Fanátikonan di Deporte Kòrsou bon tardi. Pabien un biaha mas na ekipo Quality Stars ku nan promé título den Beisbòl Veterano. E ekipo Quality Stars a gana Jandoret Raiders 9-8 pa bira kampion di Beisbòl Veterano. Game On riba nan página di Facebook a transmití e wega pa fanátikonan ku no por a yega Stadion Johnny Vrutaal pa por a sigi e wega. Rodney Michel ku a tira den relevo tabata e picher ganadó i a bira MVP di e seri final. Jandoret Raiders ku tin 5 título den Beisbòl Veterano mester a konformá nan mes ku e título di supkampion. Tur dos ekipo a haña hopi chèns i Jandoret komo home team tabatin 3 oportunidat den e wega pa laga di Quality Stars den tereno, pero no a logra.
* * * * *
Djaweps 11 di mart tabatin reunión general di BEVEKO na sede di NAPB na Schottegatweg West. E direktiva aktual enkabesá pa Ruisandro Cijntje a anunsiá ku nan lo baha. Final di Liga 50 di Beisbòl Veterano ta pendiente pa tuma lugá. Jandoret Raiders i Sigi Hunga a keda di pone un fecha ku lo hunga e wega final. Probablemente e wega ei lo ta djadumingu 21 di febrüari i e lugá no ta konosí ainda. Pa 2021 Liga 50 lo por bira algu ku mas partisipashon di ekiponan. Gibi Denisia tabata enkargá ku Liga 50 na 2020 i na 2020 tambe Gilbert Denisia lo tei. Gilbert Denisia tabata direktor di kampionato 2020.
* * * * *
Den reuniónnan benidero di BEVEKO ta bon pa pone kriterianan pa loke ta trata kampion bate, kampion picher, lider di homerun bon i klá, pa evitá problema na final di kampionato. Por ehèmpel kuantu aparishon na plato batiadónan mester tin pa bini na remarke pa bira kampion bate. Den kaso di empate den homerun ta ken ta bai ku e titulo òf ta entregá dos kopa. Pa loke ta trata kampion picher, e kantidat di inning ku mester tira i alabes ta wega ganá ta bira kampion picher òf ta ERA òf promedio di ganá i pèrdí. Mester kuminsá nombra direktiva nobo, komishon di regla, komishon di kastigu ets. Nos ta keda pendiente e desaroyonan.
* * * * *
By the way, rekuperashon pa Eligio Acosta, konosido umpire ku a hasi un operashon urgente wikènt pasá. Eligio ta interná den CMC i ta rekuperando satisfaktoriamente. Eligio ta na kas for di djasabra 13 di febrüari. Eligio tin sigur mas ku 25 aña na Kòrsou i ta práktikamente un Yu di Kòrsou . Un di nos mihó umpirenan tempu di su tempu i ta umpire ku a traha na Spaña pa algun aña promé ku ela bini bèk Korsou. Ta un operashon ku a bai bon, ku por a bira algu serio tambe ku Acosta no a keda transportá rápido pa CMC.
* * * * *
Miéntras tantu Torneo Kenley Jansen den kategoria Junior i Senior a start i nos tabatin e resultadonan. Vários prospekto den akshon durante weganan, entre otro Mairoshendrik Martinus ku a kumpli 16 aña dia 3 di febrüari último. Mairo a dal un homerun kilométriko djasabra na Shon Ki Nicasia Ballpark. E hungadó Curley Martha (Junior League) ta sigi destaká huntu ku otronan manera Juremi Profar, Shendrion Martinus ets. Bastante skout na Kòrsou e dianan aki pa sigi desaroyo di nos muchanan.
* * * * *
Ban pa Sòftbòl Slowpitch. Mester apuntá ku ekiponan di Liga 50 a kuminsá move. Marlins a train djaweps último na Sam Bunting Ballpark. Ban Serio a yama training e siman aki i tin mas ekipo den moveshon. Ekiponan den klasifikashon te ainda ta Ban Serio, Marlins, Flamboyan/Tigers i Jaws. Pitufos i Artemisia ta na rant di klasifikashon. E standing ta Ban Serio 5-2, Flamboyan, Jaws i Marlins 5-3. Pitufos 4-3 i Artemisia 3-3. Sam Bunting Ballpark a keda den super gran forma aya na skina Bethencourtstraat/Andres Belloweg. Pronto lo tin apertura ofishal, kaminda ekiponan di Sòftbòl Femenino i Maskulino lo hunga wega amistoso.
* * * * *
Baranka ta moviendo pisá den Sòftbòl Liga 50 i tin un gran shortstop, un utility i outfielder na kaminda. Otro ekipo ta pèrdiendo kasi tur hungadó i lo traha duru pa terminá e kampionato. Edichi Martina lo hunga Liga 50 Sòftbòl ku ekipo PItufos i lo bai yuda ekipo The Brothers. Den Beisbòl Veterano tambe ta kayente. Outfielder i infielder di un ekipo grandi lo bai un otro ekipo grandi, un èks kampion. Nos ta keda te aki.
