Informashon di Beisbòl i Sòftbòl
Fanátikonan di Deporte Korsou, bondia. Na momentu ku nos tabata rumbo pa fin di aña nos tabatin algún seramentu di aña di ekiponan di Sòftbòl Slowpitch i Beisbòl Veterano. Tin ekipo ku a sera aña na Aruba manera entre otro Lions di 60+. Ekiponan a baha man pisá na seramentu di aña debí na kontagionan, kasonan positivo registrá djamars 28 di desèmber tabata 399. Rumannan un biaha mas, ban poko poko, evitá aglomerashon i kòrda riba e reglanan di higiëna, laba man, distansia di 2 meter ets. ets.
* * * * *
Informashonnan di kambionan den Beisbòl Dòbel A ta ketu, den Veterano si informashon ta drentando ketu bai i ekipo ku ta buskando hungadó pa traha un ‘Dream Team’ ta ekipo The Brothers di Signald Burnet. Vurney Jansen ta rumbo pa e ekipo parse i por konta ku apoyo di su ruman Kenley Jansen. Archie Jansen ta klave den e ekipo Wild Cats di Dòbel A, miéntras Vurney Jansen ta ku un ekipo di Beisbòl Veterano den e maneho general, esta ekipo The Brothers.
* * * * *
Mira kon tempu ta pasa i hopi ekipo no tei mas. Carpatula, Santa Maria Power, Bou di Palu, Happy Time, Armendares, Danger ets. Na Danger si nos lo para un ratu, debí ku e ekipo a sigi move na Hulanda despues ku e lider ku ta Edsel Wilson, a move pa Hulanda i sigi move ku e tim Danger na Hulanda. Aworaki Edsel ta biba na Bèlgika i nan ta move einan i na Hulanda parti Sur. Danger lo bai konsentrá riba Liga 50 i spera Liga 50 den Sòftbòl na Hulanda pronto. E ekipo Curacao Legends tambe tin plan serio pa move den Liga 50+. Na momentu ku nan bini Kòrsou òf Aruba, nan lo kompetí den Torneo di Reino di Liga 50. Tin un ekipo di Kòrsou ku lo ta na Hulanda na 2023 pa hunga 50+ kontra di Curacao Legends den luna di yüli den e aña menshoná.
* * * * *
Bèk den tempu di Intergubernamental organisá pa Marjorie Curiel ku Polis vs Detachement Suffisant. Polis a gana e wega ei. Denley Marten a destaká den Polis komo mihó batiadó i Rudsel Martina ku dos homerun. Rennick Kook ku a kaba drenta den Polis a dal homerun. Den Detachement tabatin Anuard Franken, Blancheville, ets. UTS tabatin Tutuchi La Croes, Churandy Lourens, Dave Kirindongo. Douane/Cems ku Gurtney Adriana komo picher, Fisel Pereira i Rubelyn Nicasia. Tempu bon di Intergubernamental.
Ekipo Polis na Sam Bunting Ballpark. Mas o menos aña 2005.
* * * * *
Nos ta kòrda tambe torneonan di Sòftbòl Slowpitch. Hopi ekipo tabata organisá torneonan, pero awendia ta Torneo Komersial so tin. Saludo pa algún Bombers tambe ku tabata den e ekipo aña 1998. Segun nos, Bombers lo ta bai kumpli 25 aña na 2022. Algún Bombers di e tempu ei tabata Patrick Wagner, e Rubiano Charles Danker, Etienne Goeloe naturalmente, Brown, rumannan Hollander (Ryan i Robert), Ali Hammoud, Giani ‘Versace’ Winterdal, ets. Bombers i Jandoret Raiders den wega di djarason anochi na Liga Trai Seru i despues di einan paranda te den oranan lat di mardugá.
* * * * *
Nos ta pendiente di informashon di Survivors pa loke ta trata Torneo Surivors den luna di yanüari i febrüari. Ekiponan di Liga 50 i Komersial último añanan a kompetí den e torneo, ku esepshon di 2020 na momentu ku e torneo no a bai dor debí na Covid 19. Ta pendiente tambe pa Torneo Amstel Bright organisá pa Cicoza. Manera nos a anunsiá kaba Fundashon van Engelen lo organisá Torneo Hope. Inisiadónan di Torneo SBAB/Hope parse ku no tin problema.
* * * * *
Parse ku 50+ di Beisbòl Veterano lo start promé ku temporada 40+ kuminsá. Tin interes di 50+nan pa hunga Beisbòl apart. Na 2021 tabatin e kampionato mihó organisá di Beisbòl 50+, kaminda ekiponan a hunga mas wega. Dos buelta sigí pa play-off semi-final i final. Ekipo Sigi Hunga parse lo sigi den Beisbòl Liga 50 i tin kandidato pa tuma over si Moises Zimmerman no sigi atendé ku e ekipo. Ekipo Otrabanda lo bini fuerte den 50 i 40. Hopi hungadó di Artemisia lo bai yuda Otrabanda tantu den 50 komo 40.
