Lesadónan di Deporte Kòrsou, bondia i felis siman. Nos tei atrobe kargá ku informashon di Beisbòl, Beisbòl Veterano i Sòftbòl Slowpitch. Den Futbòl tambe ta kandela tin kaminda Scherpenheuvel a klasifiká i otronan mester lucha formal djarason awor. Pa loke ta trata Beisbòl klase A, ekipo The Champs fundá pa Glenn Pieternella algun aña pasá a promové pa Beisbòl Dòbel A. Parse ku nan mester tin 10 hungadó di Dòbel A pa nan por hunga Dòbel A den 2021.
* * * * *
Si asina mes, The Champs a dal Royal Magic ku skor di 17 pa 9 djasabra anochi i subi pa Beisbòl Dòbel A. The Champs bou di direkshon di Emile Haswell Sr. a gana 4 wega den e seri i pèrdè 1. The Champs a gana wega number 1 ku skor di 8-7, pèrdè wega number 2 ku skor di 14-9. Despues The Champs a gana weganan 3 (13-7), wega 4 (8-6) i wega 5 (17-9). The Champs tin hopi trabou pa hasi pa kompetí den 2021 den Beisbòl Dòbel A. Despues di hopi aña Beisbòl Dòbel A ta bai bèk na 8 ekipo. Pabien na fundadó di The Champs, Glenn Pieternella i su crew ku promoshon di su ekipo pa Beisbòl Dòbel A. Mandando e kolumna aki nos a tuma nota ku Dream Team a laga Suffisant Eagles den tereno empatando e serie na dos riba homerun di Jonaikel Castro Arias. E homerun tabata kontra Alexander Rodriguez.
* * * * *
Suffisant Eagles a dal Dream Team den dos wega sigí i falta un wega mas pa bira kampion di Sòftbòl Maskulino. Antes tabatin Dòbel A i Klase A. Un tempu Klase B tambe. Asina popular e deporte Sòftbòl Maskulino Fastpitch tabata. Despues ku Slowpitch a krese i mas último añanan e asuntu di komersial, Fastpitch a keda hopi aña sin organisá kampionato. E ánimo ku tin ku varios hungadó na nivel di Dòbel A i na nivel di selekshon por spera ku Sòftbòl Maskulino Fastpitch por krese bèk. Nos lo sigi e desaroyonan djaserka. Dream Team a gana djaluna i fòrsa wega number 4.
* * * * *
Djabièrnè e hungadó Jegveny Hendrik a dal dos homerun, empuhá 4 kareda pa Suffisant Eagles gana e promé wega di final di Sòftbòl Maskulino Fastpitch. Suffisant Eagles a pika dilanti 1-0 den e seri mihó di 5 ganando Dream Team 11-10 ayeranochi den Buena Vista Ballpark. Tabatin 8 homerun den e wega di djabièrnè anochi. Ekipo Suffisant Eagles a konektá 5 homerun i Dream Team 3 homerun. Un wega emoshonante i bon bringá tur dos banda. Dream Team pèrdí 11-8 a nota 2 kareda den nan último chèns pero keda nèt kòrtiku.
* * * * *
Trahando e kolumna aki nos no a rsibí resultadonan ainda di Liga 60 ku tabatin dos wega na Frank Curiel Ballpark. Siman pasá Nos Tambe Por a gana di Nos Power 7-2. Te ku ayera Nos Tambe Por i Lions tabata invikto i nan mester a enfrentá otro. Nos Tambe Por manera ya ta konosí ta kargá ku yen di èks superstar ku tin nèt 60 aña òf ta hopi serka di 60 aña. Emile Haswell (avg. 769), Renato Anasagasti (.545), Song Sofia (.462), Naai Hooi (.625), Norwin Moesquit (.800). Varios veterano mas ku average haltu, Jero William (.467), Richard Coffie i Myron Clara (1000, 2 turno).
* * * * *
Despues di weganan di Liga 60+ di ayera lo sigi play-off e wikènt benidero. Keda pendiente pa resultadonan i skèdjel di play-off ku mester tuma lugá djadumingu awor na Frank Curiel Ballpark. Promé ku e wega di djadumingu ekiponan Nos Tambe Por i Lions tabata empatá na promé lugá ku 6 wega gana i 0 pèrdí.
* * * * *
Serie Mundial kayente entre Los Angeles Dodgers i Tampa Bay Rays. Seri a empatá na 2 wega djasabra anochi. Hopi fayo riba e último lansamentu/bataso di wega pa e defensa di Dodgers. Fayo 1: centerfielder ta wak koredó, kara ta leu for di bala. Esei ta eror, e por pasa. Fout 2: primera no por a traha un linea entre e, centerfielder i kètcher (komprondibel). Esei a pone ku kètcher a kuminsá move pa rèks promé ku e bala a yega, despues bai links, bala a bolbe bini na rèks (riba backhand) dal bai. Fayo 3: Kenley no a bai kubri foi tempran den teritorio foul entre tersera i home òf na home plate. Fout 4: Un tiru poko habri di primera base (komprendibel). Fayo 5: Kètcher ta bai tag purá sin tin bala. Hopi mas, nos ta bini bèk despues. Kenley tabatin bon lansamentu, poko di malu riba dos hit no masha duru batí.
