Informashon di Federashon Futbòl Kòrsou (FFK) tokante kampionato di FFK i selekshon U-15
WILLEMSTAD - E direktiva nobo di Federashon Futbòl Kòrsou (FFK) a indiká direktamente despues di e elekshon di dia 10 di aprel último ku e organisashon interno i kompetensia nashonal tin prioridat. “Nos tin ku sende lus na kas promé” tabata un sita firme di presidente nobo, sr. Gilbert Martina, durante di su diskurso inougural.
Ku e mensahe aki a keda suprayá ku futbòl nashonal na Kòrsou mester keda reanudá mas rápido posibel. P’esei, den kolaborashon ku FDDK i tres klup di futbòl, FFK a organisá e promé edishon di e torneo Kopa Kòrsou eksitosamente. E kompetensia aki a keda klousurá dia 2 di yüli último ku Jong Colombia komo e orguyoso kampion.
Despues di esaki e direktiva di FFK a hiba kombersashon ku e tres klupnan ku tabata direktamente enbolbí den e akontesimentunan ku a resultá den kabamentu di forma prematuro di e temporada di kompetensia 2021-2022; Hubentud Fortuna, Atletiko Saliña i New Song. Durante di e kòmbersashonnan a komuniká klaramente ku e partido pa kampionato di segundo divishon mester wòrdu hungá ainda. Direktiva a indiká tambe ku e lo pidi e Komishon di Apelashon pa trata e keho di New Song formalmente, pa asina por keda determiná kua klup lo mester topa Hubentud Fortuna den e partido final.
E desishon aki a ser anunsiá anteriormente den e Organo Ofisial (OO) di 24 di yüli 2025 i a keda konfirmá un biaha mas durante di e rueda di prensa di djaweps 24 di yüli último, den kual tambe a anunsiá ku e temporada di kompetensia 2025/2026 lo kuminsá den e fin di siman di 26, 27 i 28 di sèptèmber 2025.
Siman pasá direktiva a dialogá un biaha mas ku e tres klupnan konserní. Durante di e reunion aki a diskutí un proposishon pa por yega na un akuerdo. Aunke partidonan tabata serka di yega un akuerdo, finalmente no a logra yega na un konsenso riba un aspekto fundamental di e areglo proponé.
Pa e motibu ei direktiva di FFK a informá tur tres klup riba djamars 29 di yüli, ku si no tin konsenso, e desishon anteriormente tumá ta keda vigente: e partido final mester wòrdu hungá pa determiná ken por yama su mes kampion di segunda divishon 2021-2022. A pidi e Komishon di Apelashon pa atendé e protesta di New Song ku urgensia. Asina ku e desishon di e komishon drenta i ku ta klaro kua di e dos tim lo hunga den e partido final i bou di ki kondishon esaki lo ser kompartí promé ku e klupnan konserní i despues ku prensa.
FFK ta sigui traha pa transparensia, hustisia i konekshon den futbòl kurasoleño. Manera FIFA ta enfatisá ku su lema “Football Unites”, FFK tambe ta sigui hasi esfuersonan pa uni tur esnan embolbí pa interés general di nos deporte.
Selekshon U 15
Inisio di e 2025 Concacaf Boys’ Under-15 Championship ta aserkando i e preparashonnan ta kontinuá pa nos selekshon nashonal maskulino kategoria U-15 duna un bon bataya durante e kampionato aki. Nos selekshon lo sali mañan den 2 buelo separá, 6’or di atardi i mitar di 8 di anochi pa Aruba pa nos próksimo kompromisonan.
Pa algun siman kaba nos selekshon ta praktiká i preparando pa saka kara di Kòrsou. Nos 18 hungadónan ta wòrdu dirigí pa Sendley Bito ku ta wòrdu asistí pa Gamala Douglas i Pablo Alomá Mark komo entrenadó di portero. Clinton Leocadia ta e masagista miéntras Olivier Windster ta enkargá ku e materialnan di nos selekshon. E ‘team manager’ di nos selekshon ta Liviéna Rijnschot, dòkter Ramfis Fillet tambe ta kompañá nos selekshon i e hefe di delegashon ta Rudsel Schmidt, ku ta miembro di direktiva di FFK.
E siguiente hungadónan ta forma parti di nos selekshon;
1. Jurdayjiv Reenis (Jong Holland)
2. Shediyon Burnet Martha (Scherpenheuvel)
3. Simón Barrios Carreño (C-Stars United)
4. Jëalardino Floranus (C-Stars United)
5. Jereem Pieternella (Inter Willemstad)
6. Sem Ruiz Rincon (Inter Willemstad)
7. Keiyi Torres Rivas (Atletiko Saliña)
8. Neurlendy Tokaay (Stallions Fc)
9. Izjaïr Noor (Centro Juve)
10. Kydion Seinpaal (C-Stars United)
11. Jean-Jacques Rigaud (C-Stars United)
12. Tiago Schob (C-Stars United)
13. Chris Tujeehut (Ajax, Hulanda)
14. Quyvonn Sluis (Vitesse, Hulanda)
15. Yahzion Cardoze (NAC Breda, Hulanda)
16. Jyano Rojer (Willem II, Hulanda)
17. Marlon Brunken (Go Ahead Eagles, Hulanda)
18. Giordyson Koeiman (Vitesse, Hulanda)
FFK ta deseá nos selekshon maskulino tur klase di éksito i tin sigur ku nan lo sa di hasi un bon trabou durante e 2025 Concacaf Boys’ Under-15 Championship aya na Aruba.
