Santa Maria Pirates vs Quality Stars djasabra den Round Robin Beisbòl Veterano
WILLEMSTAD — Ekiponan Santa Maria Pirates i Quality Stars lo topa otro djasabra 10:30 den playoff Round Robin di Beisbòl Veterano na Vi Jansen Ballpark. Ta trata di e ekiponan supkampion i kampion di Beisbòl Veterano temporada 2026. E otro weganan ta 1:00 Santa Rosa Memories kontra Otrobanda, i 3:30 Volcano kontra Broncos. Tur djasabra tin 3 wega di Round Robin i na final e 4 ekiponan lo pasa pa e playoff semifinal. Nos tin e resultadonan di e weganan ku a tuma lugá djasabra último na Vi Jansen Ballpark.
Quality Stars 14, Broncos 2
Quality Stars a bati un total di 14 hit i no a kometé eror, miéntras ku Broncos a bati 6 hit i a kometé 6 eror. Pa Quality Stars, Rodney Michel a bati di 5-3 ku un doblete i 1 kareda empuhá, Raydel Isabella di 3-2 ku 2 kareda empuhá, Ringemar Raap di 3-2 ku un doblete i 3 kareda empuhá, i Ludwin Obispo di 3-1 ku un doblete i 3 kareda empuhá. Pa Broncos, Luigene Fluonia a bati di 3-2 ku 1 kareda empuhá. E picher ganadó tabata Xaviero Avastia kende a picha 5.0 inning permitiendo 5 hit i 2 kareda (2 limpi) ku 3 strikeout. E picher pèrdèdó tabata Jurien Martina kende a picha 4.0 inning permitiendo 7 hit i 9 kareda (3 limpi).
Sta Maria Pirates 11, Veteranos Otrobanda 1
Sta Maria Pirates a bati un total di 10 hit i no a kometé eror, miéntras ku Veteranos Otrobanda 40 a bati 4 hit i a kometé 3 eror. Pa Sta Maria Pirates, Ardley Jansen a bati di 3-3 ku dos doblete i 2 kareda empuhá, Rodreck Zimmerman di 2-2 ku 1 kareda empuhá, i Yurendell De Caster di 3-1 ku 2 kareda empuhá. Pa Veteranos Otrobanda 40, Winsley Ansano a bati di 1-1 ku 1 kareda empuhá i Vernon Bautisma di 2-1 ku un tripel. E picher ganadó tabata Myson Cathalina kende a picha 4.0 inning kompletu permitiendo 4 hit i 1 kareda (1 limpi). E picher pèrdèdó tabata Gilbert Bernadina kende a picha 0.2 inning permitiendo 3 hit i 4 kareda (4 limpi).
Sta Rosa Memories 11, Volcano 1
Sta Rosa Memories a bati un total di 7 hit i no a kometé eror, miéntras ku Volcano 40 a bati 2 hit i a kometé 2 eror. Pa Sta Rosa Memories, Andy Leer a bati di 2-2 ku un doblete i 1 kareda empuhá, i Dave Kirindongo di 3-1 ku un doblete i 1 kareda empuhá. Pa Volcano 40, Andres Gonzalez Lovera i Wendell Van 't Kruys a bati di 2-1 kada un. E picher ganadó tabata Roderick Eustatius kende a picha 4.0 inning kompletu permitiendo 2 hit i 1 kareda (1 limpi) ku 6 strikeout. E picher pèrdèdó tabata Wendell Van 't Kruys kende a picha 0.1 inning permitiendo 4 hit i 4 kareda (3 limpi).
Wak'e Kos 8, Sta Rosa Royals 3
Wak'e Kos a bati un total di 10 hit i a kometé 1 eror, miéntras ku Sta Rosa Royals a bati 8 hit i a kometé 2 eror. Pa Wak'e Kos, Luigi Yanez a bati di 3-2 ku 2 kareda empuhá, Eldred Estanista di 3-2 ku 1 kareda empuhá, i Amador Nita di 3-2 ku 1 kareda empuhá. Pa Sta Rosa Royals, Rolling Eustatius a bati di 4-2 i su ruman Roderick Eustatius di 3-1 ku 2 kareda empuhá. E picher ganadó tabata Amador Nita kende a picha 5.2 inning permitiendo 7 hit i 3 kareda (3 limpi). E picher pèrdèdó tabata Orsendo Clemencia.
