Fanátikonan di Deporte Kòrsou. Manera ta e kaso 3 biaha pa siman nos tin informashon di Beisbòl i Sòftbòl pa nos lesadٌónan. Nos a risibí standing i sifra di Torneo Kenley Jansen. Danki na tremendo trabou atrobe di e gran boluntario sra. Viveca Hughes ku nos tin e sifranan. Wikènt pasá nos tabata na Tio Daou Ballpark en konekshon ku apertura ofishal di e torneo i nos tin varios pòtrèt den e dianan benidero di hungadanan i e hóben peloteronan ku ta disfrutando di e torneo.
* * * * *
Den Senior League ekipo Marchena ta invikto ku rekòrt di 4 ganá i 0 pèrdí. Ekiponan Brievengat, Montanja Abou, Sint Michiel tin 4 ganá i 1 pèrdí. Van Engelen tin 3 ganá i 1 pèrdí. 11 ekipo tin den e kategoria Senior den e torneo. Brievengat, Marchena, Montanja Abou, Sint Michiel, Montanja Ariba, Van Engelen, Santa Maria, Jandoret, Trai Seru, Santa Rosa i Willemstad. Willemstad i Santa Rosa tin 0 ganá i 5 pèrdí. Santa Rosa den divishonnan Little no sa ta den sótano, espeshalmente den kategoría Senior. Talbes nan a topa tur e ekiponan fuerte den e promé weganan di nan skèdjel.
* * * * *
Den Junior no tin niun ekipo invikto. Montanja Ariba tin rekòrt di 5-1 na kabes di e kategoría Junior, sigí pa Montanja Abou, Sint Michiel i Trai Seru. Den Junior tin 12 ekipo. Montanja Ariba, Brievengat 1 i 2. Montanja Abou, Santa Maria, Sint Michiel, Trai Seru, Van Engelen, Marchena, Banda Bou Bears, Santa Rosa i Willemstad. Mairoshendrick Martinus ta lider den bateo den Senior i Jurion Reina ta lider den ERA. Tur dos hungadó ta di Sint Michiel. E picher Dylan Wilson di e ekipo Santa Maria Senior ta lider den ponche tirá pa loke ta trata Senior League.
* * * * *
Den Junior Curley Martha ta lider den bateo, Curley Martha mes ta lider den kareda empuhá. Jadeal Janga di Montanja Abou ta number unu den ERA i den ponche tirá. Manera ya nos anunsiá kampionato Latino Americano di Junior League lo tuma lugá na Kòrsou den luna di yüli. Segun nos ta promé biaha ku Kòrsou ta tene un kampionato di Junior League. Nos a yega di tene kampionatonan di divishon Little na 4 okashon. 1979, 2009, 2015 i 2019. Kampionato Senior tambe na varios okashon 1983, 1989, 1999 i na 2016. Intermediate nos a tene kampionato na dos okashon 2014 i na 2016. Nos a bira kampion na tur dos okashon di e kampionatonan Intermediate ku nos a tene.
* * * * *
Djaweps pasá tabattin reunión di Beisbòl Veterano Kòrsou (BEVEKO). E reunión a tuma lugá na Sede di NAPB na Schottegatweg. Den e reunión ta a eligí miembronan di direktiva nobo pa 2021. Segun informashon Shendy Cras di Santa Rosa Memories a keda eligí komo presidente. Tur ekipo mester a manda un òf mas miembro pa drenta direktiva.
* * * * *
Ekiponnan di Liga 50 Sòftbòl a kuminsá move formal ku nan trainingnan i tin varios kambio den pipe line. Nos a manda algún bòm siman pasá i ta pendiente pa reakshon di esnan envolví. Baranka a bula den awa di Catpower i Marlins tin vários hungadó nobo pa 2021. Norwin ‘Sor’ Moesquit, estrea shortstop ku tin kasi 60 aña ku ta moviendo den gran forma ainda, a bisa nos flèt ku esun ku regla un trabou p’e e ta bai. Sor Moesquit ta den e grupo di 36 trahadó ku a pèrdè trabou na Sekshon di Kultura (Fundashon). Sor tabatin 36 aña di servisio.
* * * * *
Ban Serio tambe ta mobilisando pisá i ta drechando nan tim apesar ku nan tin un tremendo ekipo i ta super kampion di 50+. Algún ekipo ta formando trabuko pa duna kompetensia na Ban Serio, manera entre otro Flamboyan/Tigers, Marlins, Pitufos, Baranka ets. Ban Serio tin 3 aña sigí kampion despues ku Pitufos a bira kampion na 2016. Ban Serio ta kampion na 2017, 2018 i 2019. Kampionato di 2020 no a terminá i by the way, ainda no tin desishon ku ta hunga play-off kòrtiku òf ta laga e kampionato ei manera a terminá aña 2020. Ekipo Swift a kumpli 49 aña di eksistensia ayera 23 di febrüari. Pa 2022 ta selebrashon grandi lo tin. Nos ta keda te aki pa awe.
