Lesadónan di Deporte Kòrsou, bon dia i felis wikènt. Nos tei atrobe ku informashon di Sòftbòl Slowpitch i Beisbòl Veterano. Nos a risibí informashon ku Liga 50 ta sigi normal i nos tin e skèdjel pa nos lesadónan.  Den Beisbòl Veterano tin kandela entre Jandoret Raiders i ekipo Vosama djasabra mainta tempran. Ekipo Vosama a duna kátedra di Beisbòl kontra ekipo Quality djadumingu último. E wega a keda empatá na 2 kareda i por spera un wega fèrfelu atrobe di ekipo Vosama. Saludo pa Stanley Palm ku despues di varios wega a presentá bèk ku Vosama i konektá un flai di sakrifisio krusial den e wega pa kareda number 2 di e wega.

* * * * *  

Djadumingu den Beisbòl Veterano tin Quality Stars vs Azucar. Ekipo Azucar ta den gran forma den 2020 ku Elton John Sophia komo presidente i Roque Bernadina komo manager. Algun siman pasá na Tio Daou Ballpark ekipo Azucar a zona un kampanaso kontra di ekipo Bulldogs. Ekipo Azucar tin chèns grandi pa klasifiká i lo presentá fuerte. Pa 1’or tin Santa Rosa (5-2) vs Santa Maria (4-3) i ya nos a propagá e wega ei den e kolumna anterior. Dos ekipo ku ta kandidato fuerte pa kai den e promé 6-nan atrobe. Ekiponan pa klasifiká ta Quality, Isla, Jandoret, Santa Rosa, Santa Maria i Bulldogs. Ekipo Marchena Stars ta insistí ku e puesto number 5 òf 6 ta di nan, pero weganan ta bai i Marchena no ta mustra konvinsente manera nan ta riba papel i a base di weganan ku nan a hunga durante kampionato.

* * * * *

Den Liga 50 tin 4 wega djasabra na Suvek Ballpark. Standing di Liga 50 ta bastante pèrtá i siman pasá djabièrnè nos tabatin detaye i awe nos lo pone e standing atrobe. Kòrda ku djasabra siman pasá no tabatin wega. Jaws 4 – 2,  Flamboyan Tigers 4 – 3, Marlins 4 – 3, Artemisia 3 –2, Ban Serio 3 – 2, Baranka / Sharks 3 – 3, Catpower 2 – 2, Pitufos 2 – 3, Mon Repos Sluggers 2 – 4 i Lions 2  – 5.

* * * * *

Sluggers vs Jaws. Jaws ta na promé lugá i ta kandidato fuerte pa klasifiká atrobe. Ekiponan ku a klasifiká temporada 2019 ta Ban Serio, Pitufos, Marlins i Jaws. Nan tei fuerte pa klasifiká atrobe, pero ekiponan manera Artemisia i Baranka/Sharks ta mustra fuerte i por hasi fèrfelu den e buèlta number 2, kaminda ekiponan lo bai hunga den pul. En todo kaso Liga 50 ta bai dor normal djasabra awor bou di reglanan estrikto.

* * * * *

Riba petishon di esnan ku ta operá e tùnel ku ta Yubi Evertsz (560-0943) i Chal van Thijs (517-5049) nos tin detaye di e evento. Bati den Tunnel Yubi Evertsz dia 5 di sèptembèr i gana premio.  Yubi Evertsz Batting Tunnel tin un tremendo aktividat djasabra 5 di sèptèmber 2020 den e tùnel pa por haña fondo, pa por mantené e tùnel aki. E “4th Best Target Hitter Event” aki ta tuma lugá mayan, djasabra 5 di sèptèmber 2020 di 4’or pa 7’or pm  di mèrdia na e vèlt di Maracana, nèt pariba di Blue Bay òf tambe pegá ku Finca Piscadera.

* * * * *  

Liga 50 ta sigi pero ku varios introdukshon. Den reunion di djarason a disidí ku lo sigi normal, pero ku  uso di mondkapjes, mantené distansia, ets. Evita aglomorashon tambe no ta fásil, pero mester siña biba ku e normal nobo. Ata e reglanan aki kompletu: “Kontinuashon weganan di Liga 50. Pa medio di e mail aki direktiva L-50 ta partisipá na tur ekipo, ku despues di a reuní ayera, despues di a papia ku outoridatnan kompetente di gobièrnu i analisá tur pro i kontra, a yega na e konklushon ku weganan di Liga 50 ta sigi normal segun skèdjel.

* * * * *