Fanátikonan di Deporte Kòrsou bon dia i felis siman. Sòftbòl Slowpitch a ranka sali duru den wikènt pasa ku masha hopi wega mes den Torneo Amstel Bright na Van Engelen Ballpark. For di djabièrnè te ku djadumingu tabatin akshon riba tereno. Ekipo SBAB, un dje super ekiponan di tur tempu den Torneo Soshal a dal Douane duru ku skor di 22 pa 2. Tabata e promé wega di e sekshon Soshal djabièrnè 4 di mart na inisio di e torneo. Den Liga 50 tabatin akshon riba djasabra i djadumingu kaminda ekiponan Ban Serio i Baranka a gana den nan promé wega. Ban Serio a dal Artemisia 14 pa 6 den e promé wega di 50+ i despues Baranka a gana Sluggers. Weganan di djabièrnè 11 di mart a keda suspendé debi na palu di awaseru i mal estado di tereno. Weganan di djasabra (awe) i djadumingu ta pendiente pa sigi normal.
* * * * *
Hungadónan manera Farley Lard i Ramon Cabrera a debutá pa Ban Serio i tur dos a picha den e wega menshoná kontra Artemisia. Baranka a nòkout Sluggers mustrando ku nan ta mesun serio manera tabata e kaso den 2021. Baranka ta aktual kampion di Liga 50 despues ku Ban Serio a komandá den Liga 50 komo kampion 3 aña sigí. Nos a risibí informashon ku Lions mester a sorprendé Pitufos den wega number 3 di Liga 50 di djasabra. Den Liga 50 tin 9 ekipo i 8 lo klasifiká. Ké mèn, un ekipo ku 0 ganá i 2 pèrdí tin chèns di klasifiká tòg.
* * * * *
Varios kambio ta bai tin den 50+ di Sòftbòl ku ta birando mas popular tur aña. Algun ekipo a tira riba Reinaldo Casimiri, kècher di Ban Serio. Casimiri a bisa flèt ku e ta kasá ku Ban Serio i no ta bai laga e ekipo. Varios ekipo ku interes den Sherton ‘Sato’ Saturnino ku a debutá den 2021 ku ekipo Ban Serio. Fabiani Orcardio tambe ta agente liber. E ekipo mas aktivo den búskeda di hungadó ta Pitufos, debí ku varios hungadó di nan lo bai hunga 60+ so na Frank Curiel Ballpark den Liga 60. By the way, dos siman pasá e
entrega di unifòrm di ekipo Los Amigos a tuma lugá na kas di Ingemar ‘Maal’ Jonis.
* * * * *
Torneo Warm-up di Beisbòl Veterano The Brothers ta start 19 di mart na tereno di Bonnam. E torneo lo dura entre 3 pa 4 siman, dependé kuantu ekipo ta partisipá na e torneo. Nos tin varios informashon den Beisbòl Veterano, entre otro ku Stanford Landburg a bai Isla Crackers bèk. Stanford a debutá ku Isla Crackers den 2020 i na aña 2021 ela bai Santa Maria Pirates i bira kampion. No ta konosí ainda kon a sigi ku Dave Kirindongo ku tambe ta agente liber. Dave Kirindongo tambe tabata ku e ekipo kampion di Beisbòl Veterano 2021, Santa Maria Pirates.
* * * * *
Ekipo di Sòftbòl Femenino Veterano, Nos Goso ta invikto den The Diamond All Stars League ku rekòrt di 4-0 promé ku e weganan di ayera. Rising Trotters tambe ta invikto ku mesun rekòrt 4-0. Lider den bateo di The Diamond Stars League 2022 ta Paulina di Rising Trotters ku un average di .727. Emily Jonis ta lider den picheo ku un ERA di 0.00. Emily ta lider den homerun tambe ku 3 homerun. Djasabra Emily Jonis a bai di 2-0 i su averahe a baha di .800 pa .571. Jonis ta lider den RBI tambe ku 8 empatá ku Tanusi Delando i Chaunise Maduro.
* * * * *
Organisadónan di Torneo Hope a manda e reglanan pa ekiponan. Despues di e reunión ku a tuma lugá djaweps último a bai bèk na e reglanan di kustumber ku algun kambio chikitu. Ta bai tin 6 kategoría. Femenino Soshal, Maskulino Soshal, Maskulino Challenger, COED, Maskulino 40+ i Maskulino Soshal Plus. Interesante pa sa si un hungadó di 40+ por hunga den 40+ i den Soshal i den COED tambe. Antes e hungadó por hunga den su ekipo Soshal Maskulino òf Challenger i alabes den COED tambe. Segun nos ora ta trata di 40+ i COED, e hungadó mester por hunga den 2 ekipo di su kompanía. Ké mèn 40+ i un ekipo mas. Si 40+nan no por hunga den COED òf den Soshal, esaki lo suak e ekiponan pa loke ta trata kantidat di hungadó. No ta e intenshon pa defolt kai den Torneo Hope. Na Sint Maarten a start ku kampionato di Beisbòl Dòbel A. E Liga yama Pelican League ku partisipashon di 4 ekipo. Nos ta keda te aki pa awe.
