Treasure i Nos Goso a gana den Play-off Diamond stars League i Final Torneo Quality
The Diamond Stars League a start ku play-off djabièrnè 23 di mei na Sam Bunting Ballpark
WILLEMSTAD - The Diamond Stars League a start ku play-off djabièrnè 23 di mei na Sam Bunting Ballpark. Ekiponan Treasure New Era, Rising Phoenix, Nos Goso i The Fighters a klasifiká pa play-off. Skema di e play-off ta lo sigiente. Djabièrnè 23 di mei Treasure a gana Rising Phoenix 5 pa 2 i Nos Goso a gana The Fighters 10 pa 6. Djasabra 24 di mei ta The Fighters vs Nos Goso pa 8’or sigí pa Rising Phoenix vs Treasure pa 10’or pm.
Quality Stars kampion Beisbòl Veterano 2024 i djadumingu tin final di Torneo Warm-up
WILLEMSTAD- Quality Stars a swip Santa Maria Pirates den final i bira kampion Beisbòl Veterano 2024. E seri final a tuma lugá wikènt pasá na Vi Jansen Ballpark. Quality Stars a gana e promé wega ku skor di 7-0 i wega number 2 ku skor di 9-5. E di dos wega Santa Maria tabata ganá ku skor di 5-3 te den último inning. E promé wega a bai relatívamente fásil. Djadumingu awor tin final di e torneo warm-up ku Quality Stars a organisá. Ekiponan Yesterday i Quality Stars lo topa ku otro den e gran final 1.30 pm i pa 11’or lo tin wega bálido pa di 3 i 4 lugá entre Santa Maria Pirates i Broncos. Ayera tabatin reunion general di BEVEKO pa prepará pa start kampionato 2025 riba nivel di 40+ i 50+. Entrega di premio di kampionato 2024 lo tuma lugá riba e promé fecha di kampionato 2025.
FINAL
Quality stars 7, Santa Maria 0
Quality a dal 11 hit i hasi 1 eror. Farley Ignacio tabata e picher ganadó. Rydell Isabella, Ringemar Raap i Luisgardo Alvarez a bati di 3-2. Santa Maria a konektá 4 hit i hasi 4 eror. Evenon Martis tabata e picher pèrdèdó i Ryan Samuel a bati di 3-2. Jason Naaldijk di 2-1.
Quality Stars 9, Santa Maria 5 Quiality Stars a bati 10 hit i hasi 1 eror. Raylison Gijsbertha tabata e picher ganadó i Merieldo Trinidad a bati di 3-3. Santa Maria a dal 9 hit i kometé 2 eror. Evenon Martis tabata e picher pèrdèdo i Eldred Estanista a bati di 4-3.
Nos Tambe Por ta gana Pitufos 10 pa 3 den apertura Liga 60
WILLEMSTAD- Ekipo Nos Tambe Por kampion di temporada 2024 a sali riba bon pia i gana Pitufos 10 pa 3 djadumingu 18 di mei. Djadumingu último tabatin apertura ofishal i e promé 3 weganan di kampionato. Den e otro weganan Jaws a gana Curacao Super Stars 6 pa 1 i Los Amigos a dal Mon Repos Sluggers 17-3. Djadumingu Liga 60 ta sigi ku 3 wega na Frank Curiel Balllpark.
Nos Tambe Por 10, Pitufos 3 Picher ganadó tabata Michelangelo ‘Galbao’ Boekhoudt i 4 batiadó a bati di 3-2. Michael Schoop i Percey Schoop a dal homerun. Pa Pitufos Elston Constancia a dal homerun i bati di 2-2.
Los Amigos 17, Mon Repos Sluggers 3 Gilbert Henrietta tabata e picher ganadó. Richard Coffie a bati di 3-3 i Gregory Jonis di 2-2. Pa Mon Repos Sluggers John Klooster tabata e picher pèrdèdó. Marlon Privania a bati di 2-2.
Jaws 6, Curacao Super Stars 1 Riley Toppenberg tabata e picher ganadó. Rudsel Poulina i Marlon Romer a bati di 2-2. Pa Curacao Super Stars Pedro Austriano tabata e picher pèrdèdó.
Fanátikonan di Deporte Kòrsou bon dia i felis wikènt. Nos ta drenta un wikènt kaminda lo tin hopi wega mas debí ku dos liga mas a tene apertura djadumingu último i naturalmente hopi liga mas pa kubri. Djadumingu último tabata apertura di Liga 60 i Liga Streanan di Ayera. Nos lo trata di publiká karera di e tres baluartenan di Liga 60.
