Fanátikonan di Deporte Kòrsou, bon dia i felis siman. Nos ta yegando final di òktober i ta hopi wega di play-off tin den Liganan riba parkenan na Kòrsou. Tabatin play-off final di Beisbòl Veterano, play-off di Liga di Nos Tur, play-off di Liga Streanan di Ayera, play-off di 60+ i play-off di Liga 40. Moveshon pisá i ora a yega pa hunga e wega manera mester ta pa bira kampion. Aya na USA den MLB ekipo Atlanta Braves a klasifiká pa World Series despues di 22 aña. Ta for di 1999 nos ta kòrda Atlanta a bai World Series kontra di Yankees. Pabien na fanátikonan di Atlanta Braves ku ta bastante aki na Kòrsou. For di tempu di Andruw Jones ta masha hopi fanátiko Atlanta a haña na Kòrsou.
* * * * *
Hopi fanátiko tabata tei for di añanan 80 na momentu ku TDS a start na Kòrsou i ta solamente e kanal TBS por a mira p’asina por a wak Atlanta Braves tur dia. Ei hopi fanátiko di Beisbòl di Kòrsou a kuminsá simpatisá ku Atlanta Braves. By the way, den e World Series di 1999 New York Yankees a sweep Atlanta 4-0. E dos promé weganan di Turner Field i e sigiente dosnan den Yankees Stadium. Tempu di Orlando Contreras, Roger Clemens,Mariano Rivera, David Cone, Chuk Knoblauch, Chad Curtis, Tino Martinez, Jim Leyritsz, Scott Brosius pa Yankees. Andruw Jones, Chipper Jones, Gregg Maddux, John Smoltz, Ozzie Guillen, Kevin Millwood, Otis Nixon, Brett Boone ets pa Atlanta Braves.
* * * * *
Hopi fanátiko na Kòrsou lo bishitá establesimentunan Horeca òf organisá enkuentro na kas. Establesimentunan Horeca ta haña algu èkstra ora ekiponan ku hopi fanátiko na Kòrsou manera Yankees, Atlanta, Dodgers, Boston ta den World Series. Houston ta bai topa Atlanta i Houston kasi no tin fanátiko na Kòrsou. En todo kaso Houston tin ‘Home Team advantage’ nan a gana 95 wega durante temporada regular i Atlanta a gana 88 wega. Tur dos a gana den nan divishon i e último ekipo di Wild Card ku ta Boston a kai afó djabièrnè anochi.
* * * * *
Ban rápido pa notisianan di Sòftbòl Slowpitch i Beisbòl Veterano. Isla Crackers a gana e promé wega di Play-off final djasabra na Vi Jansen Ballpark. Santa Maria tabata ganá 3-0 for di den tempran i despues 4-0 den di 4 inning. Poko poko e ekipo di Isla a bini bèk i logra empatá na 4 den nan último chèns ku dos out riba doblete di Dennis D’Arnault. Den Tie Break Isla ta gana riba wild pitch di e relevista di Santa Maria, Dave Kirindongo. Ta Isla su di 4 final i nan ta luchando pa bira kampion pa di promé biaha den Beisbòl Veterano.
* * * * *
Nos tin detayenan di premio individual den Beisbòl Veterano. Manera menshoná den e reglamentashon 2021 di BEVEKO, e premionan individual di kampeonato 2021 Liga 40 ku lo wòrdu otorgá ta: Kampeon bate; Kampeon picher i Honronero. Kampeon bate 2021 Quincy Kook (Isla Crackers) ta haña e premio di kampeon bate. Quincy a bate pa un averahe di 648,OBP (=On Base percentage) di 767. OPS (= On Base percentage + Slugging) di 1,910.
* * * * *
Tabata tin un empate entre Quincy Kook (Isla Crackers i Gregory Bito Marchena Stars. Ambos a terminá ku un averahe di 648. Konforme Reglamentashon di BEVEKO kaminda tin un empate den averahe, lo bai over na kompará OBP (on-base-percentage). Gregory Bito su OBP i OPS tabata di respektivamente 643 i 1.393, por lo tantu Quincy ta haña e premio di kampeon bate. Kampeon Picher 2021 Wendel Elizabeth (Marchena Stars). Wendell tabata number 2 den kantidat di inning pichá ku 42. Number 1 den wega ganá ku 6. Number 3 den ERA den e pichernan elegibel ku un ERA di 2.00. Honronero 2021 tabata David Kirindongo (Sta Maria Pirates. David a konektá 5 honron den kampeonato regular.
* * * * *
Den Liga di Nos Tur ekipo Chilling a gana Sin Stress ku skor di 17-9 djabièrnè i klasifiká pa final. Djasabra anochi dilanti un bon públiko, den Frank Curiel Ballpark ekipo Un Kara a pika dilanti den e play-off ganando di Chilling 7 pa 5. Den Liga Amstel Gamers a dal tremendo 16-15 i Terrepower a zona Bombers 23-11. Den final di Liga 40, Swift ku tremendo picheo di Emilio Velarde Lugo a gana Crazy Tigers ku skor di 2-0. Emilio Velarde Lugo a tira 12 ponche riba e batiadónan di Crazy Tigers. Di parti di Crazy Tigers Julius Veeris tabata e picher habrido ku tambe a tira wega kompletu. Un final praktikamente di Sòftbòl Fastpitch 40+. Djaweps 28 di òktober tin wega number 2 di e gran final. Nos ta keda te aki pa awe.
