Lesadónan di Deporte Kòrsou bon tardi. Rumornan ta formal den Beisbòl Veterano i nos lo laga e kampionato 2020 kaba pa nos ranka kibra riba e rumornan kuminsando for di djarason. Santa Maria, Quality Stars i Marchena a move formal. Hopi ekipo grandi ku a yega den e promé 6-nan lo konosé kambionan formal riba nan lista. Kambionan ku lo sorprendé hopi sigidó di Beisbòl Veterano.
* * * * *
Varios ekipo di Liga 50 Sòftbòl a kuminsá move kaba. Entre otro ekipo Jaws sigur ta den moveshon kaba, miéntras Marlins lo kuminsá move e siman aki. Liga 40 ta pendiente reunión entre ekiponan, pa wak kiko ta bai pasa. Nos ta referí aki na Liga 40 Sòftbòl ku tin kasi 35 aña ta move na Van Engelen Ballpark, ántes Suvek Ballpark. Kampion di Liga 40 Sòftbòl ta Tigers, ku a keda di start ku un dinastía, mirando ku ta hopi estrea di Bombers ta moviendo rumbo pa Tigers den Liga 40 di Sòftbòl. Tigers ta den un joint venture ku ekipo Flamboyan pa loke ta trata Liga 50.
* * * * *
Bombers a habri aña, trein i hunga un wega amistoso ayera na Cirilo Chirino Ballpark. E wega tabata mas o ménos 2’or i pa 8’or ainda tabatin varios hungadó na Cirilo Chirino Ballpark. Bombers, un dje ekiponan mas eksitoso di Sòftbòl Slowpitch e último añanan. E ekipo tabata kampion di Liga Amstel di 2011 te ku 2017. Na 2010 ekipo Skarlo tabata kampion. Na 2018 no tabatin final i na 2019 ekipo Thrillers a bira kampion di Liga Amstel. 2020 tabata kandela atrobe i Bombers tabata invikto, pero Covid-19 a dal adén i mester a suspendé e kampionato. Kos tabata pinta un lucha formal entre Bombers, Thrillers i Cicoza.
* * * * *
Liga 50 Beisbòl ta pendiente pa hunga final entre Jandoret Raiders i Sigi Hunga. Den kurso di siman e dos ekiponan lo sinta huntu ku direktor di kampionato Gibi Denisia, pa pone un fecha pa Liga 50 di Beisbòl Veterano tambe hunga su final. Jandoret Raiders ta super kampion di Beisbòl Veterano 50+ tambe ku titulonan na 2017 i 2019. Na 2018 no tabatin kampionato di Liga 50 di Beisbòl Veterano. Parse ku e interes ta grandi pa Beisbòl Veterano 50+ den 2021 i tin indikashon ku lo move pa un otro parke ku no ta via Jansen, di manera ku por hunga dos ora òf probablemente pone dos wega riba un dia.
* * * * *
Saludo pa nos hendenan di Sòftbòl Femenino Veterano. Algun tempu pasá tabatin tres liga ta drei pareu, The Champions League, Liga Streanan di Ayera i All Stars League. Liga Streanan di Ayera tei ketu bai i ta rumbo pa di 30 aña. Nos ta kòrda 2002 ku ekipo The Champions a organisá un torneo Internashonal. E torneo a tuma lugá na Frank Curiel Ballpark i e Konferensia di Prensa a tuma lugá den Van Der Valk na oktober 2020. Ekiponan di Sòftbòl Femenino Veterano a hunga den e torneo di Aruba, Boneiru, Sint Maarten i The Champions di Kòrsou.
* * * * *
Atrakshon tabata e tempu ei èks super estreanan di Sòftbòl Femenino Fastpitch manera Soraida Juliana, Bernadita Geerman, Silvia Wilson, Prisca Angelista, Zenaida Geerman i otronan. Di Sint Maaren tabatin Cassandra Baptitst, un tremendo hungadó i batiadó, ku un tempu a hunga den Pichingolo i a sali kampion bate den e kampionato di Fastpitch Femenino ku a tuma lugá e tempu ei na Kòrsou. Milburga Martinus, otro tremendo hungadó ku tabata den e selekshon ku a sali kampion Sentro Amerikano i di Karibe na El Salvador na aña 1976, tambe ta forma parti di e tim di Aruba. E torneo tabata kargá ku premio. The Champions a keda fundá dia 25 di ougùstùs 2000. The Champions na 2002 tabata di spònser pa Mercedes Benz. Recordar es vivir! Ta kasi 20 aña pasá. Aworaki varios hungadó èks The Champions ta den Nos Goso, Mas Goso i Tur Goso. Nos ta keda te aki pa awe.
