Fanátikonan di Deporte Korsou bon atardi. Djasabra siman pasa,ekipo Baranka a gana Ban Serio i klasifiká pa final di Liga 50 i lo topa ku ekipo Pitufos e wikènt benidero na Van Engelen Ballpark. Kenny Hellement tabata sólidó pichando atrobe pa bai ku e viktoria. Manera a pronostiká Baranka den algún aña lo bai den e grandinan despues ku algun aña pasá a djoin e ekipo Sharks den Liga 50. Bon públiko na Van Engelen Ballapark pa mira e wega desisivo djasabra último.
* * * * *
Kos ta den gran forma pa Liga di Nos Tur. E liga Femenino Veterano ku ta hunga tur djabièrnè i djasabra den Frank Curiel Ballpark i na kasi tur okashon kargá ku fanatiko. Nos a risibí un komunikado kon kosnan a bai pa loke ta trata e parti finansiero. Kada ekipo di Liga di Nos Tur a haña 2 mil florin na dividend. Direktiva aktual formá pa Wimbert Hato, presidente, Gerald Mathilda sekretario i Criselda wederfoort komo tesorero, a entregá relato finansiero. No obstante hopi kontratiempo, pero tambe Covid-19, a logra organisá un kampionato hopi eksitoso ku a laga hasta un saldo positivo, di manera ku tur ekipo por a haña algu (2 mil florin ) i a laga sèn den kaha ku ta 4500 florin pa e siguiente direktiva kuminsá kuné.
* * * * *
Direktiva diario aktual forma pa Hato, Carelda i Gerrel a baha i ekiponan mester a duna nòmber di nan representante nan den e direktiva nobo. Presidensia di liga pa aña 2022 lo ta bou di enkargo di ekipo Join Me di Frank. Liga di Nos tur por mira atras riba un kampionato 2021 kòrtiku, pero hopi eksitoso.Tremendo Liga di Nos Tur ku lo haña kompetensia di un liga nobo ku ta start den luna di febrüari, pero ku probablemente lo terminá promé ku Liga di Nos Tur start. Miéntras tantu Pichingolo a pika dilanti 2-0 den e seri final kontra di Souax. Pichingolo ta gran faborito i nos a mira algun hungadó di Liga di Nos Tur den e seri final aki. Entre otro nos a mira Tanusi Delando, Emely Jonis i Arnalda Margarita den akshon. Pichingolo a konektá e bala bon kontra di prospekto J’Dah Girigorie di ekipo Souax.
* * * * *
Nos ta bayendo den direkshon di desèmber i ta solamente Liga 50 di Beisbòl i Sòftbòl falta pa terminá. Un bon aña kaminda aktividatnan di Slowpitch i Beisbòl Veterano a start den luna di yüni/yüli i a korta den práktikamente tur liga pa por terminá tempran. Liganan mester terminá den òktober i medio novèmber pa tur hungadó, dirigente i fanátiko tin tempu pa nan famia. Miéntras tantu kampionato di Little League a start ku kampionato den divishon Minor, Little , Junior i Senior. Ban spera ku den 2022 si nos por tin selekshonnan ku ta biaha pa eksterior i pa Mundial na USA.
* * * * *
Aña pasá na e momentunan den e di 3 siman di novèmber aki ekipo Quality Stars a gana Bulldogs i pasa pa final kontra di Jandoret Raiders i Nos Tambe Por a bira kampion ganando di ekipo Jaws. By the way, moveshon pisá den ekipo di Pitufos ku lo tin nan ekipo di Liga 60. Pitufos lo keda drei normal den Liga 50 tambe. Otro kos, nos no a tende nada mas di un Liga 70 ku Rudy Brunken tabata pendiente pa lanta i start ku 4 ekipo. Nos ta keda te aki pa awe.
