Lesadónan di Deporte Kòrsou, felis wikènt. Final di Beisbòl Veterano lo tuma lugá djadumingu 7 di febrüari pa 2’or pm den Stadion Johnny Vrutaal. E wega lo tuma lugá sin presensia di fanátiko. Lo sigi ku e partido den kabes di e di 7 inning ku dos out i ku e ekipo Quality Stars ku tabata ekipo di bishita na bate. Jandoret lo sera bòm di di 7 inning. E ekiponan lo risibí mas informashon for di BEVEKO.
* * * * *
Direktiva di Beisbòl Veterano Kòrsou a reuní ku representante di ekiponan Jandoret Raiders i Quality Stars djaluna anochi. E ekiponan a bai di akuerdo ku detayenan kon mester sigi e wega i ku entrega di premio na ekiponan kampion i supkampion despues. Lo pone un otro fecha pa entregá premionan individual. Despues ku saka kampion di 2020 lo tin reunion general ku ekiponan. E direktiva aktual lo baha promé ku kampionato 2021 start. Lo saka un komunikado kaminda ta pidi pa ekiponan di Beisbòl Veterano manda kandidatonan pa direktiva nobo di BEVEKO.
* * * * *
E direktiva aktual enkabesá pa Ruisandro Cijntje lo baha kasi kompletu. For di komienso nan a bisa ku nan lo tei pa yuda solamente un aña. E direktiva anterior ya tin su relatonan kla, esta relato di presidente, sekretario i di tesorero. Parse ku e aña a bai tremendo apesar di e reklamonan, Covid-19 ets ets. Kampionato tabata bai kaba tremendo dia 6 di desèmber último, pero outoridatnan a para wega i pone ku mester terminá den 2021. En todo kaso ekiponan manda representante pa direktiva nobo despues di e wega final di dia 7 di febrüari.
* * * * *
Ban pa Beisbòl un ratu. Ekipo Groot Kwartier Stars ta a la karga. Varios hungadó nobo ta na kaminda pa Groot Kwartier. Esnan konosí kaba ta entre otro Marlison Brunken i Madison Ortega ku tabata den ekipo Firebirds. Gedeon Sambo tambe ta rumbo pa Groot Kwartier. Parse ku tin negosashon fuerte pa Rhiëncy Imperator pasa pa forma parti di Groot Kwartier. E hungadónan aki ya ta den moveshon i Shuremi Fornerino ta un dje grandinan tras di kortina di varios di e moveshonnan di Groot Kwartier Stars. Marion Brunken a pasa pa Wild Cats i awor ta Marlison Brunken ta bai Groot Kwartier. Dos dje pilanan di ekipo Firebirds den e último añanan.
* * * * *
Mas kambio ku tin òf tabatin den Dòbel A ta Jurickson Fecunda di Wild Cats ku a pasa pa Firebirds.
Shaquile Silberie otro hungadó di Wild Cats a move pa Marchena Braves. Un grandi di Wild Cats a pasa den silensio pa Marchena Braves. Ta trata aki di Richard Moesker ku tabata un dje pichernan estelarnan di e ekipo Wild Cats durante sigur 5 aña. Un prospekto tempu di su tempu den Beisbòl di College aya na USA. Marchena Braves drechando nan ekipo pa trata na bini bèk den e promé 4-nan manera tabata e kaso na 2018.
* * * * *
Miéntras tantu selekshon U-23 ta riba pia i kargá ku prospekto di Beisbòl i hopi ku ta firma profeshonal. Selekshon grandi a sigi train den e dianan ku a pasa i a tira un wega kontra e profeshonalnan firmá ku ta den training rumbo pa kampamentunan na USA i República Dominicana. Didi Gregorius a hunga pa e tim di e profeshonalnan kontra nos selekshon. Pichernan Ruderly Manuel i Denverick Martinus ta tirando den gran forma. Denverick tabata tremendo na aña 2019 den Dominican Summer League ku organisashon di Dodgers den su prome aña den profeshonal. E picher slengu aki ku ta desaroyando masha bon mes a firma ku 17 aña na 2018.
* * * * *
Bèk pa Slowpitch, ekipo Jaws di 60+ ta a la karga i nan a firma 4 hungadó pa temporada 2021. Jaws a firma Manolo Gomez, Tucu Martinus, Fransje Lambertina i Hubert Malacia. Fransje pronto lo kumpli 59 aña i ta kla pa kuminsá move den Liga 60 . Tucu lo kumpli 59 aña promé ku kampionato start. Hubert ‘Manolo’ Gomez tabata den Nos Tambe Por na 2019 i 2020. Liga 60 interesante den 2021. Jaws lo bini duru bèk pa ekipo Nos Tambe Por den 2021.
