Fanátikonan di Deporte Kòrsou bon dia. Pabien na ekipo Baranka ku a bira kampion di Sòftbòl Liga 50 djasabra dilanti un públiko grandísimo na Van Engelen Ballpark. Baranka a gana e ekipo Pitufos ku skor di 17 pa 6. Kenny Hellment tabata den gran forma atrobe komo picher i bira e picher ganadó i MVP di e seri final. Kenny Hellement a gana wega number 1, pèrdè wega number 2 i gana wega number 3. Baranka/Sharks a bira kampion di Liga 50 despues di 5 aña (5 kampionato) den Liga 50. E ekipo a hunga nan promé kampionato na 2017 na Cirilo Chirino Ballpark.
* * * * *
Laga nos bai bèk un ratu den tempu. Den aprel 2017 ekipo Sharks/Baranka 50+ a presentá unifòrm nobo na hungadónan pa kampionato 2017. Kid Boca Chica den representashon di Sharks i Macaay komo Baranka a pose ku e unifòrm i basha shampaña na Buurtcentrum Brievengat. Despues di e entrega di unifórm, e hungadónan a keda huntu, dal algún beter i será konosí ku e hungadónan den e joint venture. E ekipo a pèrdè ku skor grandi kontra Ban Serio den nan promé wega, pero lo bini bèk na momentu ku tur hungadó riba lista yega tereno. Esei tabata e promé simannan di ekipo Sharks/Baranka den Liga 50 pa después di 4 aña i 5 temporada bira kampion.
* * * * *
Hopi hende mes djasabra pa mira e wega finalísimo entre Baranka i Pitufos. Baranka a sali duru mes for di den promé ining kontra e picher Janchi Cicilia di ekipo Pitufos. Baranka a sali bai ariba 10-0 i tabata difísil pa ekipo Pitufos bini bèk kontra e picheo di Kenny Hellement. Pitufos a lucha si, bati bon despues, pero e ventaha tabata muchu grandi i Baranka a sigi hinka kareda kontra relevistanan Sidney Lourens i Naai Hooi, pa despues Janchi Cicilia mes bini bèk pa keda picha ta na final di e partido. Despues di wega tabatin entrega di premio i tabatin varios ekipo ku a forma nan grupo i disfrutá di e wega, entre otro hungadó i fanátikonan di ekipo Marlins ku tabata den e parti leftfield pafo di tereno.
* * * * *
Kenny Hellement MVP di final 2021 di Liga 50 no a start ku ekipo Baranka for di komienso di temporada. Kampionato a start den yüni i tabata medio ougústùs ku Kenny a djoin ekipo Baranka i tira kasi tur e weganan ku a sobra pa Baranka. Ekipo Flamboyan i Artemisia a konektá Kenny bon durante kampionato, pero e kabai di heru a sabi di gana tur wega ku ela picha. Den play-off Kenny a pèrdè pèrtá kontra Ban Serio den e promé wega di play-off dia 13 di Novèmber, pero a bini bèk komo picher i gana dos wega sigí pa Baranka bai final. Den e di dos wega di final Pitufos a dal Kenny duru i gana 14 pa 1, pero Kenny a bini fuerte bèk apoyá pa bon bateo di Baranka pa gana e wega finalísimo i bira kampion. Den e artíkulo di djaluna nos tabatin entrega di premio i mas detaye di final di Liga 50.
* * * * *
Tin basta moveshon ta tumando lugá den silensio di Beisbòl Dòbel A. Calten Daal di ekipo Wild Cats a pasa pa Santa Rosa Indians. Calten Daal tabatin 2 aña ku Wild Cats i a bira supkampion den 2020 i kampion den 2021. Calten Daal lo djòin su ruman Aldair Daal den Santa Rosa. Wild Cats ta duru bèk tras di e picher estelar di Royal Scorpions, Ruderly Manuel. Nada konkreto ainda, pero tin moveshon. Santa Rosa Indians ta tras di Shair Larus di ekipo Firebirds. Keda pendiente pa mas den kurso di siman.