MAS INFORMASHON DI SÒFTBÒL I BEISBÒL
Fanátikonan di Deporte Kòrsou, bon dia i felis wikènt. Awe ta selebrashon di Dia di Outonomia. Nos a mira un invitashon ofisial kaminda tin skibí Dia di Outonomia 2026. Selekshon di Little League di Kòrsou ku a bira kampion mundial na Williamsport a gana un premio komo e ekipo di e pais (region) mas chikí den historia ku a bira kampion di mundu. E premio ei ta bai den Guinness Book of World Records. Tambe e picheo ku e velosidat mas altu tirá den un partido final di Gendry Ryan tambe ta un rèkert. Entrega di e rekonosimenteu aki lo tuma lugá durante selebrashon di Dia di Outonomia entre 10:30 am pa 11:30 am na Plasa Brion na Otrobanda.
* * * * *
Kampionato di Beisbòl Little League ta stàrt fin di òktober. Un liga lo stàrt 23 di òktòber i otro liga ta stàrt dia 30 di òktober. E temporada a stàrt ofisialmente dia 1 di sèptèmber. Lo hunga den liganan Minor te ku Senior te ku desèmber, pa despues drenta e temporada di karnaval 2027 na yanüari. Despues di e temporada di karnaval ta start mesora ku e kampionato di Intermediate i lo tin tambe playoffs. Liga Soraida Juliana, Curacao Little League Softball ta stàrt despues di karnaval. Sedenan pa loke ta trata Beisbòl i Sòftbòl tambe ta konosí. Minor lo hunga na Puerto Rico, Little League lo hunga na Aruba, Intermediate lo ta na Guatemala, Junior na Mèksiko i Senior na Kòrsou atrobe.
* * * * *
Sedenan di Sòftbòl Little League lo ta na Mèksiko òf Puerto Rico. Pa novèmber te ku desèmber lo tin un torneo di Little League Sòftbòl. District Administrator Urny Floran a anunsiá den un entrevista ku tin algun organisashon ku lo ta bèk den Liga Soraida Juliana i esei ta yuda engrandesé e liga sigur i bai bèk na e gran kantidat di ekiponan ku tabatin den e añanan 2006 pa 2010, tempu di hopi ekipo den Curaçao Little League Softball, Liga Soraida Juliana. Tin un kambio den e direktiva di Curaçao Little League Softball, kaminda e grupo ku ya tabata den e direktiva a tuma over despues ku e presidente i dos miembro mas a tuma retiro.
* * * * *
Beisbòl Veterano ta sigi ku 3 wega di Round Robin djasabra na Vi Jansen Ballpark. E weganan ta 10:30 kandela entre Santa Maria i Quality Stars, 13:00 Santa Rosa Memories kontra Otrobanda i 15:30 Volcano kontra Broncos. Djadumingu tin e di dos wega di e seri Final di Liga 50 di Beisbòl Veterano entre Wak e Kos i Santa Rosa Royals. Wak e Kos a gana e promé wega di e seri mihó di 3 ku skor di 7 pa 3 djadumingu pasá. Un viktoria pa Wak e Kos ta nifiká ku e ekipo ta ripití e título di Liga 50 di Beisbòl. Wak e Kos ta di spònsor pa Rensley Martina (Pos Kabai) & Contractors i Ruth Cleaning. Moisés Zimmerman, fundadó i mènager di Wak e Kos, ta sigur di un otro título.
* * * * *
Liga 50 di Sòftbòl a manda e protesta ku Ban Serio a file di e wega kontra Baranka pa e Komishon di Protesta. Despues di e protesta mester mira kiko ta poné den e reglanan di Liga 50. Segun informashon ku nos tin, e desishon di Komishon di Protesta lo ta definitivo (bindend). Liga 60 ta sigi djadumingu awor despues di e eksitoso torneo Dutch Caribbean Master 60+ organisá pa Koala Bears di Hulanda. Weganan pa e wikènt benidero ta 11:00 Nos Power kontra Nos Tambe Por, 13:00 Los Amigos kontra Pitufos, i 15:00 Jaws kontra Curaçao Super Stars. E wega entre Los Amigos i Pitufos lo ta kandela debí ku ta trata aki di dos ekipo haltu den klasifikashon.
• * * * * *
E posishon (standing) promé ku e weganan di djadumingu awor ta: Pitufos 8-2, Nos Tambe Por 8-3, Lions 7-3, Los Amigos 6-3, Mon Repos Sluggers 5-6, Jaws 4-5, Baranka 4-6, Nos Power 2-9, Curaçao Super Stars 1-8. Lo tin dos djadumingu mas di wega di e kampionato regular i e playoff ta dia 1 di novèmber. E sistema di playoff ta Page System manera ta kustumber, kaminda ekiponan 1 kontra 2 i 3 kontra 4 lo hunga un sèri di un wega. Despues ta sigi e semifinal i e playoff final lo ta un sèri di 3 wega. Nos Tambe Por ta kampion di 2024 i 2025 i Jaws tabata kampion na 2022 i 2023. Nos ta keda te aki pa awe i te mayan ku Poder di Dios.
