Fanátikonan di Deporte Korsou, bondia. Jandoret Raiders a titulá kampion di Beisbòl Veterano Liga 50 pa di 4 biaha sigí djadumingu siman pasá. Den un wega dramátiko Jandoret a gana e ekipo di bario Yesterday ku skor di 10 pa 7. Yesterday tabata ganá ku skor di 7-1 te den di 5 inning ku e picher Omar Valies tirando hermétiko ku apénas 3 hit permití. Despues a bin ku 3 picher mas ku no por a bini kla ku e ofensiva di Jandoret Raiders pa finalmente e wega terminá 10-7. Jandoret Raiders a nota 9 kareda ku dos out i base bashi den di 5 inning pa bòltu e wega. Fanátikonan di jandoret a kòrda e wega entre Jandoret Raiders kontra Isla Crackers den final di 2016 ku e seri empatá na 1, kaminda Jandoret atras 5-1 a nota 12 kareda den un inning pa finalmente bin gana 13-5. Notisia tristu a drenta e siman aki ku un grandi di Sòftbòl Veterano 60+ na Aruba a bai sosega. Ta trata aki Junny Kock ku a bai sosega. Manager i un dje grandinan di ekipo Aruba Juniors.
* * * * *
Jandoret Raiders a bira kampion pa di 4 biaha sigí den Beisbòl Veterano Liga 50. Na 2017 tabatin e
promé kampionato ofishal di BEVEKO kaminda Jandoret a gana di Yesterday den final. Na 2018 no tabatin kampionato di 50+ di BEVEKO. Na 2019 Jandoret a gana di Sigi Hunga, na 2020 Jandoret a bolbe gana di Sigi Hunga i den 2021 Jandoret a bolbe gana di Yesterday. Bon públiko pa mira e wega final na Vi Jansen Ballpark. E hóbennan di Sint Michiel Dodgers, ekipo den kampionato di RBI, tabata presente pa mira e dos ekiponan enfrentá otro. Tantu Jandoret Raiders, Yesterday komo Sint Michiel Dodgers ta trein riba mesun tereno na Jandoret. Mayornan i fanátiko di ekipo Sint Michiel Dodgers tabata presente i tabata animá tur dos ekipo. Manager Erwin Benita ta hunga den Yesterday i coach Edmar Cornelia ta den Jandoret Raiders. Despues di wega tabatin selebrashon di kumpleaños di Jeffrey Martina i Gregory Zimmerman na station di Jandoret.
* * * * *
Selekshon di Rudy Brunken, ekipo Curacao Super Stars a sorprendé ekipo Jaws den final 60+ di Torneo Kima Liga organisá pa Gurtney Jansen. E selekshon di Rudy Burnken ku ta bai Aruba na mart 2022, a gana ku skor di 5-4 ku tremendo picheo di Anthony Pieter ku ta rumbo pa 60 den 2022. Wendell Isidora a bati di 3-2, Efraim ‘Junny’ Marselia tambe di 3-2. E selekshon di Rudy Brunken ta manera Mon Repos Sluggers. Junny Marselia a hunga den 50+ kaba ku ekipo Lions den 2021. Junny a bisa nos ku e mester kustumbrá ku e bala moli i slow ainda pa e por kuminsá bati e bala manera mester ta. Junny Marselia bon hungadó tempu di su tempu den ekipo Blue Hawks ku hungadónan manera Kenneth Mongen, Kenneth de Lima, Nelly Jakoba, Payo Faneyte, Ciryl Nicia, Didi Gregorius, Piska Martis, Humphrey Granger, Floyd Garnette ets. E ekipo den komienso di añanan 80 tabata den man di Taffy de Jongh i despues Fichi Flemming.
* * * * *
Den dianan benidero, pa ta mas eksakto otro siman, nos lo tin e resumen di e liganan i di e kampionnan den 2021. Un aña ku práktikamente tur liga a drei apesar ku e pandemia COVID-19 no a pasa ainda. Ta Liga Streanan di Ayera a skohe pa hunga un liga so, esta Liga 50 kontralli na temporada 2019, kaminda Liga Streanan di Ayera a kibra rekòrt organisando Liga 35+ i liga 50+. Ta Beisbòl Veterano so ta organisá Liga 40 i liga 50 bou di un kapa. Naturalmente federashonnan manera FEBEKO, CSB, FFK i otronan ligá ku FDOK ta organisá kampionatonan pa diferente edat.
* * * * *
Djasabra 4 di desèmber tabatin dos transmishon pareu via Facebook di e wega finalísimo den Liga 50 entre Baranka i Pitufos, kaminda Baranka a gana i bira kampion. Nos ta kòrda ku na 1999 a kuminsá ku transmishonnan di Slowpitch via Radio Hoyer. Varios final i weganan grandi a keda transmití. Nos ta kòrda final di Beisbòl Veterano 2016. Tabatin masha hopi hende mes na Vi Jansen Ballpark i un transmishon den gran forma di Radio Mas enkabesá pa Reinaldo Casimiri. Zoyoyo i su grupo a animá formal na final di e wega i tambe despues di entrega di premio. Jandoret Raiders a selebrá en grande e dia ei ku e banda ‘Groove’, ku kantantenan manera Urvin Jano i Quincy Cicilia ku a deleitá esnan di Jandoret despues di wega na fiesta di Jeffrey Martina, Gregory Zimmerman i Juraini Martina. Manera semper hungadó i fanátikonan di tur otro tim tabata welkom i nan a pasa masha dushi serka Jandoret Raiders e dia ei .
