Lesadónan di Sòftbòl Slowpitch i Beisbòl Veterano, bon dia. Nos tei ku informashon di Sòftbòl Slowpitch i Beisbòl Veterano atrobe. Di Beisbòl Veterano nos ta pendiente pa e standing i lidernan den bateo. Hopi organisashon i liga a bai pa Game Changer i ta manda e informashon fásil pa esnan interesá i Prensa. Den Liganan Amstel, Liga 50, Liga di Nos Tur i Liga 60 e sifranan ta up to date. Den Beisbòl Veterano direktiva a keda di wak sifra i standing manda pa nos. Den Beisbòl Veterano ainda ta skor ku pen ku papel, anke mester bisa ku e skorernan por skor e weganan via Game Changer. Pa otro aña BEVEKO a keda di pasa pa Game Changer.
* * * * *
Van Engelen Foundation ta organisá un torneo komersial/soshal pa haña fondonan pa un skorbòrt nobo riba tereno A. Por bisa mas bien ta un kampionato kaminda ekiponan lo enfrentá otro ku lo dura te ku fin di Novèmber. Manera nos a anunsiá anteriormente, lo no tin Liga van Engelen ni Liga 40 na Van Engelen Ballpark den 2020. Probablemente lo tin un interes enorme pa e torneo aki. Hopi di ekiponan ke move den 2020, mirando ku no por a hunga e tradishonal i popular torneo Hope. Keda pendiente pa mas informashon i nos tin un artikulo riba Torneo van Engelen aki.
* * * * *
Liga di Nos Tur ta bai start ku play-off djabièrnè awor na Frank Curiel Ballpark. Den e promé wega djabièrnè awor 21 di ougùstùs, ekipo Sin Stress lo topa ku Join Me. Den e di dos wega Un Kara ku a terminá invikto na promé lugá, lo hunga kontra Chilling ku a terminá number 2. Chilling ta kargá ku hungadónan di Nos Goso ku no ta hungando e kampionato. Djasabra Chilling i Un Kara lo hunga promé wega i Join Me lo topa ku Sin Stress den wega number 2. Si ta nesesario lo hunga wega number 3 di e serinan djabièrnè 28 di ougùstùs. Nos ta keda te aki pa awe.
