Informashon di delegashon di Kòrsou na Salvador
Natashon pa 29 yüni 2023
SAVADOR -E ekipo di natashon di Kòrsou, lo despedí di e kompetensia Sentro Amerikano i di Karibe 2023.
Esaki ta ekipo ku ta konta ku coach Reginaldo Brizuela, ku e 3 atletanan, landadónan Samantha van Vuure, Jaydon Loran i Kyra de Cuba, ku lo ta den akshon pa último biaha na El Salvador, riba djaweps dia 29 yüni 2023.
Lo bai ta tambe e último evento pa loke ta natashon na El Salvador, despues ku a inisiá djasabra último riba fecha di inisio di e gran evento, ku ta konta ku partisipashon di 36 pais, kompetiendo 53 disiplina di 37 diferente deporte.
Tim di tènis na kaminda pa El Salvador
E ekipo di tènis, ta e di 3 ekipo pa yega El Salvador pa Weganan Sentro Amerikano i di Karibe 2023, den representashon di Kòrsou.
Esaki lo ta riba djaweps dia 29 yüni 2023, ku buelo for di Miami. E tim di 3 persona, a sali Kòrsou djarason dia 28 yüni 2023 i a yega Miami bon, unda ku nan ta pendiente pa e biahe pa El Salvador.
Despues di yega djaweps dia 29 yüni, Kòrsou lo ta parti di e torneo ku ta inisiá djasabra 1 yüli, pa tèrminá djabièrnè dia 7 yüli 2023.
E tim di tènis, ta konta ku coach Nick van Rosberg i atletanan Aydan Gomez Osorio i Laurens Deelstra, ku ta kla pa saka kara di Kòrsou na e gran evento deportivo.
Riba e foto ku ta kompañá e komunikado aki, por mira e trio, algu promé ku nan a sali Kòrsou direkshon Miami i tambe na nan yega na Miami.
Beisbòl 28 yüni 2023
Selekshon di beisbòl di Kòrsou a logra nan di 3 triunfo na El Salvador. Esaki ta hasi awor ku nan tin 3 triunfo i 1 derota, den Weganan Sur Amerikano i di Karibe 2023.
Tereno di parke di beisbòl, Saturnino ‘Nino’ Bengoa, un biaha mas tabata esenario pa wega ku a inisiá 11’or di mainta na El Salvador, ku ta 1’or di trai mèrdia na Kòrsou, riba djarason dia 28 yüni 2023.
Esaki tabata na momentu ku Kòrsou a topa ku Puerto Rico i a logra triunfo ku skor di 3-2, anotando e kareda di triunfo den bòm di 7 entrada, ku tabata e último oportunidat pa bati.
Ku esaki Puerto Rico ta keda den tereno, despues ku Erickson Leonora empuhá Jamal Zalm, ku tabata koriendo na tersera base ora ku Kòrsou tabatin base yen.
Picher Je-Andrick Lourens a habri i tira te den di 3 entrada, unda el a risibí relevo di Cerilio Soleana. Seguidamente Sedley Karel a habri den di 6 entrada pa finalmente Marlison Brunken finalisá e wega riba montikulo.
Brunken a drenta den kabes di 7 entrada ku wega empatá 2-2, ora Puerto Rico tabatin menasa ku koredó na primera i segunda, ku 1 out i ta saka e 2 outnan pa sera entrada, sin pèrmití kareda.
Kòrsou a pika dilanti 1-0 den bòm di 2 entrada, pa seguidamente Puerto Rico reakshoná ku 2 kareda den kabes di 3, pa kue bentaha di 2-1. Tabata den bòm di 5 entrada ku Kòrsou ta logra e empate 2-2 i finalmente den Kòrsou su último oportunidat na bate den bòm di 7 entrada, e ekipo di manager Carlos Pineda, ta anotá pa logra e triunfo ku skor di 3-2.
Kòrsou tabatin 3 kareda, 6 hit i 1 eror, miéntras ku Puerto Rico a anotá na 2 okashon, ku 8 hit i a hasi 1 eror.
Tabata triunfo ku miembronan di e delegashon lokal di beisbòl, a dediká na abuelo di coach ‘Nello’, Hubert Jansen. Tabata hustamente riba e fecha di e triunfo aki, ku el a keda hibá na su último lugá di entiero.
E selekshon di Kòrsou su próksimo wega ta riba djaweps dia 29 yüni 2023, ora nos topa Nicaragua pa mitar di 5 di atardi, ku ta mitar di 7 anochi na Kòrsou.
Djaweps anochi Kòrsou ta pèrdè den Extra Inning
Kòrsou ta gana Venezuela 4-3 den beisbòl
Despues ku no por a hunga djaluna dia 26 yüni 2023, debí ku tereno di parke Saturnino ‘Nino’ Bengoa na El Salvador, no tabata den kondishon pa motibu di fuerte yobida, tabata despues di basta trabou, ku djamars dia 27 yüni 2023, si e tereno tabata den kondishon, pa weganan di beisbòl bálido pa e kompetensia Sentro Amerikano i di Karibe 2023, por a kontinuá.
