Fanátikonan di Deporte Kòrsou, bon dia i felis siman. Ildion Martina ta ketu bai entre Santa Rosa Indians i Royal Scorpions. Fuentenan di Santa Rosa ta sigur ku e kècher Ildion Martina lo keda, di otro banda esnan di Royal Scorpions ta pensa ku Ildion mester firma so ta klá. Tene kuenta ku Ildion a pasa su 3 añanan ku Santa Rosa, ke mèn e ta liber. Santa Rosa ta hasiendo lo máksimo esfuerso pa firma Roderick Bernadina di Royal Scorpions tambe. Roderick Bernadina lo por hunga primera i outfield. Si Ildion keda, elo kompartí primera i kètcher ku Terrence Goeloe. Ayrton Gijsbertha pa motibu di trabou lo no por tei tur ora. Goeloe tambe tin dia ku e no por yega tur ora.
* * * * *
Djasabra siman pasá algún Yu di Kòrsou a firma ku ekiponan di Major League Baseball. Esun ku mas a hala antenshon ta e shortstop Mairoshendrick Martinus, yu di Mairon Martinus i Popi Mutueel. Mairoshendrick a firma na República Dominicana huntu ku su mama i Mairon Martinus a firma na Kòrsou na ofisina di notario Kleinmoedig & Alexander. Mairoshendrick ta prosedente di e organisashon di Sint Michiel Sharks dirigí pa Errol Cova, ku coachnan Edmar Cornelia, Gregg Juliana, Win Benita, Ildion Martina i demas coachnan. Mairoshendrick alias Mairo ta un dje tòp prospektonan di Kòrsou ku tabata klá pa firma e aña aki. Pabien na Mairoshendrik i henter famia Martinus, Mutueel i Delanooi. Djasabra awor tin mas firmamentu di hungadó-nan prospekto di Kòrsou.
* * * * *
Den Slowpitch i Beisbòl no tin masha moveshon. Pitufos a kuminsá move ku su Liga 60 kaba i nan ta interesá den hunga torneo pa nan kue forma. Interes pa torneo Wim Felicia ta grandi na Aruba. E torneo lo tuma lugá dianan 1, 2 i 3 di yüli na Kòrsou. Nos ta kòrda ku na 2006 Wim Felicia a organisá un torneo na Boneiru. Tabata un homenahe na Juvenal Merced. Juvenal tabata un super star den Sòftbòl Faspitch i den Slowpitch tambe naturalmente ku ekipo Veteranos. Boso ta kòrda tempu di rivalidat formal entre Swift i Veteranos den añanan 80 na Suvek Ballpark. Juvenal tin basta aña na Boneiru. Segun nos for di aña 1993/1994 mas o ménos Juvenal ta na Boneiru, te ku ela baha ku penshun mas o ménos 5 aña pasá.
* * * * *
Masha tempu nos no a mira un torneo stail di Kampion de Los Kampiones. Un tempu Johnny Isabella tabata organisá Kampion di Los Kampiones i despues Pim Fangman a organisá Super Cup. Pero masha tempu nada kaminda e mihónan tabata bai topa otro. E tempu di Kampion de Los kampiones tabatin hungadó ku a sali kampion den mas ku 2 ekipo. Tabatin kampion di Liga Trai Seru, Van Engelen, Liga Amistad, Liga Un i Tur, Liga Banana, Liga Koktel. Na 2005 Cicoza a sali kampion riba Bombers ganando 12-11 riba un djarason anochi bou di lus na Muzienberg Ballpark. Cicoza di Ryan Isebia a gana un kopa i 1000 florin kèsh serka Pim Fangman komo representante di Amstel. Tabata e Kampion de Los Kampiones di kampionnan di 2004 naturalmente.
.
* * * * *
Aworaki ta Beisbòl Veterano, Liga 50 i Liga 60 ta manda. Ke mén, ta e hungadónan ku den aña 70, 80, 90 i komienso di 2000 tabata pone espektákulo den e Slowpitch. Final di Beisbòl Veterano kargá ku fanátiko, Liga 50, Liga 60. Aworaki ta dos liga di e hóbennan a sobra ku ta Liga van Engelen i Liga Amstel. Den e kolumna aki nos a skibi di 6 liga ku tabata eksistí. Mester bisa ku Liga Komersial a kue merkado pisá huntu ku ekiponan di bario òf di amigunan den Soshal manera Libu stars, Chonchies di Dominguito i otronan.
* * * * *
Informashonnan ta skars naturalmente. Nos si ta sigi move i un fuente a bisa nos ku mayoría di e hungadónan di The Champs a pasa pa Marchena Braves riba nivel di Klase A di Beisbòl. Via Facebook nos a sigi un entrevista hopi kòrtiku ku èks presidentenan di FEBEKO. Nan ta mira kambio difísil, kaminda lo bo haña resistensia. E statutonan mester kambia i timnan no ta pendiente pa kambio i ta timnan mester aprobá e kambionan. Pronto por spera un entrevista mas amplio ku e èks presidentenan i e presidente aktual.
