Informashon di partisipashon di ekipo i atletanan na Salvador
Breaking News*** Selekshon di Sòftbòl gana di Centro Caribe Sports (CCS) ku skor di 1-0 te den bòm di di 6 inning. Mas o menos 1.45 pm djaluna mèrdia. Nos a gana e partido finalmente 1-0. Pabien. Promé viktoria !!
Djadumingu 2 yüli 2023
Atletanan di Kòrsou, tabata aktivo den 3 diferente ramo deportivo, riba djadumingu dia 2 yüli 2023, ku tabata fecha di dia bandera di nos isla. Esaki den Weganan Sentro Amerikano i di Karibe 2023, na El Salvador.
ARKERIA
Martijn Schoon a kompetí den arkeria unda ku el a logra pa klasifiká pa oktavo final di e evento, kedando den lucha, pa por ta den premiashon. Esaki unda ku awor lo e bai ta den akshon atrobe, riba djamars dia 4 yüli 2023. Martijn a optené 568 punto, den e buèlta inisial di klasifikashon, den parti di kompetensianan ku a mira akshon den yobida.
TENIS DOBEL
Tenistanan Laurens Deelstra i Aydan Gomez Osorio mester a mira akshon den e kategoria di tènis dòbel, for di den oranan di mainta. Pero yobida konstantemente durante di dia a pone ku e enkuentro no por a tèrminá, unda den oranan di atardi, a yega na e desishon pa posponé tur partido i lo sigui djaluna dia 3 yüli 2023, den oranan di mainta. Esaki tabata na momentu ku nan tabata empatá 2-2 den promé sèt ku e duo for di Puerto Rico, formá pa tenistanan Gabriel Evans i Marko Mesarovic.
SOFTBOL
Nos selekshon di sòftbòl femenino a topa e ekipo di Cuba i a keda kòrtiku den wega ku a hunga 5 entrada i finalisá ku diferensia di 10 kareda, unda Cuba a gana ku skor di 11-1.
Kòrsou a anotá na un okashon, konektando 2 hit i a hasi 2 eror.
J’dah Girigorie a habri i tira te den di 4 entrada, permitiendo 5 kareda i 5 hit di kual 2 bataso di kuater skina, miéntras ku Julisse Koffy a relev’é, kabando wega riba montikulo, permitiendo 6 kareda i 5 hit di kual un homerun.
Anaise Piar i Karin Turk a konektá e hitnan pa Kòrsou, unda ku esun di Turk tabata pa empuhá e úniko kareda di Kòrsou.
Miéntras ku Cuba a konektá 10 hit di kual 3 homerun, ku a produsí 7 kareda i no a kometé eror.
Tabata den wega bálido pa grupo B, unda ku tambe ta hunga Mexico i Guatemala, kual ta ekipo ku Kòrsou lo topa djaluna dia 3 yüli 2023, pa 10’or di mainta.
Djasabra 1 yüli 2023
Un resúmen di Kòrsou su atletanan ku ta na El Salvador pa Weganan Sentro Amerikano i di Karibe, riba djasabra dia 1 yüli 2023.
TENIS
E 2 tenistanan ku ta parti di e ekipo di tènis, bou di guia di coach Nick van Rosberg tabata den akshon, den weganan bálido pa e kategoria individual. Ta trata aki di torneo, unda ku ganadónan ta sigui den kompetensia i pèrdèdónan ta keda eliminá.
Laurens Deelstra
A inisiá for di mainta ku weganan bálido pa e buèlta di 32, unda ku Laurens Deelstra tabata promé pa mira akshon, enfrentando Tomas Del Olmo di US Virgin Islands.
Tabata wega ku a hunga riba kancha Randy Snow 2, konsiderá e di 2 wega di e evento, unda ku despues di un mal komienso, Laurens ta rekuperá pa finalmente logra triunfo ku skor di 3-6, 6-3, 10-8.
