Fanátikonan di Deporte Kòrsou, bonochi. Nos tei atrobe kargá ku informashon di Sòftbòl Slowpitch i Beisbòl Veterano. Ekipo Santa Rosa Memories fuertemente reforsá a gana di Curacao Legends ku skor di 10 pa 5 den e wega final di e torneo di Reino di Beisbòl Veterano. Bon públiko pa mira e wega final ku a tuma lugá na Tio Daou Ballpark. Tur wega a tuma lugá na Tio Daou Ballpark kuminsando for di djaweps te ku djadumingu. Na 2018 e weganan a start na Tio Daou Ballpark i bai terminá na Vi Jansen Ballpark. E final tabata na Vi Jansen Ballpark, pero naturalmente e torneo aki tabata un fundraising tambe pa e ekipo Curacao Legends ku ta organisadó di e torneo.
* * * * *
Beisbòl Liga 50 ta sigi djadumingu awor ku dos wega na Vi Jansen Ballpark. Pa 10.30 Vosama lo topa ku Sigi Hunga i pa 1’or Jandoret Raiders lo midi forsa ku Yesterday. Liga 50 di Beisbòl ta den fase final. 2021 tabatin 5 ekipo den Liga 50 di Beisbòl Veterano i pa 2022 lo bira por lo ménos 8, segun informashonnan ku nos ta risibí. Varios kambio na kaminda den Beisbòl Veterano pa loke ta trata temporada 2022. Ekiponan ya a kuminsá mobilisá riba hungadónan. Skibiendo di Liga 50 nos ta anunsiá play-off di Liga 50 di Sòftbòl ku ta bai bira kayente.
* * * * *
Play-off di Liga 50 lo ta djasabra i djadumingu na Van Engelen Ballpark. Djasabra 13 di novèmber pa 11’or Baranka lo topa ku Ban Serio den wega kandela ruman. Despues ta sigi Lions vs Pitufos 2’or. Djadumingu Pitufos lo topa ku Lions pa 10’or i pa 12’or Ban Serio lo topa ku Baranka. Si 1 òf tur dos seri splet, lo hunga e sigiente djasabra 20 di novèmber na mesun orario. Tambe direktiva ta pidi ekiponan pa yega tempran pa weganan por kuminsá na tempu. Djadumingu nos tin 2 wega mas di play-off. Kòrda ku e weganan ta bai 7 inning ku knockout rule na vigor segun nos reglanan. Direktiva ta deseá ekiponan den play-off i ta pidi bosnan laga rèspèt i disiplina resaltá den e weganan aki.
* * * * *
Den Liga 60 ekipo Jaws a empatá e seri final sensashonalmente djadumingu 7 di novèmber na Frank Curiel Ballpark. Jaws a gana Nos Tambe Por ku skor di 4 pa 2 i djadumingu awor lo tin e wega finalisimo di e seri final. Riley Toppenberg a habri pa Jaws i a bai 7 inning kompletu. Ekipo Jaws a nota 4 kareda di kual dos tabata shushi. Nos Tambe Por a nota dos kareda limpi kontra di ekipo Jaws. Play-offnan ta kayendo basta pareu. Wikènt benidero tin play-off di Liga 50 i tambe Liga van Engelen na Van Engelen Ballpark. Den dianan benidero nos tin mas promoshon i numeritonan di e wega di Liga 60.
* * * * *
Thrillers a bira kampion den Liga Amstel ganando di Cicoza ku skor 20 pa 5 i despues 14-13 respektivamente. E wega di 14 pa 13 tabata úniko. Cicoza tabata ganá 13 pa 2 den di 6 inning i 13 pa 4 den mesun inning ku 2 out. Thrillers ta nota total 10 kareda pa yega serka 13-12. Den e último inning den bòm di e di 7 inning, Thrillers ta nota 2 kareda despues di 2 out pa laga Cicoza den tereno i bira kampion. Despues di 3 out e rumannan Daal ta bòltu e skor. Argenis Daal ta dal hit pa left, Aldair Daal base por bola i Calton Daal ta dal hit pa left pa terminá e partido.
* * * * *
Djadumingu awor tin final di Liga van Engelen entre Swift i Navegantes. Swift ku picheo di Emilio Velarde Lugo ta gran faborito pa bira kampion pa di tantu biaha sigí. Despues ku Baranka a bira kampion di Liga van Engelen na 2014, segun nos niun ekipo mas no a logra bira kampion. Djadumingu 14 di novèmber pa 2’or tin e promé wega i 4’or lo tin wega number 2. Den kaso di empate e wega finalísimo lo ta dia 21 di novèmber. Nos ta keda te aki pa awe. Te mayan ku Poder di Dios.
