Fanátikonan di Deporte Kòrsou, nos tei manera kustumber ku informashon di Beisbòl i Sòftbòl. Den Beisbòl Veterano ekipo The Brothers a sigi move duru den buskeda di hungadó. Kelvin Winklaar a firma i ta parse ku su amigu Raymond Leonora si no a firma ainda. Parse ku Jair Josepha tambe ta den direkshon di The Brothers. Tabatin rumor ku Jair Josepha lo ta den direkshon di ekipo Isla Crackers. Dennis D’Arnault di Refineria Isla (Crackers) lo wanta un ratu ku Beisbòl 40+ i lo bai dediká na Sòftbòl 50+ den su ekipo Lions. Raynold ‘Payo’ Anderson di ekipo Quality Stars ta rumbo pa Azucar ku ta drechando nan tim formal.
* * * * *
Un grandi di Bulldogs lo stòp i lo move pa eksterior. Un hungadó di promé ora di Bulldogs ku tei tur ora. E fuente no kier a menshoná e nòmber, pero nos ta suponé ku ta un tremendo outfielder di e ekipo di Denley Marten. Fuera di moveshonnan den Beisbòl, den Sòftbòl 50+ tin basta moveshon i ekiponan ta tirando liña den awa di ekipo Ban Serio ku tabata e super kampion promé ku Baranka bira kampion. Ban Serio tabatin 3 titulo sigí i 5 total te ku 2019. 2020 no a lgora terminá e kampionato i na 2021 ekipo Baranka a bira kampion. Apesar ku Baranka a bira kampion, nan ta duru tras di dos infielder di otro ekiponan di 50+.
* * * * *
Dia 27 di yanüari 2022 nos lo tende atrobe kiko ta bai pasa ku torneonan, entre otro Amstel Bright i Torneo Hope 2022. Djaweps 27 di yanüari ‘Opperbevelhebber’ sr. Gilmar Pisas lo anunsiá kiko ta bai pasa. Nos ta bai bèk den tempu un ratu di Torneo Hope ku ántes tabata Torneo SBAB. CITCO, un dje super kampionnan di Torneo SBAB/Hope tabata tremendo tantu riba nivel femenino komo maskulino. Nos ta kòrda ekipo CITCO ku nan picher estelar Mona Beukenboom den femenino. Hungadónan manera Shendy Cras, Patrick ‘Chape’ Elisa, Gerrel Leonora, Mayron Clara, Stanford Landburg, Wendel Sint Jago, Andy Nicolaas, ets. Tabatin ekipo di Coopers & Lybrand, ekiponan di Karnaval manera Ate, Lecim, Taki Tin di Ryan Hollander i demas famia Hollander i Francis Hoyer.
* * * * *
Den Sòftbòl Liga 50 nos tin algún moveshon ku ta tumando lugá. Parse ku Marlins lo bai pèrdè dos outfielder. Unu ta bai su ekipo bèk i e otro ta bai serka su amigunan den un otro ekipo. Marlins tin bista riba algún picher bon ku ta práktikamente klá pa djoin e ekipo. Ban Serio parse lo keda mesun Serio i lo haña outfielder i picher. A tira liña riba dos infielder di Ban Serio, pero tur kos a keda reglá i Ban Serio lo keda ku mayoría hungadó. Ekipo Flamboyan/Tigers òf Tigers/ Flamboyan a kuminsá ta sera kurá i lo keda sólido pa temporada 2022.
* * * * *
Pa loke ta Beisbòl Dòbel A, hopi interes entre e 3 ekiponan grandi di Beisbòl pa e hungadó Dennis Gustina. Dennis ta un outfielder ku tremendo spit den defensa i na base. Dennis ta centerfielder estelar den Royal Scorpions despues ku e tabata estelar den Santa Maria Pirates pa basta aña. Santa Maria tin interes, Wild Cats tin interes i Royal Scorpions tambe naturalmente. Dennis Gustina a bati .276, hungando 22 wega den 2021 i tabatin tremendo defensa atrobe den centerfield. Nos ta bai drenta den kontakto ku Dennis den e dianan benidero pa sigi e desaroyonan.
