Fanátikonan di Deporte Kòrsou, bon dia. Interes ta grandi for di Aruba pa partisipá den Torneo Wim Felicia ku lo tuma lugá dianan 1, 2 i 3 di yüli na Kòrsou. Ekiponan Kibaima di 40+ i Astros 60+ a mustra interes i nan ta pendiente pa mas detaye pa kuminsá hasi nan tramite pa ta na Kòrsou riba e fechanan menshoná. Ban spera ku nos lo sali for di e pandemia Covid-19 aki mas pronto posibel. Miéntras tantu tur torneo- i moveshonnan di Sòftbòl i Beisbòl ta wantá. E temporada aki ta momentu di Torneo Survivors i promé ku esei Torneo Kopa Joy Alberto, Torneo Union Komersial ets. Dia 27 di yanüari lo wak atrobe debí ku a alargá e ‘time out’.
* * * * *
E dos ekiponan di Klase A a wanta un ratu. Ta trata di The Champs i ekipo Royals Magic di Suffisant. E dos ekiponan aki por djòin i traha un ekipo pa kompetí fuerte den Klase A. Jedrek Magdalena presidente di FEBEKO a konfirmá pa nos ku tur dos ekipo a manda karta pa anunsiá ku nan lo no partisipá mas. Deporte kòrsou a tene un entrevista amplio ku dirigente di e dos ekiponan. The Champs tabatina chèns subi pa Dòbel A temporada 2021. Ta hopi tempu pasá un ekipo di Klase A a subi pa Dòbel A. E último ekipo ku a subi pa Dòbel A tabata ekipo Curacao Yankees di Oscar Bolivar ku despues a bira Firebirds.
* * * * *
Tin indikashon fuerte ku e kècher estelar di Santa Rosa Indians riba nivel Dòbel A lo no bai niun kaminda. Den e dianan benidero direktiva di Santa Rosa Indians lo sinta ku Ildion Martina pa papia riba e impase ku tabatin i drecha kosnan. Fanátikonan di e ekipo ta kere ku e reunión lo no dura hopi i Ildion Martina lo keda ku Santa Rosa pa temporada 2022. Santa Rosa a solushoná e problema ku Ildion Martina i nan ta pendiente pa wak un picher mas huntu ku Jordan Lucas, Siamani Boekhoudt, Hershelon Juliana, Jerryson Beaumont, Marvin Loduwika, Christopher Petronilia, Cezan Rafalea i Mark Hennep. Santa Rosa a haña Jeremy Lucas ku ta ruman di Jordan Lucas ku por yuda kue algún inning. Jeremy ‘Loko’ Lucas no a picha den 2021 ku Royal Scorpions i tabata mas bien den plan di coach.
* * * * *
Kedando den Beisbòl Dòbel A, hopi Cubano ta interesá den hunga Beisbòl riba nivel Dòbel A na Kòrsou. Nan ta hasiendo e kontaktonan pa wak ku nan por haña ekipo. Antes tabata muchu mas difísil pa un Cubano sali for di su pais i bai traha den eksterior. Ultimo añanan esei ta posibel. Den farandula i den konstrukshon tin algún Cubano aki na Kòrsou. Antes nan tabata traha den Curacao Dok Maatschappij ku awor a bira Damen. Nan por bin traha aki i hunga Beisbòl. E persona di kontakto tei na Kòrsou i ekiponan lo buska moda di haña Cubano, espeshalmente picher. Pero ya mester kambia e reglanan pa estranheronan por hunga bèk den Beisbòl di Korsou. Boso ta kòrda e wega final kandela entre Kòrsou i Cuba dia 3 di yüli 2021 den Tio Daou Ballpark. E Cubanonan aki su nivel ta hopi haltu. Nos mester a hunga un wega bon i bati oportuno pa nos por a gana di Cuba.
.
* * * * *
Den e buelta regular di e torneo di Karibe ei Cuba tabata invikto i nan a bin pèrdè den e wega final. Cuba tabata lider den kasi tur departamentu ofensivo. E tersera base Quesada Pedroso Pavel Rafael a kima liga batiendo .750 den e buelta regular ku 2 homerun i 12 RBI den 4 wega. Den wega number 5 nos ta kòrda e picheo di Kòrsou a dominá e tremendo hungadؚó aki. En todo kaso Cubanonan ku tabata na Kòrsou tin interes pa bin partisipá den e kampionato Dòbel A na Kòrsou i e chèns tei, basta nan kana e kaminda legal manera yena papel di visa i otro detayenan. Tin un embahada Hulandes na Cuba, pero ya mester kambia e reglanan di FEBEKO.
* * * * *
Nos a bai bèk den tempu tantu di Beisbòl Veterano komo Liga Amistad. Beisbòl Veterano tei ketu bai i den gran forma, miéntras Liga Amistad no ta eksistí mas. Na 2011 tabatin ekiponan manera GGD, Revelation Stars, Brievengat Boys, Magic, ets. Revelation Stars tabata kampion na 2009 i 2010. Ekipo fundá pa Wim Felicia. Den Beisbòl Veterano nos a dal den un pòtrèt di Edmar ‘Boy’ Motor Cornelia, e tempu ei ku The Bears. Boy tabata lider di homerun di Beisbòl Veterano dos temporada sigi, 2010 i 2011. Na 2011 Renato Anasagasti (Bulldogs) a bira kampion bate ku .581, Sedeney Loruens (The Bears) kampion picher ku 7-0 i Boy lider di homerun. The Bears a titulá kampion riba Vosama e aña ei.
