Lesadónan di Deporte Kòrsou Slowpitch , bondia i felis siman. Nos tin informashon di Sòftbòl Slowpitch i Beisbòl Veterano awe. Wikènt kandela den Beisbòl Veterano. Djasabra Santa Maria a gana Jandoret ku skor di 7-6. Jandoret komo ekipo di kas tabata ganá ku skor di 6-4 te den último inning ku dos out i base bashi. Santa Maria ta nota 3 kareda, bai ariba den nan último chèns pa finalmente gana ku skor 7-6. Jandoret no a nota kareda den nan último chèns. Jandoret Raiders a kuminsá e wega ku rekòrt di 3-1 na promé lugá te na e momentu ei i a klasifiká den e 4-nan.

‍
* * * * *
Quality tabata ganá 9 pa 4 i ekipo Isla tabata den nan último chèns di bati. Skuridat a pone ku mester a sigi e wega djadumingu mainta. Beisbòl Veterano kayente mes i te ku djasabra atardi tur ekipo tabatin chèns di klasifiká. Bulldogs a laga Santa Rosa den tereno i Bulldogs su rekòrt a bira 2 ganá i 3 pèrdí, pero Bulldogs tin masha hopi kareda kontra promé ku e último wega ku nan a hunga kontra Santa Rosa. Mester bisa 6 ekipo hopi balansá den e play-off i manera nos a antisipá ekipo òf ekiponan ku rekòrt di 2 ganá i 3 pèrdí lo klasifiká pa e play-off semi-final.  Finalmente ekiponan Quality Stars, Jandoret, Isla i Bulldogs a klasifiká. Den dianan benidero nos lo tin mas detaye.

‍
* * * * *
2020 un aña inkreibel i straño den deporte. Promé biaha den historia te asina leu ku nos konosé weganan kayente, finalnan sin fanátiko, ets. Tantu lokal komo internashonal. Na 2019 den luna di novèmber den Slowpitch tabatin moveshon pisá mes. Den Liga 40 Baranka a klasifiká den 2019, pero topa un duru Crazy Tigers den final i kai vensí. Crazy Tigers revelashon den Liga Sòftbòl 40 di 2019 a bira kampion. Den 2020 Crazy Tigers tabata klá pa defendé nan título, pero Liga 40 no a sigi. Ban spera ku e liga lo sigi den 2021. Ekiponan sigur ku lo tei ta Crazy Tigers, Baranka, Swift, Jaws i Navegantes. Nos no sa kon ta para ku Happy Stars ku ainda ta hopi aktivo den whatsapp group si.
* * * * *

‍
Liga Amstel a start i keda wantá, Liga van Engelen no a tuma lugá debi na COVID. Liga 50 a suspendé e kampionato despues ku tabata na final di promé buelta. No ta konosí ku lo sigi e kampionato òf lo start ku kampionato 2021 di nobo.  Aña pasá tabata Ban Serio ku a swip Pitufos den e final. Ban Serio tin 3 titulo sigí di Liga 40, 2017,2018 i 2019. Marlins tabata kampion na 2016 i Pitufos kampion na 2015.  En todo kaso ta Liga 60 i Beisbòl Veterano so a sigi. Beisbòl Veterano lo tin Liga 50+ tambe na momentu ku e 40+ terminá.

‍
* * * * *

Aña pasá ekipo Baranka a klasifiká pa final den Liga 40 pa 13 aña siguí. For di 2007 Baranka ta klasifikando pa final. Baranka tabatin 8 título den e 13 añanan ku nan a hunga final.  E otro 4 titulonan ta den man di Happy Stars ku a kai formal i na 2019 no a pasa mes pa semi-final. Aworaki ta Crazy Tigers ta komandá den 40+ i Baranka ta sigi hasi lo máksimo pa nan kue nan racha di kampion bèk.  Den pasado ekiponan Catpower, Swift, Marlins ets a bira kampion di Liga 40.  Jaws un tempu tabata super kampion di Liga 40.  E mesun hungadónan ei a bira super kampion den 50+ i despues a bin dominá den Liga 60. Ta trata aki di Vanchi i Riley Toppenberg, Kid Boca Chica, Fety i Broertje Curie, Bencho Imperator i otronan.  Despues Bencho a bai laga Jaws bai hunga den Nos Tambe Por. By the Liga 40 a start na final di aña 80 na Suvek Ballpark ku aña pasá a bira van Engelen Ballpark. Liga 40 tin mas ku 30 aña di eksistensia.

‍