Fanatiko di Deporte Kòrsou Slowpitch/Beisbòl Veterano, bontardi i felis wikènt. Beisbòl Veterano ta sigi kandela kandela djadumingu ku weganan di Round Robbin entre e mihó 6 ekiponan di buelta regular di Beisbòl Veterano. Djasabra tin weganan di e buelta pèrdèdó e buelta di konsolashon. Jandoret ta na promé lugá ku rekòrt di 2-0, kuater ekipo ku 1-1 i Santa Maria ku 0-2. Den e promé wega ekipo Isla Crackers lo topa Santa Maria Pirates. Wega fèrfelu, ruman. Isla tin rekòrt di 1-2 i Santa Maria 0-2. Santa Maria no por pèrdè niun wega mas, miéntras Isla no por permití derota debi ku nan ta bai kai den zona di peliger. Den kampionato regular Isla a gana Santa Maria.
* * * * *
Promé ku nos sigi ku e weganan kandela ku tin djadumingu awor, nos tin un partisipashon urgente. Direktiva di BEVEKO ta hasi un yamada dramátiko na fanátikonan pa por fabor no aglomerá. Keda den profundo di outfield i no yega serka. BEVEKO lo tin e fanátikonan speshal, 70+ i algún 80+ (saludo pa Boy Motor) ku aña adén aña afó ta bishitá weganan di Beisbòl Veterano. BEVEKO a haña permit pa purba un wikènt más, miéntras Polis i outoridatnan lo pasa Vi Jansen Ballpark i kontrolá e situashon. Falta 3 wikènt más di Round Robbin i por lo ménos 4 pa 6 wikènt mas di play-off semi-final i final. Falta wikèntnan 251020, 011120, 081120 pa terminá Round Robbin. Despues lo tin 151120/221120 pa semi-final. Final lo ta 221120 i por kaba einan. Den kaso di splitmentu di serinan semi-final òf final lo bai te 291120 òf 061220. Beisbòl Veterano lo kaba fin di novèmber òf komienso di desèmber.
* * * * *
Wega number 2 djadumingu awor ta 1’or entre Quality Stars i Bulldogs. Ta trata di dos ekipo ku rekòrt di 1-1 den Round Robbin. Den buelta regular ekipo Bulldogs a sorprendé Quality i kibra nan invikto ku tremendo picheo di Emilio Velarde. E ekipo ku gana naturalmente ta drecha nan posishon i esun ku pèrdè ta kai un tiki, pero ku chèns di drecha nan posishon despues, debí ku tur ekipo lo falta dos wega mas despues di e wikènt aki. Wega number 3 lo bira otro wega fèrfelu manera ta e kaso ku tur e weganan aki di Round Robbin. Jandoret Raiders lo topa ku Santa Rosa Memories. Jandoret tin 2-0 i Santa Rosa tin 1-1. Jandoret lo buska manera di gana i bai 3-0, p’asina sigurá e pase pa semi-final foi tempran, miéntras Santa Rosa lo bini fuerte pa hasi nan rekòrt 2-1.
* * * * *
By the way, Liga 60 ta sigi na Frank Curiel Ballpark djadumingu awor ku dos wega. Nos no a tende nada di Liga di Nos Tur ainda, miéntras Liga 50 a kanselá tur aktividat pa 2020 i parse ku Liga Amstel tambe. En todo kaso djadumingu awor tin dos wega di 60+ na Frank Curiel Ballpark. Pa 1’or Nos Tambe Por ku ta invikto lo topa ku Lions ku tambe ta invikto. Pa 11’or lo tin Nos Power kontra di Los Amigos. Miéntras tantu e weganan a bira 1’or i 3’or. Nos a keda di bai chèk e kambio aki.
* * * * *
Miéntras tantu mamamentu di gai pisá entre e Dodgers i Yankeesnan, apesar ku Yankees t’afo masha dia. Dodgers ta mustra faborito pa gana a base di nan eksperensia den World Series. Mas ku mitar di e ekipo a hunga World Series kaba i varios di nan a hunga Post Season temporada 2020. Nos a mira e eksperensia ei den e wega number 1 i e hungadónan di Tampa tabata manera pèrdí i un tiki nervioso. Clayton Kerschaw ku tin kos di demonstrá den World Series tabata bini ku bala mei mei ku velosidat normal i e hungadónan di Tampa no por a saka e bate manera mester ta i a swing den bashi masha hopi i kome basta ponche serka Kerschaw.
* * * * *
Ban den Beisbòl Dòbel A un ratu. Kos ta kayente. Santa Maria ta duru den kaya ta buska manera pa drecha nan tim i Royal Scorpions no a keda atras. Royal Scorpions ta duru mes tras di e shortstop estelar di Santa Rosa ku ta Riordan Windster. Wild Cats a bula duru riba Christopher Koeiman, gran picher di Santa Rosa i parse ku tur kos ta kla. Levi Carolus di Wild Cats ta rumbo pa Santa Maria. Nos ta keda te aki pa awe.
