Fanátikonan di Deporte Korsou, bondia i felis siman. Pabien na ekipo Sint Michiel/Wild Cats Dodgers ku a bira kampion di RBI 2021. Wild Cats Dodgers a gana Marchena Braves den dos wega emoshonante. Tur dos wega di final a bai Extra Inning (Tie Break). Den tur dos wega ekipo Sint Michiel Dodgers tabata atras den último inning. Djabièrnè Sint Michiel tabata pèrdí ku skor di 5-1 den di 7 inning, empatá e wega pa despues gana den di 8 inning komo ekipo di bishita ku skor di 9 pa 6. Djasabra pèrdí 4-2 den di 7 inning, pa despues bin gana 5 pa 4 den di 8 inning den Tie Break.
* * * * *
RBI por mira atras riba otro aña eksitoso. Extra Deporte a skor haltu ku un tremendo transmishon di e dos weganan. Un transmishon riba nivel haltu ku 6 kamara, shotnan djaserka i ripitishon di hugadanan. Keda pendiente pa mas transmishon di deporte den aña 2022, espeshalmente di weganan di Little League i Beisbòl en general. Sigidónan di Extra Deporte i fanátikonan di deporte, espeshalmente Beisbòl, a gosa un bòl di narashon i komentario di e weganan riba plataformanan manera entre otro Facebook i You Tube. Riba e plataformanan ei e weganan ta keda i hungadó i fanátikonan por keda waknan pa semper.
* * * * *
Nos a risibí e notisia ku Junny Kock manager di Aruba Juniors, un dje grandinan di tur tempu di Sòftbòl Slowpitch di Aruba a bai sosegá siman pasá. Semper Junny tabata bini Kòrsou ku Aruba Juniors tempu di Liga 50 i mas último añanan den Liga 60+. E tabata trata Yunan di Kòrsou masha bon mes na Aruba. Su amigunan di Kòrsou di Fety Curie i Wimbert Hatonan aki. Djarason 15 di desèmber tabatin entiero. Nos tin varios pòtrèt di Kock den su bishitanan na Kòrsou ku Aruba Juniors den 60+. Na 2015 huntu ku Aruba Juniors tempu ku nos amigu Freddys Refunjol tabata move aktivo ainda ku ekipo Florsheim. Deskanso na famia i amigunan di Junny Kock.
* * * * *
Otro aña probablemente lo tin Torneo Hope atrobe i ta spera ku ekipo Flow lo tei bèk pa duna kompetensia tantu den Soshal komo den Challenger. Torneonan Survivors i Amstel Bright lo kalentá e ekiponan pendiente Torneo Hope. Ta basta ekipo (empresa) nobo tin pendiente pa start. Ta dos aña sigí no tabatin Torneo Hope. Polis òf Banco di Caribe ta pendiente pa organisá Torneo Hope den koperashon i sostén di Aqualectra ku a organisá e torneo algún aña eksitosamente.
* * * * *
Nos Goso, ekipo super eksitoso den Sòftbòl Femenino Veterano a sera aña ayera den presensia di nan spònser Gai Lihe. Nos tabatin artikulo i detayenan dos dia pasá. Nos Goso no tabata aktivo den 2021, debí ku e liga ku nan tabata adén no a funshoná. Nos Goso ta e ruman mas grandi di ekiponan Mas Goso i Tur Goso. Ekipo Tur Goso a sali supkampion di 50+ di Liga Streanan di Ayera. Ta spera hopi moveshon den 2022 den Liganan Femenino Veterano. By the way, djasabra Marchena Braves i sera aña na ‘Clubhuis’ di misa di Suffisant. Nos ta pendiente pa pòtrèt pa un relato.
* * * * *
Nos Big Leaguernan ta moviendo sin fin na Kòrsou den e dianan aki i ta kumpliendo ku e pueblo di Kòrsou. Nan ta gosando sin fin riba Kòrsou ku e kalor i sabor di nos mes hendenan. Ozzie Albies, Kenley Jansen, Jonathan Schoop, Jurickson Profar i Didi Gregorius. Nos no sa ku Simmons a yega Kòrsou kaba. Pa yanüari e Big Leaguernan lo kuminsá move mas intensivo, ánke nos sa ku algún ta train kaba pendiente pa mas intensidat den yanüari pa nan ta den forma den luna di mart. Nan tur lo ta presente den e Curacao Baseball Week den luna di yanüari 2022.
* * * * *
No masha moveshon den Beisbòl Dòbel A ainda. Varios hungadó prospekto lo firma den luna di yanüari, entre otro Mairoshendrik Martinus i Joshua Leito. Coach Papucho Lacrus di Firebirds lo bai bèk Santa Maria i su ruman Shair Lacrus lo bai Santa Rosa. Calten Daal di Wild Cats pa Santa Rosa ya ta sigur kaba, debí ku Calten a firma algún siman pasá. Nos ta keda te aki pa awe.