Esaki unda ku e promé wega pa mira akshon tabata na momentu ku Kòrsou a enfrentá Venezuela. Tabata un enkuentro ku a resultá den un lucha tenas, ku Kòrsou finalmente logrando e triunfo ku skor di 4-3.
Ámbos ekipo a konektá 6 hit, unda ku Kòrsou a kometé 1 eror i Venezuela 2.
Ruderly Manuel a habri i tira te den di 5 entrada, unda el a haña relevo di Cerilio Soleana, kende a logra e triunfo, Christopher Koeiman, Hershelon Juliana i Alexander Rodriguez, kende a logra saka e último 4 outnan pa Kòrsou gana.
Den di 4 entrada, Kòrsou ta menasá i no ta logra anotá despues di tabatin base yen ku 1 out, pero finalmente ta logra anotá na 4 okashon den di 6 entrada.
Venezuela ta menasá den bòm di 5 entrada, unda nan ta yena base sin out. Cerilio Soleana, ta relevá Manuel i ta logra pa tene e 0, sakando e 3 outnan, tirando un ponche, pa despues nos saka un ‘double play’.
Ku e triunfo aki, Kòrsou awor tin 2 viktoria i 1 derota i lo ta den akshon bèk, djarason dia 28 yüni 2023, pa mitar di 10 di mainta, na momentu ku nos ekipo lo ta enfrentando Puerto Rico.
Konhuntamente por mira nos selekshon, e picher ganadó i deliberashonnan durante di e wega.
Natashon djamars 27 yüni 2023
Nos 3 atletanan di e ekipo di natashon ku ta na El Salvador den Weganan Sentro Amerikano i di Karibe, tabata den akshon riba djamars dia 27 yüni 2023.
Samantha van Vuure
E promé ku a bai awa den pisina na e kompleho akuatiko Merliot, tabata Samantha van Vuure, ku un dia promé tabata liber.
Samantha tabata parti di e kompetensia kombiná riba distansia di 400 meter, unda ku el a logra tempu di 5.37.93 i a yega final komo e di 5 partisipante, den ‘heat’. E ganadó a logra tempu di 5.04.67.
Ku e logro aki, Samantha ta klasifiká i mas den oranan di atardi a landa den e final B, di e kompetensia aki. Tabata un kompetensia ku a konta ku 3 landadó, unda ku Samantha a keda na di 3 puesto, ku tempu di 5.37.01.
Kyra de Cuba
Seguidamente tabata Kyra de Cuba ku a kompetí riba 100 meter barbulètè i a alkansá e final komo promé partisipante den su kompetensia di klasifikashon. Kyra a logra e tempu di 1.08.36, pero apesar di tabata promé den su ‘heat’, e no a logra pa klasifiká pa e final den e evento aki.
Jaydon Loran
E úniko landadó maskulino den representashon di Kòrsou, Jaydon Loran, tambe tabata parti di e kompetensianan. Loran a kompetí riba 50 meter pechu i a kaba su kompetensia preliminar, komo e di 5 partisipante, den e 6 nan ku a kompetí, ku tempu di 30.05 sekònde, unda ku e ganadó a marka tempu di 28.54 sekònde.
Liber dia 28
Miéntras tantu djarason dia 28 yüni 2023, ta un dia liber pa tur nos atletanan. Nan tur lo ta den akshon bèk, djaweps dia 29 yüni 2023, riba e último dia di e disiplina di natashon pa loke ta Weganan Sentro Amerikano i di Karibe 2023, na El Salvador.
Kòrsou ta sufri derota den beisbòl kontra Cuba
WILLEMSTAD---Tabata djadumingu den oranan di atardi na El Salvador, ku e selekshon di beisbòl di Kòrsou, a hunga nan di 2 wega bálido pa e kompetensia Sentro Amerikano i di Karibe.
Esaki tambe tabata wega ku a hunga den parke Saturnino ‘Nino’ Bengoa, unda ku nos ekipo nashonal tabata den akshon enfrentando e selekshon di Cuba. Tabata enkuentro, unda ku Kòrsou ta keda kòrtiku, sufriendo derota ku skor di 4-2.
E ekipo ganadó a anotá na 4 okashon ku 8 hit i a hunga sin kometé eror. Miéntras ku Kòrsou a anotá na 2 okashon, ku un di e karedanan for di bataso di kuater skina di Rayshendel Michel, konektando 6 hit i a hasi 3 eror.
Ku e resultado aki, Kòrsou tin un triunfo i un derota i lo bolbe mira akshon djaluna, dia 26 yüni 2023, pa 3’or di atardi, enfrentando e selekshon di Mexico.
Konhuntamente algun foto di e partido kontra Cuba.