Djabièrnè anochi play-off Diamond Stars League aa start na Sam Bunting Ballpark. Hopi interes pa e weganan aki ku ta keda transmití bibu. Ekipo Rising Phoenix tabata komandá e liga aki relativamente fásil, pero wikènt pasá ekipo Treasure a pasa pa okupá e promé lugá riba e standing.
Siman pasá Nos Goso tabatin otro wikènt pa lubidá. Djabièrnè nan a pèrdè 12 pa 8 kontra Treasure i djasabra ku skor di 16 pa 2 kontra di Mas Goso. Den otro weganan ekipo The Fighters a dal Mas Goso 10 pa 4 djabièrnè. Djasabra Treasure New Era a dal Rising Phoenix 5-0 i pasa pa promá lugá. En todo kaso e standing ta Treasure 11-1, Rising Phoenix 10-2, Nos Goso 4-8, The Fighters 3-9 i Mas Goso 2-10.
Torneo Quality lo terminá djadumingu ku dos wega na Vi Jansen Ballpark. Den e promé wega Santa Maria lo topa ku Broncos pa 11’or i despues ta sigi final entre Yesterday i Quality. E wega di Liga 50 no ta sigi mas. Quality Stars ta den un gran racha i nan tin 3 título sigí den Beisbòl Veterano i lo bai trata na yega e rèkòrt di Jandoret Raiders ku tin 5 título sigí.
Kampionato ta start dia 20 di yüni na Vi Jansen Ballpark i tabatin un reunion ayera na Landhuis Salinja ku ta e lugá di kustumber di reunionan di Beisbòl Veterano e último añanan.
Na Aruba tin un liga nobo, Aruba Senior Softball Association. (ASSA). Tin un direktiva formá pa Rudy Carti, Frederic Krozendijk, Mario Bomba, Tico Loopstok ku ta presidente, Enrico Webb, Amado Rosina, Tito Wever i Dennis “Boega’ Blijden. Den 50 + tin 9 ekipo i den 65+ tin 4 ekipo. Dia 8 di yüni tin apertura den Aruba Junior Ballpark. E ekiponan di Aruba Juniors, Deco, Boomerang, Astros, Surprise, Deco Classico, JT Tigers, Changes, La Moderna Floorshime. Kòrsou tabata pendiente pa start ku Liga 70 i despues intenshon tabata pa lanta 65+, pero e kosnan a wanta. Aruba si a lanta nan 65+. Manera ya nos a menshoná. Den òktober lo tin ABC 60+ ku partisipashon di ekiponan di Aruba, Boneiru, Kòrsou i Hulanda. Hulanda i 2 ekipo di Kòrsou i 1 di Boneiru a konfirmá nan partisipashon.
Nos tin skema pa loke ta Liga 60 djadumingu na Frank Curiel Ballpark. 11.00 Curacao Super Stars – Nos Power, 13.00 Jaws vs Lions ku mester bira kandela i pa 3’or tin otro kandela debí ku ta Los Amigos vs Nos Tambe Por. Kandela no ta problema debí ku e hòmber ku sa kon kombati kandela (un tempu), Elvin Regina tei ku Jaws pa e wega di 1’or i e lo keda naturalmente na tereno pa mira e wega sigiente ku ta Nos tambe Por vs Los Amigos ku ta otro kandela. Los Amigos a tira bara di hak den awa di Nos Tambe Por na 2024 i na 2025 tabata turno di Jaws pa Los Amigos piska den nan awa. Los Amigos tin tremendo line up i práktimente un dream team riba tereno.
Liga 50 tin 4 wega djasabra na Van Engelen Ballpark. Den e promé wega pa 10’or ta Ban Serio vs Marlins ku ta kandela. Ban Serio tin rèkòrt di 2-0 i Marlins tin 2-1. Ta trata di dos ekipo ku a klasifiká den e promé 4-nan temporada 2024. Despues ta sigi Sluggers ku a klasifiká den e promé 7-nan na 2024 i a hunga wild card i keda eliminá pa Baranka ku a bira kampion. Sluggers lo topa ku Flamboyan ku tambe a klasifiká den 2024. Pa 2’or Catpower/Raiders lo topa ku Pitufos i pa 4’or klésh entre Baranka i Jaws. E dos ekiponan aki a topa otro den final na 2022 kaminda ekipo Baranka a bira kampion. Ekipo Lions tin barwacht i Artemisia ta liber. E sigiente djasabra no tin wega debí ku Marlins i Ban Serio lo representá Kòrsou den Kopa ABC&S 50+ na Sint Maarten. Nos ta keda te aki pa awe i te mayan ku Poder di Dios.
