Informashon di Futbòl lokal pa loke ta luna di yanüari 2024
NEGOSASHONNAN TA ANDANDO KU SR. ADVOCAAT PA E BIRA E SIGUIENTE ENTRENADÓ DI KÒRSOU SU SELEKSHON NASHONAL!
Entrante, 3 di yanüari 2024, sr. Dean Gorré lo no ta e entrenadó di e selekshon nashonal maskulino di Kòrsou. Esaki konforme e palabrashonnan ku a yega na dje for di luna di sèptèmber 2023, kaminda a pidi sr. Gorré pa fungi komo entrenadó interino di nos selekshon maskulino te ku luna di dezèmber 2023. Sr. Gorré lo sigui funshoná komo entrenadó di e selekshon femenino senior i komo ‘Technical & Development Director’ hubenil.
Aktualmente Federashon Futbòl Kòrsou ta den negosashon ku sr. Dick Advocaat su tim p’asina e bira e siguiente entrenadó di e selekshon nashonal maskulino di Kòrsou. FFK ke finalisá e negosashonnan aki pa luna di yanüari 2024, p’asina e preparashonnan di nos selekshon nashonal maskulino por sigui pa e próksimo partidonan ku lo tuma lugá den luna di mart 2024.
FFK ta gradisí sr. Gorré pa e tremendo trabou ku el a bin ta ehersé durante e último tres lunanan ku selekshon maskulino di Kòrsou i ta keda hopi gradesido ku sr. Gorré lo keda forma parti di e famia di futbòl di Kòrsou.
Skibi pa Eldon ‘Peppie’ Sulvaran
KÒRSOU KE BAI MUNDIAL KU UN ENTRENADOR ANSIANO. INKREIBEL
Kontra deseo di e hungadonan
Apesar ku hungadónan di selekshon nashonal apenas dos luna pasa den un karta ku no ta laga niun duda, direktamente dirigí na esnan ku ta disidi den FFK, a indiká bon kla ku nan ke sigui bou di Dean Gorré den selekshon i pa tene kuenta ku nan deseo, e direktiva ku a sobra di FFK a disidí ku nan ta bai kana e ruta pa mundial ku un entrenadó ansiano ku na 2026 lo tin praktikamente 80 aña. Nos a bira manera Selikor pa entrenadónan di edat na Ulanda ku no por haña trabou den nan mes país. Nos no a siña nos les di Hiddink i Langeler, ku tur dos meskos ku Advocaat, komo entrenadónan desempleá na Ulanda, a bin dòp akinan yena saku i laga lastra. Hiddink ku tin mas nòmber ku Advocaat, tambe a bin ku hopi ekspektativa pero no a trese ni un hungadó di mini futbòl.
Nunka niun ansiano no a dirigi un selekshon na mundial di FIFA
Para na kabes di un selekshon nashonal ta eksigi hopi esfuerso fisiko i psigiko tantu paden komo pafó di tereno, pa por trèk e garoshi pa por yega mundial. Laga nos tene nos mes na realidat. E entrenadó di mas edat ku a yega di bai mundial di FIFA ta Otto Rehhagel ku Grecia na 2010 ku 71 aña. Aparentemente Kòrsou ke bai kibra e rèkort aki na 2026. Ku 77 aña bo ta wòrdu konsiderá un ansiano. Advocaat lo ta den porta di 80 na 2026. Di berdat nos ta kere ku un hòmber di 80 aña lo por dirigi futbòl na mundial 2026? Esaki ta duna muestra di un falta di konosementu den e materia di dirigí deporte na nivel máksimo. Realidat ta ku Advocaat no ta konta (mas) den futbòl. For di 2014 na Ulanda ni pafó di Ulanda kasi niun kaminda ela dura mas ku un aña. Na Serbia, Inglatera, Turkia, Irak i Ulanda e no tabatin masha éksito i su estadía kada be tabata kòrtiku. Pero semper tin un isla den Karibe pa yega dòp yena saku. Mientras tantu, esei mester ta konosi pa tur entrenador sin trabow na Ulanda.
Un konstrukshon dudoso
Aparentemente FFK òf e direktiva di FFK ku por sierto ta en pugna ku su statuto ku no konosé un direktiva di ménos ku 9 persona i ku vakaturanan mester wordu yena mes ora, pa motibunan no masha kla, ta desidido pa será un kontrato den raya ku Advocaat. E konstrukshon ta ku otronan ku ta kere den e supuesto soño lo paga Advocaat. Na promé lugá, ku e desorganisashon i desunion ku ta karakterisá FFK, ta imposibel pa yega ni mundialito. E eksperensianan ku selekshon resientemente ta konfirma esei, kaminda no tabatin ni sèn pa paga hotèl i ku debenan grandi di biahe, ku ta pidi mester a pidi gobièrnu i otronan pa kai aden. Pa loke ta pagamentu di Advocaat, esaki ta un konstrukshon dudoso. Si e idea ta pa será kontrato ku FFK lokual ta logiko i úniko opshon, pero pa otro paga su salario, kiko ta pasa ku si pa un of otro motibu kos para na mitar. Ken ta paga Advocaat? Paso niun spònser no ta bai page si e no ta na kabes mas. E ora ei meskos ku a pasa ku Remko Bicentini ta FFK ku ta mal bashi mester paga Advocaat, ku no ta kobra dòs plaka, pa eventual disolvamentu di kontrato.
Direktiva dimensionario
E otro pregunta ta si un direktiva of mihó bisa, parti di un direktiva ku a sobra, mester tuma desishon irevokabel ku ta mara e organisashon, mientras nan ta para ku un pia pafo kaba? Pasobra solamente si e klupnan ku apenas dos luna pasá a pidinan pa bai kas den 2x24 ora, kambia di pensamentu den porta di elekshon, no ta bai bin otro direktiva, pero mirando e reunión di e klupnan día 28 di desèmber pasa, nan ta para duru riba nan punto pa kore ku sobra di e direktiva. Ta kompletamente iresponsabel pa kontra boluntat di e hungadónan i den víspera di elekshon, mara FFK na un hende di edat ku ta na duda ku e por kana hinter e trayekto. Nos no ke bisa nada robes, pero ora bo bula 75, ta un bèki ta awero. Esei ta realidat duru di bida.
Gobièrnu no mester hinka ni sèn ni esfuerso den e asuntu aki
Aparentemente ta e intenshon pa gobernantenan bai papia ku un grupo di hungado ku ya a indika bon kla i firma, ku ta Dean Gorré nan ke komo nan entrenador. Na mi opinión un gobièrnu den un país pober, mester aporta solamente na organisashonnan ku ta tene nan mes na nan reglanan i ku ta bon organisá, manera por ehèmpel Little League. Esei sigur no ta e kaso ku FFK, ku ya ta un bari sin fondo. No por tira para ku sèn di pueblo den un organisashon ku ta wordu karakterisá pa gueranan interno, ku un direktiva ku no ta kuadra ku su statutonan i ku ta un organisashon ku ya kaba debe rond mundo sin ku nan ta kumpli. FFK mester drecha su asuntu interno prome risibi plaka of ayudo di pueblo.
Eldon ‘Peppie’ Sulvaran
Kartanan entre Wilfred Isabella di Terra Corra i demas dirigente vs FFK i vise vèrsa
%20copy.jpg)
