Fanátikonan di Deporte Kòrsou, bon dia. Nos tei atrobe ku informashon di Sòftbòl Slowpitch i Beisbòl. Seri Mundial a start djamars ku nos Ozzie Albies den akshon pa Atlanta. Práktikamente tur sigidó di Beisbòl na Kòrsou ta ku Atlanta Braves. Ban spera ku Atlanta Braves ta gana e seri den 5 òf 6 wega i bira kampion for di Aña 1995. Andruw Jones a debutá ku Atlanta na aña 1996 nèt e aña despues ku Atlanta a bira kampion Mundial ganando di Cleveland Indians ku 4-2 den e seri. Atlanta e tempu tei tabata dirigí pa Bobby Cox. Nos ta ban bèk djis un ratu den e seri ei i for di e temu ei tabatin basta fanátiko di Braves kaba, pa despues bira mas tantu na momentu ku Andruw Jones a subi pa MLB.
* * * * *
E tempu ei Atlanta a gana e dos promé weganan pèrtá 3-2 i 4-3 na Atlanta Fulton County Stadium pa despues pèrdè wega number 3 pèrtá 7 pa 6 den 11 inning na Jacobs Field na Cleveland. Atlanta a gana wega number 4 (5-2), pèrdè wega number 5 na (5-4) na Jacobs Field pa bira kampion ganando 1-0 na Fulton County Stadium dilanti mas ku 51.000 fanátiko. Pichernan di Atlanta tabata Gregg Maddux, Tom Glavine, Steve Avery, Alejandro Peña, Mark Wholers, Pedro Bordon. Hungadónan manera Chipper Jones, DAvid Justice, Luis Polonia, Ryan Klesko, Fred Mc Grif, Jacy Lopez, Marquis Grisson, Jeff Blauser, Mar Lemke, ets. Cleveland tabatin pichernan Orel Hershiser, Ken Hill, Dennis Martinez, Jim Poole, Chad Ogea, Jose Mesa i Julian Tavares, Hungadónan manera Jim Thome, Albert Belle, Manny Ramirez, Eddie Murray, Paul Sorteno, Omar Vizquel, Kenny Lofton i Tony Peña. E último wega a kaba 1-0 riba un homerun di David Justice den di 6 inning kontra Jim Poole. Dushi hòmber, bèk den tempu 26 aña pasá. E último wega kaminda Atlanta a gana i bira kampion tabata 28 di òktober 1995.
* * * * *
Ban pa Beisbòl Veterano. Hopi espektativa pa e torneo di Reino di Beisbòl Veterano ku lo tuma lugá na Tio Daou Ballpark. Skèdjel ta klá, propaganda tur ta kore na radio i den korant. Curacao Legends (Hulanda), Marlboro (Aruba), Blue Lotus Indians (Aruba), Jandoret Raiders, Santa Rosa i Bulldogs di Kòrsou lo kompetí den e torneo di 4 pa 7 di novèmber na Tio Daou Ballpark. Ekiponan ta partí den dos pul i number 1 di kada pul lo pasa pa final ku ta dia 7 di novèmber. Nos veteranonan lo hunga den oranan di anochi tambe, ké mèn algun flai lo kai den infield i outfield.
* * * * *
Djamars tabatin e promé wega di e gran final di Liga 40 entre Swift i Crazy Tigers. Ekipo Swift ta den final pa di promé biaha despues di basta aña, miéntras Crazy Tigers ta e aktual kampion. Nan a bira kampion na aña 2019 i na 2020 no tabatin Liga 40. Mester hasi esfuersonan hopi serio pa Liga 40 lanta kabes òf pensa di hunga Liga 40 djadumingu pareu ku Liga van Engelen manera ta e kaso ku Liga 50 i Liga Amstel. By the way Swift kampion di Liga 40 di aña 2021. Emilio Vellarde a bolbe domina bira MVP. Keda pendiente pa mas detaye i numeritonan. Pero… basta hungadó di Liga 40 ta partisipá den Beisbòl Veterano ku ta e liga mas mihó bishitá den Slowpitch/Beisbòl Veterano. Liga 50 di Beisbòl tambe ta lantando kabes formal na Vi Jansen Ballpark. Tin 5 ekipo i pa otro aña lo tin sigur 7 ekipo. Nos amigu Eli Pieter huntu ku Lando Gerard tin plan serio pa bini ku un ekipo di 50+ Beisbòl. Santa Rosa, Santa Maria i Azucar ta pendiente pa djoin.
* * * * *
Liga Streanan di Ayera tin final djadumingu awor na Muizenberg Ballpark. Ekiponan Tur Goso i Treasure lo topa otro den final atrobe manera tabata e kaso na 2019. Ekiponan Nos ku Nos i Unidos lo hunga pariba pa di 3 lugá. 2.30’or tin e wega bálido pa di 3 lugá i 4’or tin e gran final. Ta trata aki naturalmente di Liga 50+. E aña aki no tabatin 35+ den Liga Streanan di Ayera. Na Frank Curiel Ballpark tin wega, djabièrnè 29 di òktober entre ekipo Chilling i Un Kara. Un Kara ta dilanti 1-0 i ta bini pa kaba kos miéntras Chilling ke fòrsa un wega desisivo djasabra. By the way, Pitufos a pèrdè e protesta kontra di Baranka den Liga 50. Djadumingu awor ta kandela na Vi Jansen Ballpark na momentu ku Santa Maria topa ku Isla Crackers. Famia Schoop lo hunga un wega kontra veteranonan 60+ djadumingu promé ku e gran final entre Jaws i Nos Tambe Por.
