Fanátikonan di Deporte Korsou, bon dia i felis wikent. Nos ta yegando Pasku di Nasementu i hopi hende ta na kareda. Segun nos ta pa selebrá Pasku den gran forma, pero .... inkreíbel kon tráfiko ta pega tur kaminda. Hopi hende mes riba kaya for di siman pasá. Nos ta kere ku esnan ku ta duru den kaya ta pensa ku ta bini Toke de Keda òf algu por estilo i nan ta move pura i hansha pa kumpra tur kos promé ku mester sera kurpa den kas. En todo kaso ban poko poko rumannan, kòrda ta aña ta bai kaba i no ta Mundu ta bai kaba.
* * * * *
Santa Rosa Memories a sera aña djasabra último na un kas na Schelpwijk. Gai Lihe ku ta un dje spònsernan di Santa Rosa Memories a dirigí palabra i entregá premio. Gai Lihe a splika nos ku tur kos a bai tremendo i a kòmbersá ameno huntu i no a papia masha di Beisbòl 2021 i kiko ta bai pasa den 2022. Santa Rosa Memories tin algún moveshon pendiente ei, pero nos no ta bai den muchu detaye. Keda pendiente pa algún informashon di Beisbòl Veterano pa loke ta trata kambionan ku lo tin den 2022.
* * * * *
Sedenan pa loke ta trata Little League 2022 ta konosí. Na Kòrsou nos lo tin Intermediate pa fin di luna di yüni. Intermediate lo hunga riba nivel di Latino. Despues Little League Karibe lo tuma lugá na República Dominicana probablemente ku partisipashon di 6 ekipo, ké mèn den dos pul di 3. E weganan lo tuma lugá na Punta Cana di 5 pa 10 di yüli. Junior League Latino lo tuma lugá na Guatemala. Senior League Beisbòl lo ta na Puerto Rico i kampionato di tur liga di Sòftbòl Little League lo tuma lugá na Puerto Rico. Segun dianan ta bai nos lo tin mas informashon.
* * * * *
Ekipo Chilling tambe a sera aña ku selebrashon dos dia sigí, riba djasabra i djadumingu. Nos ta pendiente pa informashon i pòtrèt. Chilling ta pertenesé na Liga di Nos Tur ku na 2021 tabata den gran forma i ekiponan a haña 2000 florin na reseta ku segun nos ta un rekòrt den Sòftbòl Slowpitch pa loke ta trata reseta. E liga a keda fundá na 2018 i den e aña ei ekipo Sin Stress a gana Un Kara den final. Despues na 2019, 2020 i 2021 Un Kara a bira kampion i ta rumbo pa dinastía den Liga di Nos Tur. Saludo pa nos amigunan Pepi Martis i Gerald Mathilda.
* * * * *
Ban bèk den tempu. Nos ta kòrda Torneo Refineria Isla ku tabata tuma lugá den luna di yanüari. Na momentu ku Torneo Refineria Isla a stop ku torneo soshal, Torneo Survivors a dal adén. Na 2013 Torneo Hope a baha e edat di hungadónan ku no ta konta pa aktivo na 45 aña. Promé ku esei tabata hungadónan ku tin 50 aña tabata keda konsiderá no aktivo ora ta trata di Torneonan Soshal. Nos ta kòrda e tempu ei Liga Un i Tur, Liga Amistad i Liga Trai Seru, tabata tei ainda. Tur e liganan aki a pasa pa historia i ta liga di e veteranonan ta manda, esta Liga 40, Liga 50, Liga 60 i Beisbòl Veterano. Interes pa Liga 40 den Sòftbòl a baha drástikamente i ta 5 ekipo a sobra. Baranka 40 lo tene reunión pronto pa wak si nan ta sigi partisipá den Liga 40. Na 2016 tabatin un ‘exodus’ for di Liga Van Engelen kaminda Dalpega, Baranka ku Rangers di Dave Janga a move for di e liga.
* * * * *
Nos ta start ku resumen di kampionnan durante 2021. Nos no tin masha kampion di torneonan soshal ku ta drei mas den komienso di aña i e promé kampion tabata den fin di òktober, kaminda ekipo Un Kara a bira kampion despues di a swip Chilling den final 7 pa 5 djasabra 23 di òktober i despues djabièrnè 29 di òktober. E sigiente ekipo ku a bira kampion mesun wikènt tabata ekipo Santa Maria Pirates ku a gana Isla Crackers den 3 wega pa bira kampion di Beisbòl Veterano.
