Lesadonan di Deporte Kòrsou, bon dia. Durante Konferensia di Prensa di djaweps mainta a kanselá tur evento deportivo di grupo. Fundashon Akademia di Beisbòl Brievengat a suspendé e torneo tradishonal (FABB) ku nan tin. Ta di dos aña konsekutivo ku nan ta suspendé e torneo ku ta e warm-up di Beisbòl Minor League i Little League. By the way, basta hóben ku mester a kumpli nan 11 i 12 aña den añanan 2020 i 2021 no por a hunga den region i lucha pa nan por yega e soño di tur Little League, esta yega Williamsport. Ya .. no tin moda di hasi, e Covid-19 a kambia hopi kos mas den bida di hopi hende, tantu hóben komo adulto. I lo mas ekstremo… hopi hende a fayesé rònt Mundu.
* * * * *
Na komienso di e aña aki nos a skibi algu di e selekshon Senior ku a bira kampion di Mundu na 2002. Tabata nos promé selekshon ku a bira kampion di Mundu. Nos a menshoná algun nòmber, pero no a menshoná tur. Nos a skibi di Jair Jurrjens i Shai Martis ku despues a bira Big Leaguer. Tambe di Wecho Schoop ku a yega leu den profeshonal i hopi aña den selekshon di Hulanda. E otro hungadónan tabata Arschwin Asjes ku a hunga den selekshon di Hulanda, studia i gradua den College na USA. Curt Smith a hunga den College na Maine, gradua riba nivel Bachelor i despues Master. Eldrion Regina (fokus) i awor General Manager di Marchena Braves. Eugene ‘Gino ‘Offerman tambe a logra su Bachelor i Master na USA. Eugene tin Bachelor den Ekonomia i Master den ‘Financial & Actuarial Engineering’ i mas título riba nivel Master. By the way, Regina tambe a studia na Universidat na USA. Gino Offerman ta bèk na Hulanda aworaki despues ku ela biba, traha i studia algun aña na Belgika.
* * * * *
Mas hungadó di e selekshon ta Flanneray Cosster, prospekto grandi foi den Little League. Tremendo picher slengu i gran batiadó di poder. Nan a tep Flanneray komo e sigiente Diegomar Markwell. Shuremi ‘Bouncer’ Fornerino ku a firma profeshonal ku Marlins. Hainley Statia èks profeshonal den entre otro Angels i Milwaukee i aworaki ku funshon di coach di infield pa henter e organisashon di Los Angeles Angels. Jair Jurrjens nos a menshoná ku a yega MLB den gran forma ku Detroit i despues a pasa pa Atlanta Braves i bai All Star Game. Rubinet Koko, tambe a studia riba nivel haltu i tin basta aña na Hulanda.
* * * * *
Sedwin Walle na Hulanda despues di a hunga Beisbòl na Kòrsou algún aña. Sevard ‘Chollie’ Seferina ta laborá na SVB, Shairon Martis ta profeshonal den selekshon di Hulanda i èks Big leaguer ku a subi ku Washington Nationals. Ludwin Obispo tambe a firma profeshonal i despues a hunga Beisbòl na Hulanda i na Kòrsou. Ainda Ludwin Obispo ta aktivo den Beisbòl Dòbel A na Kòrsou. Manager di e selekshon ei tabata Payo Faneyte asistí pa coachnan Norwin ‘Sor’ Moesquit i Percey Lebacks (QEPD.) E selekshon a bira kampion Mundial dia 17 di ougùstùs 2002 ku un viktoria di 8 pa 4 riba US South. Flanneray Cosster gran picher slengu e tempu ei tabata picher ganadó di e wega final.
* * * * *
Den luna di yüli/ougùstùs nos lo bini bèk riba e selekshon aki ku a marka historia i mayoría a firma profeshonal òf a hunga Beisbòl despues na USA den High School i College. Tremendísimo, kòrda ku meta i filosofía di Little League ta pa krea lidernan den futuro i suidadanonan ehemplar den futuro. Hasi bo bèst na skol i bira un suidadano ehemplar. Alkansá nivel haltu den estudio òf bira un Big Leaguer tambe ta kompletu naturalmente.
* * * * *
Un ratu den Slowpitch. Moveshonnan a sigi pa Torneo Hope 2021, ku lo keda organisá pa Fundashon Van Engelen Ballpark. Nos a bai bèk den tempu ku algún ekipo ku no ta drei mas, entre otro SIAH ku ta Servisio di Impuesto di Antia Hulandes. E tempu ei tabatin entre otro Renato Da Costa Gomez nan aki den e tim. Polis Femenino ku tabata hasi furor, Building Depot tambe tabatin un ekipo den Femenino Soshal. BZV tambe a hunga den Torneo Hope, e tempu ei ainda Torneo SBAB. Den Beisbòl Dòbel A kos ta pega ainda entre Ruderly i Royal Scorpions. Famia Jansen, Kenley i Archie ta kasi tur dia huntu ku Ruderly. Nos ta keda te aki pa awe. Bai poko poko. Kuida! Toke de Keda a bira 10’or.
