Fanátikonan di Deporte Kòrsou, bon dia. Moveshonnan a sigi den Beisbòl Dòbel A pa haña hungadó nobo pa ekiponan. E asuntu di Ruderly Manuel no ta kla ainda i e estelar picher di Royal Scorpions falta un aña mas. Dirigentenan di Wild Cats a bisa ku no tin nada sigur ainda i ku Ruderly ta train ku Kenley i Archie Jansen pa drecha algún kos di su picheo. Pero remarkabel ta ku Ruderly a pidi retiro di Royal Scorpions i ta interesá pa hunga den Wild Cats temporada 2022. Nos a risibí informashon ku Royal Scorpions a laga lòs pero tin algun asuntu mas pa atende via FEBEKO i Ruderly ku dirigentenan di Royal Scorpions. Kosnan ta kayente ruman. Otro kambio hopi komentá ta e moveshon di Ildion Martina, kècher di Santa Rosa ku ta rumbo pa Royal Scorpions. Parse ku Ildion a bai Aruba ku su muchanan di Little League di Sint Michiel na komienso di òktober 2021 i Santa Rosa Indians mester a hunga wega number 4 di play-off.
Santa Rosa Indians i Royal Scorpions a enfrentá otro den play-off semi-final. Dia 26 di sèptèmber, riba un djadumingu, den e promé wega di play-off semi-final, Santa Rosa a nòkout Royal Scorpions 12-2. Ildion tabatin un doblete klave for di den promé inning pa pone e wega riba eis. Ildion a empuhá 4 kareda den e wega ei. Royal Scorpions a gana wega number 2 ku skor di 7 pa 6 i wega number 3 ku skor di 5-4. Ildion a partisipá den wega number 1, 2 i 3 i wega number 4 Ildion Martina a move pa Aruba ku su ekipo di Sint Michiel (Little League). Santa Rosa Indians a pèrdè wega number 4 ku skor di 10 pa 2 i Ildion no tabata presente. Ayron Gijsbertha tabata kècher na lugá di Ildion Martina den wega number 4. E biahe di Ildion pa Aruba no a kai den bon tera parse serka dirigentenan di Santa Rosa. En todo kaso Ildion ta direkshon pa Royal Scorpions i kècher di Royal Scorpions Terrence Goeloe ta rumbo pa Santa Rosa. Un ke otro parse un ‘straight deal’ di kècher pa kècher i tur hende ta kontentu.
* * * * *
Nos a risibí bon reakshon riba e artíkulo di djabièrnè kaminda a bai den detaye riba hungadónan di selekshon di 2002 ku a bira e promé kampion di Mundu den Beisbòl di Kòrsou. Espeshalmente e detayenan di estudio kaminda vários hungadó di e selekshon a logra ‘Scholarship’ na USA i despues logra un título di bachelor òf master. Tin ku a logra kaba High School tambe i despues firma profeshonal. Bispu di aña nos tabata huntu ku Curt Smith i Hensley Meulens na Bam Bam Tech Sports Zone. Curt Smith a bisa ku na USA espeshalmente na Bangor, dirigentenan ta hopi interesá den bon peloteronan ku bon estudio pa drenta College. Nòmbernan menshoná tabata Allen Hollander i un prospekto Schoop (yu di Sherwin i Neysa) di Junior League.
Ban bèk pa Beisbòl riba nivel Dòbel A. Nos ta sinti falta pa basta aña di kompetensianan entre Kòrsou i Aruba riba nivel di Beisbòl Dòbel A. Ta riba nivel di Little League i e aña aki interkambio di RBI League lo bai tin kompetensia. Antes tabatin hopi interkambio deportivo entre islanan di Antias. Nos ta kòrda Kopa Antiano di Beisbòl entre Aruba i Kòrsou. Marlboro di Aruba i Eli Kock i despues Maro Irasquin kontra Kòrsou ku Antonio Keller, Willy Pietersz (QEPD), Wenny Jacoba, Rumannan Kirindongo ets. Despues Santa Maria i Santa Rosa, Wild Cats tambe a hunga algún kopa Antiano entre Kòrsou, Aruba i Sint Maarten. Tempunan bon. Ta Kopa ABC&S di Sòftbòl so a keda riba un base regular ku e kompetensianan aki, hopi great. I mas o ménos 20 aña pasá a start ku Liga 40/50/60 ABC tambe, master
* * * * *
Algun siman pasá nos a papia ku Aldo Zuininga, èks pelotero ku a bini for di Sint Maarten na edat hóben. Na final di añanan 70 vários pelotero mas tabata bini Kòrsou pa estudio òf trabou. Havo, MTS ets. Bob van de Mark, Gensley Balborda i Destrey Raymond. Gensley Balborda tabata un kos serio ku e bate den Blue Haws i despues Royal Scorpions. Bon poder mes na bate. Despues den Sòftbòl ku Gasora Giants, ekipo di KAE i Aqualectra, temibel na bate. Gensley tei ainda den ekipo di Lions 60+ ku resientemente a bai sera aña na Aruba. Papiando di biahenan deportivo, keda pendiente pa Dream 2 Reality Travel Agente ku tin algun package kampion pendiente pa deportistanan i nan famia. Hendenan ku ta gusta biaha ku deporte i wak weganan di entre otro MLB, e promé biahenan lo ta alrededor di 2 di yüli. Fin di yüli te ku promé siman di ougùstùs tin biahe di 9 anochi na Republica Dominicana, Samana-Puerto Plata-Santiago - Barahona, San Cristobal. Tin tour tambe speshal pa Boston Red Sox vs New York Yankees. Fanatikonan na Aruba Kòrsou, Boneiru, Sint Maarten i Hulanda, keda pendiente. Nos ta keda te aki pa awe.
