernan den e diferente kategoría. Curtley Valeriaan (Baranka) ta lider den bateo di Liga 50 ku un average di .667, sigí pa Albert Pieternella (Ban Serio) .636, Efraim Marselia (Mon Repos Sluggers) .625, Ruben Snoyl (FLamboyan) .593, Rigobert Cijntje (Ban Serio) .536. Clifton Ostiana ta lider den RBI ku 14, empatá ku Eddie Obispo di Pitufos. Stanley Palm (Flamboyan) 13 RBI, Wendell van het Kruys (Ban Serio) 13, Fabianie Orcadio (Ban Serio) 13.
Gregory Martijn di Lions ta lider den ERA ku 2.74, Edison Sambo (Lions) 2.77, Kenrick Hellement (Baranka) 2.85), Frensel Martinus (Ban Serio) 3.41, Michelangelo Boekhoudt (Ban Serio) 4.20. Kenny Hellement ta lider den ponche ku 13, sigí pa Johan Cicilia di Pitufos ku tin 11, Gregory Martijn di Lions 8 ponche, Michelangelo Boekhoudt i Fernando Rosario (Jaws) tambe tin 8 ponche. Liga 50 ta sigi ku 4 wega. 10.00 Sluggers – Ban Serio 12.00 Baranka – Flamboyan/Tigers, 14.00 Pitufos – Catpower, 16.00 Lions – Jaws. Marlins tin barwacht i Artemisia ta liber.
* * * * *
Interesante e protesta ku Pitufos a hasi kontra Baranka pa loke ta e hungadó ku Baranka a subi na momentu ku e no a kumpli 50 aña ainda. E hungadó ku ta Emeric Agatha a kumpli aña dia 30 di Sèptèmber i a subi dia 29 di Sèptember. Agatha a hunga pa Baranka djasabra 2 di òktober. Standing den Liga 50 ta Baranka 9-2, Lions 9-2, Ban Serio 8-3, Pitufos 7-4, Flamboyan 6-5, Marlins 6-5, Jaws 3-7, Mon Repos Sluggers 3-7, Artemisia 3-8, Catpower 0-11. Parse ku Catpower tei pa keda i hopi hungadó ta rumbo bèk pa Catpower.
