Lesadónan di Deporte Kòrsou, bondia i felis wikènt. Nos ta drenta un wikènt ku dos liga kandela den nan fase final. Na Vi Jansen Ballpark ekiponan Quality Stars i Bulldogs lo topa ku otro den e wega finalísimo di semi-final. Na Frank Curiel Ballpark tin e gran final di Liga 60 entre ekipo Jaws i ekipo Nos Tambe Por. Jaws ta ekipo super kampion di Liga 60, kaminda nan a hunga 9 final sigí. For di dia Liga 60 a keda fundá e ekipo Jaws ta den final. Den e 8 finalnan anterior ku Jaws a hunga nan a sali kampion na 5 okashon. Jaws a sali kampion na 2012, 2013, 2014 i 2015. Na 2016 i 2017 ekipo Amigos a bira kampion i Jaws a keda na di dos lugá. Na 2018 Jaws a bira kampion ganando di ekipo Lions i na 2019 Jaws a pèrdè kontra Nos Tambe Por.

* * * * *

E final di Liga 60 lo ta solamente un wega e aña aki. Debí na COVID-19 a skohe pa hunga e final den solamente un wega. Nos tambe Por ta faborito ku un ekipo hóben kargá ku super star, manera entre otro Renato Anasagasti, Emile Haswell, Sor Moesquit, Son Sofia i otro estreanan ku ya tin algún aña den e ekipo. Jaws tambe tin algun hóben ku resientemente a subi den 60+, manera Frensel Petronilia, Desmond Braithwaithe, Rudsel Schmidt, Ruvio Kook i Marlon Römer. E ekipo tin hungadónan veteranísimo, manera Rudsel Poulina, Vanchi Toppenberg, Riley Toppenberg, ets. Jaws ya a anunsiá Riley Toppenberg, miéntras ekipo Nos Tambe Por lo bini ku Wim Felicia.  Jaws ta sigur ku Riley Toppenberg lo dominá e resio batiadónan di ekipo Nos Tambe Por.

* * * * *

Durante e kampionato regular e ekipo Nos Tambe Por a gana Jaws ku skor di 5-1. Nos tabata presente na e wega ei kaminda Jaws tabata dilanti 1-0 te den di 5 inning, kaminda Nos Tambe Por a nota dos kareda den di 5 inning i despues 3 kareda den di 6 inning. Tabata Renato Anasagasti ku a habri ku hit pa despues Son Sofia dal un homerun feros pa left pa bòltu e skor di 0-1 pa 2-1 na fabor di Nos Tambe Por. Despues di einan mester bisa ku Son Sofia no a dal niun homerun mas durante kampionato regular. Den e play-off e dos ekiponan no a topa otro, debí ku ekipo Nos Tambe Por a bai play-off direkt i Jaws mester a lucha ganando di ekiponan Amigos i Lions i na tur dos okashon ku skornan pèrtá.

* * * * *

Varios hungadó den e ekiponan menshoná a marka historia tempu di nan tempu den selekshon Fastpitch. Entre otro Son Sofia, Renato Anasagasti, Sor Moesquit, Rignald Hooi, Emile Haswell, Bencho Imperator. Tempu bon di Sòftbòl Fastpitch, añanan 70 i 80. Frensel Petronilia di Jaws a hunga varios selekshon Fastpitch den e añanan 90. No ta spera un gran públiko, debí na Covid -19 na Frank Curiel Ballpark. Nos tabata presente algún siman pasá den wega di play-off i e fanátikonan tabata tene e distansia manera mester ta.  Den Beisbòl Veterano tambe kaminda por wak wega for di outfield den owto i ku distansia soshal den e stationnan, kosnan a kana bon último simannan.

* * * * *

Laga nos bai pa wega finalisimo di semi-final entre Quality Stars ku Bulldogs. Quality Stars tabata gran faborito promé ku e seri kuminsá i a gana e promé wega ku skor di 9-0. Bulldogs a gana e di dos wega ku skor di 3-2 lagando ekipo Quality den tereno.  E wega di djasabra awor por bai tur dos banda. E ekipo Quality tin Rydell Isabella pa habri, miéntras Bulldogs tin Emilio Velarde i Lester Victoria. Quality ta keda tòg faborito, pero hopi leve debí na un line-up hopi hóben ku varios hungadó ku te ku aña pasá, dos pa tres aña pasá, tabata den Beisbòl Dòbel A.

* * * * *

Otro siman nos tei bèk ku resultado i mas detaye di e dos weganan ariba menshoná. Tantu den Sòftbòl 60+ komo den Beisbòl Veterano nos tin hopi detaye djaluna awor. Sòftbòl 60+ ku pòtreè di entrega di premio naturalmente.  Otro siman tin play-off final di Beisbòl Veterano i djasabra dia 28 di novèmber ekiponan Polisial lo enfrentá otro den Stadion Post 6. Ekiponan KPC1, KPC 2, ORV (Skol di Polis) i LBD lo topa otro. Nos ta keda te aki pa awe. Te otro siman ku Poder di Dios.

‍