Fanátikonan di Deporte Korsou, bon dia i felis wikènt. Djasabra i djadumingu tin e gran final entre ekiponan Baranka i Pitufos. Manera nos a splika den kurso di siman, ekipo Baranka a gana Pitufos na dos okashon den temporada regular. Naturalmente ta wega òf seri nobo nobo ta start djasabra i ta final ta konta. Pa loke ta trata e sifranan overall ekipo di Baranka tin averahe di .453, picheo 5.59 i .898 den defensa. Pitufos tabatin .342 na bateo, picheo 5.86 i defensa .925. Nos no a risibi resultado di tur wega di play-off pa por analisá e sifranan di play-off.
* * * * *
Miéntras tantu ekipo Otrabanda a bini bèk for di República Dominicana. E ekipo no por a hunga niun wega, debí na awaseru i mal estado di tereno. Otrabanda Veterano, e ekipo mas bieu den Beisbòl Veterano lo tei den 2022 ku ekipo den tantu Liga 40 komo Liga 50. By the way, play-off di Liga 50 ta djadumingu awor 11’or i 2.30’or na Vi Jansen Ballpark. Yesterday tin wega 11’or kontra Sigi Hunga i 1 ora i mei despues Jandoret Raiders vs Vosama. Inisialmente e wega tabata programa pa 2’or djadumingu. Den Yesterday tin e sigiente hungadónan di Pitufos. Orcendo Clemencia, Louis Coffie, Eston Constancia, Boy Constancia, Cedric Curiel, Arthur Davelaar, Jurgen Krondstadt, Sharlon Louisa, Norwin Moesquit, Frances Petronlia i Terry Rosina. Un total di 11 hungadó mas o ménos den mesun ekiponan. Dado kaso Yesterday pasa pa final djadumingu awor lo no tin wega di 50+ ku ekipo Pitufos.
* * * * *
2.30 pm djadumingu ta Jandoret vs Vosama den semi-final. Otro aña Santa Rosa Memories lo djòin Liga 50 i ekiponan lo bira 6 ku chèns di bira 7. Varios moveshon den Liga 40 di Beisbòl Veterano pa otro aña. Un ekipo grandi lo pèrdè hopi hungadó mes. Parse ku The Brothers ta preparando un ‘Dream Team’ pa temporada 2022 den Beisbòl Veterano. Santa Rosa Memories tambe ta moviendo den gran forma pa hasi nan ekipo di 40+ mas kompetitivo pa yega final. Santa Rosa Memories a bai final pa último biaha na 2010 den un final kandela kontra ekipo The Bears ku a pasa pa historia. Nos ta kòrda ku e wega a terminá 3-2 ku Santa Rosa ku kareda di laga The Bears den tereno i bira kampion. Double play a kai i The Bears a bira kampion pa último biaha na 2011. 2009 e ekipo Santa Rosa a gana The Bears i bira kampion.
* * * * *
E último 10 añanan den Beisbòl Veterano 40+ Jandoret tin 5 título, Bulldogs 2 título, Santa Maria 2 i Quality 1 titulo. Un tempu tabatin ekiponan Desu, White Label Punda, Surprise, Groot Kwartier, Viejas Glorias, Mi Kos, Eagle, Nos Union, ets. Biniendo bèk riba ekipo The Brothers, e ekipo di Signald Burnet tin un grandi su tras pa temporada 2022 i ta hopi hungadó di varios di ekiponan tòp di Beisbòl Veterano lo move pa The Brothers ku ta rumbo pa e promé 4 òf 6-nan. No ta konosí ainda kon lo hunga kampionato di Beisbol Veterano 2022. Ta for di 2018 a hunga dos buelta kompletu, esta 22 wega den Beisbòl Veterano. Na 2019 a hunga un buelta i despues buelta number 2 den pul. Na 2020 a hunga un buelta i despues Round Robbin entre e promé 6 ekiponan. Na 2021 a hunga un buelta so i bai dirèkt pa play-off di 4.
* * * * *
Ban bèk pa Liga 50 di Sòftbòl. Despues di basta aña nos lo tin un kampion nobo den Liga 50. Na 2016 ekipo Marlins tabata kampion i Ban Serio a bira kampion na 2017, 2018 i 2019. 2020 no tabatin play-off, debí na Covid-19. Un tempu tabata Jaws ku a manda den 50+, despues gainan di Jaws a bai Sharks i mas despues hopi di nan den ekipo Ban Serio. Pitufos tin un título den Liga 50 na 2015 Iita bai pa nan di dos título, miéntras Baranka ta nobo nobo den 50+ despues di e djoin venture ku Sharks algun aña pasá. Ta spera un públiko grandi sigur djasabra na Van Engelen Ballpark i djadumingu e wega final lo krusa un tiki ku play-off di Beisbòl Veterano na Vi Jansen Ballpark. Nos ta keda te aki pa awe.
