Kopa ABC&S di djarason 28 pa djadumingu 1 di yünI Van Engelen Ballpark
WILLEMSTAD- Kopa ABC&S 2025 lo start djarason 28 di mei i terminá djadumingu dia 1 yüni na Van Engelen Ballpark. 12 ekipo di Aruba, Boneiru, Kòrsou i Sint Maarten lo kompetí. Ekiponan a keda repartí den dos Pul. Den Pul A tin Swift, Terremoto, Happy Brothers, Sint Maarten Sl, Thunders i Sluggers Conn, Den Pul B tin Cicoza, Redskins, Controllers, Super Stars, The Chrushers i The Dreamers. Djarason tin 4 wega, dos riba tereno A i dos riba tereno B.
E promé wega pa 8’or pm lo ta Swift vs Thunders riba vèlt B i na mesun ora Happy Brothers – Terremoto riba tereno A. Ekipo Cicoza lo topa ku Controllers riba tereno B pa 10’or i Redskins lo hunga kontra Super Stars riba tereno A. Bar i kushina lo ta bon surtí manera ya a bira un tradishon i ta spera masha hopi fanátiko mes di Kòrsou i tambe di e otro islanan ruman. Skema ya ta kla i tur ekipo lo hunga 5 wega den nan pul i e promé 8 nan saka for di tur dos pul lo klasifiká pa djasabra anochi. Djadumingu mainta i mèrdia lo tin semi-final i e gran final ta djadumingu 3.30 pm.
Ban Serio a gana Marlins i Baranka ta derotá Jaws den Liga 50
WILLEMSTAD- Liga 50 di Sòftbòl a sigi djasabra 24 di mei na Van Engelen Ballpark ku 4 wega. Den e promé wega Ban Serio a gana Marlins ku skor di 7-6 den un wega ku a pèrta formal den e parti final. Marlins tabatin base yen komo ekipo di kas ku dos out, pero no a logra e kareda di empate i e kareda di gana. Den otro wega kayente ekipo Baranka a gana Jaws 4-3. Jaws tabata dilanti práktikamente henter e wega 3-0. Baranka ta kòrta e bentaha riba homerun back to back di Ramiro Balentina i Edmar Cornelia i hasi e wega 3-2. Den e di 7 inning Baranka ta nota dos kareda riba homerun di Robertico Ramazan pa hasi e wega 4-3 i Jaws no ta nota kareda den nan último chens. Den e otro weganan Flamboyan a nòkout Sluggers 14-4 i despues Jandoret Raiders a nòkout Pitufos ku mesun skor 14-4. Djasabra awor no tin wega debí ku tin Kopa ABC&S di e hóbennan na Van Engelen Ballpark.
Tur dos seri di Play-off Diamond Stars League a empatá
WILLEMSTAD- Djabièrnè 23 di mei play-off di Diamond Stars League a start na Sam Bunting Ballpark na Brievengat. E play-off sistema page entre number 1 i 2 a empatá i e otro seri entre 3 i 4 tambe a empatá. Djabièrnè awor tin weganan desisivo. Den e promé wega di djabièrnè último Treasure number 1 a gana Rising Phoenix, number 2, ku skor di 5-2. Den e di dos wega di e fecha menshoná Nos Goso (number 3) a gana The Fighters (number 4) 10-6. Djasabra e serinan a bòltu i e kosnan tambe a bòltu. Rising Phoenix a bini bèk pa gana Treasure 7-3 i The Fighters a derotá Nos Goso (Gai Lihe) ku skor di 13-8. Weganan desisivo di e seri lo tuma lugá djabièrnè 30 di mei na Sam Bunting Ballpark. Den e promé wega pa 8’or ekipo Rising Phoenix lo topa ku Treasure i den wega number 2 pa 9.45’or The Fighters lo midi forsa ku Nos Goso. Kos lo ta kayente djabièrnè awor i tur fanátiko ta bon-biní. Bar i kushina naturalmente ta bon surtí.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bondia i felis siman. Nos ta den siman di Kopanan ABC&S i torneonan internashonal. For di djarason Kopanan ABC&S na Sint Maarten i na Kòrsou. Tin algun ekipo ku ta partisipá na Golden Athlete Championship Series na Puerto Rico, entre otro Pitufos lo sali e siman aki di biahe. Na Kòrsou tin Kopa ABC&S ku partisipashon di ekiponan di Aruba, Boneiru, Kòrsou, Sint Maarten i Sint Eustatius. Ta trata di e Kopa ABC&S di e hóbennan. Marlins i Ban Serio lo sali pa Sint Maarten pa partisipá den e Kopa ABC&S di 50+. E Kopa ABC 40+ ya a tuma lugá na Aruba, kaminda The Greatest (Baranka) a titulá kampion. Kampionatonan di Kòrsou, entre otro Liga 50 i Liga 60 ta tuma un break en konekshon ku e torneonan menshoná.