Ku esaki ta kontinuá pa e siguiente buèlta, unda seguidamente Deelstra ta topa ku e dominikano Nick Hardt. Tabata wega ku a hunga den oranan di atardi, ku a finalisá den triunfo ku skor di 6-0, 6-0 pa e tenista dominikano. Ku e resultado aki, Laurens Deelstra, tambe ta keda eliminá den kategoria individual.
Aydan Gomez Osorio
Seguidamente tabata Aydan Gomez Osorio ku ta enfrentá e tenista di Costa Rica, Rodrigo Crespo. Despues di un lucha tenas, den wega ku a hunga riba kancha 3, Aydan mester a konformá ku derota ku skor di 6-1, 6-2, i tambe keda eliminá den e buèlta klasifikatorio pa loke ta e kompetensia individual.
Dòbel
Seguidamente djadumingu 2 yüli 2023, e tenistanan di e ekipo di Kòrsou, lo ta den akshon huntu, hungando den kompetensia di kategoria dòbel.
SOFTBOL FEMENINO
Miéntras tantu djasabra 1 yüli 2023, tabata tambe fecha ku e selekshon sòftbòl femenino, a hiba un sekshon di práktika, preparando pa nan wega di djadumingu 2 yüli 2023, ora ku nan lo ta den akshon pa 1’or di trai mèrdia ora di El Salvador, ku ta 3’or di atardi na Kòrsou. Nos sòftbolistanan femenino lo ta den akshon kontra di e selekshon di Cuba.
ARKERIA
Finalmente Martijn Schoon tambe a hiba un sekshon di práktika, preparando pa inisio di su kompetensianan den e deporte di arkeria, riba djadumingu dia 2 yüli 2023.
ATLETISMO
Djasabra 1 yüli 2023, ta fecha tambe ku e ekipo di atletismo, lo yega El Salvador den oranan di anochi, pa kompetensianan ku ta inisiá djaluna, dia 3 yüli 2023.
Selekshon beisbòl di Kòrsou a sufri derota den wega kontra di e selekshon di Nicaragua. Esaki tabata riba djaweps dia 29 yüni 2023, den oranan di atardi.
Tereno di stadion Saturnino ‘Nino’ Bengoa na El Salvador, un biaha mas tabata sitio pa wega bálido pa e kompetensia Sentro Amerikano i di Karibe 2023.
Despues di a laga e ekipo di Puerto Rico den tereno un dia promé, Kòrsou a topa ku Nicaragua i a kai vensí den wega ku a bai èkstra ining, kedando den tereno ku skor di 6-5.
E 7 entradanan a konkluí ku e ekiponan empatá 3-3. Kòrsou ta kue bentaha di 3-0 den kabes di 4 entrada, unda Nicaragua ta deskontá den bòm di 4 i den bòm di 5 ta anotá na 2 okashon mas, pa empatá e wega, ku ta keda 3-3, despues ku e 7 entradanan reglamentario, kulminá.
Den kabes di 8, Kòrsou ta anotá na 2 okashon, pero no ta logra mantené e bentaha di 5-3 i Nicaragua ta anotá den bòm di 8 entrada na 3 okashon pa logra e triunfo, lagando Kòrsou den tereno, ku viktoria ku skor di 6-5.
E enkuentro a finalisá ku skor di 6-5. Nicaragua a konektá 5 hit i a hunga sin eror, miéntras ku Kòrsou a konektá 11 hit i a kometé 2 eror. Tantu Andrelton Simmons komo Dudley Leonora a konektá 2 hit.
Marlison Brunken a habri pa Kòrsou i risibí relevo di Temesh Lourens, Christopher Koeiman i Hershelon Juliana, ku a sufri e derota.
Ku esaki awor Kòrsou tin 3 triunfo i 2 derota i lo mester topa Repúblika Dominikana, djabièrnè 30 yüni 2023, pa 3’or di atardi, ora di Kòrsou.
ELIMINA
Selekshon di Beisbol a pèrdè djabièrnè di 30 di yüni ku skor di 10-0 kontra Republica Dominicana i a keda eliminá.
