Marilyn ‘Melo’ Martis i Ingrid Rondei honrá pa Liga Streanan di Ayera

WILLEMSTAD -  Djadumingu 16 di ougùstùs 2026 Liga Streanan di Ayera a honra e gran sòftbòlista, futbolista Marilyn ‘Melo’ Martis. Un gran boluntario ku ta kla i dispuesto pa yuda tur kaminda. Nos a risibi e CV di Melo Martis. Dos siman despues a honra Ingrid Rondei i nos tin e CV kòrtiku di Rondei.

“Marilyn Valencia Martis “ Melo “kariñosamente yamá, a nase na Kòrsou dia 11 aprel 1967. Un hoben adulto di 59 aña ku un trayektoria impreshonante den e mundu deportivo.
Melo: “Ku mi 11 aña mi kuminsá hunga futbòl I vòlibòl pareu. Durante di 10 aña mi a praktiká e 2 deportenan aki na Kòrsou. Partisipando den e tim di futbòl di Buena Vista damas mi tabatin algun logro komo ekipo i individual. A sali kampion, mihó goliadó, MVP na diferente torneo i kampionato na Kòrsou i Aruba.

Melo Martis honrá pa Liga Streanan di Ayera.

Na 1988 mi a bai studia na Hulanda. Na Hulanda mi a hunga futbòl den Eredivisie na Amstelland ku Ajax. Den e temporada ei mi a enfrentá diferente paisnan grandi manera Merka, Zwitserland, België, Duitsland. Tambe mi tabatin e privilegio di por a partisipá na Haarlem Cup.
Na 1992 mi a regresá Kòrsou bèk. Akinan a drenta den mi pa mi kuminsá move den futbòl di sala (zaalvoetbal) i mini futbòl. Akinan tambe mi a logra sali varios biaha kampion i mihó goliador na Kòrsou I representando nos isla na Aruba.   Komo mucha di e bario di Buena Vista mi tabata ke duna bèk na mi bario I for di 1992 mi a kuminsá ta trein muchanan di bario futbòl I asina nos tabata forma tim pa partisipá na torneo I kampionato di futbòl di sala I mini futbòl un di e timnan di bario ku nos a partisipá kuné ta Don Bosco.  
Den vòlibòl mi a militá den e ekipo di Xaverianen den klase A i klase superior. Na 1992 a representá Kòrsou ku Xaverianen i a hunga kontra Puerto Rico, Costa Rica, Boneiru.
Ku Xaverianen tambe mi a titulá kampion na varios okashon.
Mi karera di sòftbòl a kuminsá den e kategoria stimulans ku e ekipo di Buena Vista Tigers. Den B klase mi a forma parti di e ekipo di Blue Diamonds.
Otro ekiponan ku mi a forma parti di dje den fastpitch ta Paradise I Cardenales. Den Cardenales mi a hunga ku otro hungadornan di taya manera Isonette “Iso” Polonius I Shirley Clarinda.

Melissa Rosalina ta hiba palabra durante e parti ofishal.

‍
Ku mi 35 aña mi a pasa pa forma parti di e famia di Treasure kual ekipo mi ta parti di dje te awe. Formando parti di Treasure mi a militá den e ekipo di Shining Stars ku tabata hunga den otro liga. Mi a representá Kòrsou ku e ekipo di The Champs na diferente okashon. I segun ku edat ta subi, I a funda Treasure Pluss mesora mi a skohe pa sigui forma parti di Treasure Pluss “esaki ta mi Liga”.


Algun logro durante mi trayektoria den sòftbòl ta:
 2001, 2003, 2004  kampion bate torneo Treasure
 2005  Liga Deseo Streanan Dj’ayera sup kampion
 2006  Treasure 35+ sup kampion
 2007, 2008  Treasure 35+ 3er lugá
 2009  Dutch Caribbean Tournament  Sup kampion
 2009  Torneo S.S.S.T.  The Champs kampion i kampion honronero
 2010  The Champs kampion, MVP di kampionato i kampion honronero
 2012  Torneo Isla kampion honronero
 2013   Liga Deseo Streanan D’ayera kampion bate
 2018  HOPE tournament+ slowpitch kampion bate
 2019  Tournament+ slowpitch kampion
 2023  Liga Deseo Streanan Dj’ayera 3er lugá Treasure, di 2 lugá bateo, kampion bate Treasure, hungadó di aña di Liga
 2025  kampion ku Treasure International Caribbean Softball Cup organisá pa Rising Phoenix, sup kampion Liga Deseo Streanan Dj’ayera


Liga Streanan di Ayera ku atenshon pa Ingrid Rondei durante playoff

WILLEMSTAD – Liga Streanan di Ayera a dedika atenshon na Ingrid Rondei siman pasa. Manera ta konsoi den playoff aki tur djadumingu ta dediká na un baluarte di Liga Streanan di Ayera. Nos tin e historia deportivo kòrtiku di Inrgrid. E trein di éksito pa Ingrid a kuminsá na aña 2010 ora e a inisiá su entrenamentunan ku e ekipo di Klínika Caprilles. Su dedikashon a dun’é e oportunidat di kompetí for di 2011 te ku 2013 den e konosí Torneo di Hope.

Ingrid Rondei ta tuma regalo serka Liga Streanan di Ayera. Por mira fundadó di Liga Streanan di Ayera sra. Marlene Obispo sinta ta gosa.

Na aña 2013  Ingrid a drenta den e fila di e ekipo Warriors, kual mas despues a trasformá den The New Warriors 35 Plus. Ku e mesun entusiasmo aki, despues e a kambia di kamisa pa integrá den Eureka 35 Plus, kaminda e a militá pa dos aña, promé ku e a hasi e transishon pa e kategoria di Eureka 50 Plus pa un aña. Aworaki, Ingrid ta un di e piesanan klave den e organisashon di New Golden Girls. Durante e tempu ku e ta defendiendo e kolónan aki, e tabatin e honor di biaha pa St. Maarten integrando e selekshon lokal, unda e i su ekipo a bria na gran forma i a proklamá nan mes subkampeon di e torneo.

Ingrid den tereno huntu ku direktiva i Melo Martis.

‍

‍