* * * * *
Diamond Stars League si ta sigi djabièrnè i djasabra na Sam Bunting Ballpark. E bishitante di e otro islanan por dal un keiru banda di Sam Bunting Ballpark pa gosa di e kompetensia i e ambiente di e damanan 35+ di Diamond Stars League. Tur dos seri page system a empatá djasabra. Nos tin e resultadonan i mas detaye. Djabièrnè den e promé wega ekipo Treasure New Era a gana Rising Phoenix ku skor di 5-2. Djasabra Rising Phoenix a dal Treasure New Era ku skor di 7-3 i asina empatá e seri. Ta trata aki di e seri entre number 1 i 2 sistema page. Den e seri entre number 3 i 4, ekipo Nos Goso a gana The Fighters 10 pa 6 djabièrnè i djasabra tabata ekipo The Fighters ku a dal bèk ganando ku skor di 13-8.
* * * * *
Reunion di BEVEKO tabata kayente djaweps último na Landhuis Salinja. Meskos tambe reunion di Liga 50 djaluna siman pasá na sede di SSK. Rumannan ta wega di dibertí i di veterano e kos ta, laga nos bai trankil. Saludo pa tur fanátiko di MLB, espeshalmente esnan di Atlanta Braves ku ta kontentu ku Ronald Acuña Junior tei bèk. Den su promé turno djabièrnè anochi riba e promé lansamentu ela dal un homerun largísimo pa left center di kasi 476 pia. E sigiente dia djasabra Acuña a bolbe dal homerun. Ku subida di Ronald Acuña mester a traha lugá riba e roster i Atlanta a DFI (Designated for Assigment) e shortstop Orlando Arcia.
* * * * *
E aña aki Arcia no tabata produsí i e shortstop bon defensivo Allen a kita e puesto di Arcia. Den 7 dia vários kos por pasa ku Arcia, entre otro kambio pa otro tim, laga den libertat, pone riba waivers. Ta detayenan ku tin basta splikashon i ta reglanan di MLB. Djasabra nos a topa e hungadó Mairoshendrik Martinus ku ta den Klase A haltu ku ekipo Los Angeles Dodgers. Mairoshendrik e aña aki ta batiendo pa un average haltisimo di .379 ku 1 homerun i 11 RBI. Mairo tabata na Kòrsou pa entiero di su abuelo Erold de Lanoi, èks gran picher di Slowpitch tempu di su tempu. Erold ta tata Richenel de Lanoi tremendo hungadó i batiadó di poder hopi aña pasá den Slowpitch promé ku e leshoná su pia. Deskanso i forsa na famianan di e defuntu.
* * * * *
Nos risibí algun detaye di Kopa ABC&S ku ta start na Van Engelen Ballpark djarason 28 di mei ku ta un dia promé ku Dia di Ascencion. Djarason tin 4 wega programá, dos wega riba tereno A i dos wega riba tereno B. Swift , Terremoto i Cicoza lo representá Kòrsou den e kompetensia fuerte i ekipo Cicoza ta e último kampion despues ku Swift tabata komandá Kopa ABC&S pa hopi aña, Cicoza a gana Kopa ABC&S na 2015 i bolbe gana na 2024. E aña 2016, 2017,2018 2019, 2022 i 2023 tabata ekipo Swift ku tabata kampion.
* * * * *
ABC&S a keda fundá pa entre otro Chai Curie ku ta e hòmber ku a funda ekipo Terremoto tambe, ku tabata un ekipo di trahadónan di Banko Maduro e tempu ei. Terremoto ta drei ainda den Liga Amstel ku ta pendiente pa start den luna di yüni na Van Engelen Ballpark. Den un artíkulo nos tin mas detaye di Kopa ABC&S ku ta start djarason dia 28 di mei i terminá djadumingu 1 di yüni. Nos ta keda te aki awe te mayan ku Poder di Dios.
