Lesadónan di Deporte Kòrsou bondia i felis siman. Nos tei den 2021 kargá ku informashon di Sòftbòl Slowpitch i Beisbòl. Tur deportista ta pendiente di kiko ta bai pasa e aña aki i ki dia por hasi deporte bèk manera normal bieu ku fanátiko. Vários ekipo di Little League lo kuminsá train e siman aki. Gobièrnu a keda di anunsiá kon lo sigi ku e medidanan den kuadro di Covid-19 dia 11 di yanüari ku ta djaluna otro siman. Aña pasá ya dia 3 di yanüari a start ku torneo di Little League di Akademia di Beisbòl Brievengat (FABB). Despues di e apertura ofishal ekipo di Santa Maria a sali duru i dal van Engelen pa blankeo. Mesun ekipo di Santa Maria ei a bira kampion di Torneo FABB ganando di Trai Seru den final den e kategoría Little.
* * * * *
Santa Maria a sali kampion de Minor tambe. Bon públiko pa e fecha final na e okashon ei. Pa loke ta trata 2021, e organisadónan ta pendiente pa organisá e torneo mas mei mei pa fin di luna di yanüari, ké mèn organisashonnan di Little League keda pendiente. Liganan tambe ta pendiente pa start ku kampionato. Den dianan benidero nos lo bai tuma kontakto ku District Administrator sr. Urny Floran ku lo duna nos mas detaye. I naturalmente Ernst Meyer òf Rignald Martina lo tin mas detaye di Torneo FABB 2021. Nos tin mas informashon di Beisbòl riba nivel di Klase A i Dòbel A tambe.
* * * * *
Resientemente nos a risibí un komunikado kaminda FEBEKO ta anunsiá ku nan a kanselá e Winter League 2020. Presensia di públiko na e weganan aki ta di hopi importansia pa por yuda kubri e gastunan i FEBEKO a kanselá e evento. E proyekto aki lo tabata unu ku sigur lo a trese nos Beisbòl lokal den un lus hopi positivo, mirando ku FEBEKO a yega na akuerdo ku varios ekipo di MLB ku tabatin hopi interesá pa manda nan prospektonan Kòrsou pa partisipá den e ‘Winter League’. Esaki lo a bira Kòrsou su promé liga ofisial profeshonal. Ya.. no tin moda di hasi i FEBEKO lo bai konsentrá i prepará pa Caribbean Cup i kampionatonan lokal pa wak si despues di temporada 2021 purba organisá Winter League atrobe.
* * * * *
Un ratu pa Slowpitch. Torneo Survivors a kanselá kaba pa 2021. E torneo semper ta start medio yanüari pa bin kaba medio febrüari ku partisipashon di ekiponan di 50+ i komersial. Despues normalmente ta sigi ku Torneo Amstel Bright i despues Torneo Hope. E dos tornenan menshoná ta riba ‘hold’ pendiente desaroyonan di Covid-19. Aqualectra mester a organisá pa último biaha Torneo Hope na 2020, despues tabata Ennia ku mester a sigi na 2021. Tin mas organisashon interesá pa organisá Hope 2021, pero despues nos lo divulgá nòmber di e organisashonnan.
* * * * *
Slowpitch ta wantá, pero moveshonnan a sigi. Tin papiá di ekipo nobo den Liga 50 Sòftbòl, un ekipo di hopi trayektoria lo wanta un ratu i esun nobo lo bai ku algún hungadó di e ekipo ku hopi trayektoria. Vershonnan ta indiká ku ta dos ekipo nobo lo bai tin den 50+ Sòftbòl. Beisbòl Veterano lo haña un òf dos ekipo nobo. Tin rumor ku Verney Jansen lo bini ku su tim nobo. Of Verney lo keda den Bulldogs òf lo tuma Bulldogs over. Nos lo drenta den kontakto ku Verney tambe den e dianan benidero. Te ku awe dia 4 di yanüari no tin fecha ainda pa terminá e kampionato di 2020 ku e wega empatá na 6 kareda den di 7 inning entre Jandoret Raiders i Quality Stars.
* * * * *
Bèk pa Beisbòl, riba nivel di Dòbel A Wild Cats a hasi un moveshon i firma e tremendo picher Marion Brunken. Mairon a gana 2 di e 4 weganan pa su ekipo Firebirds den 2020 i awor e ta rumbo pa Wild Cats. Ekipo Wild Cats supkampion 2020 ya a firma e rumannan Rodriguez di Santa Maria Pirates i tin mas hungadó na kaminda. Curacao Baseball Week ku mester a tuma lugá di 5 pa 9 di yanüari a keda kanselá. Aña pasá nos por a gosa di presensia di Ivan Pudge Rodriguez, kètcher di Salon di Fama. Nos ta keda te aki pa awe.
