Fanátikonan di Extra Slowpitch, nos tei atrobe, sea bon dia, bon tardi, bonochi. Nos tei konstant manera tur siman ku informashon di Sòftbòl Slowpitch i Beisbòl Veterano. Varios wega di Slowpitch i Beisbòl Veterano a keda suspendé den fin di siman. Djadumingu no tabatin wega niun kaminda. Weganan di Beisbòl Dòbel A tambe a keda suspendé. Beisbòl Veterano segun nos a hunga un wega so djasabra. Nos ta pendiente di e resultado di e weganan di Beisbòl Veterano ku a tuma lugá. Weganan di 60+ tambe a keda suspendé i den 50+ na Van Engelen Ballpark tabatin dos wega so.
* * * * *
Deporte Kòrsou no a tende di Liga van Engelen pa 2020. Rumornan ta indiká ku no tin Liga van Engelen pa 2020, pero nos no a tende nada ofishal. Trahando e kolumna aki mes nos lo tuma kontakto ku Sergio Leon mas den lat. Liga Amstel si a start den gran forma ku bon públiko djasabra na Van Engelen Ballpark. Dimes tabatin Liga 50 tambe den banda ei kaminda veteranonan ta dibertí i kompetí tòg na serio. Bombers, super kampion di Liga Amstel, a sali brabu ku viktoria pa nòkout riba Gamers. Kenny Hellement alias Refuse to Lose a tira 6 ponche den 6 inning. (Ta Beisbòl mes anto). Kenny tabata tira Slowpitch òf mihó bisá modified Slowpitch kontra pichernan velos di Gamers manera Emilio Velarde i Selvinson Angelista. Na momentu ku e pichernan tabata tira duru, batiadónan di Bombers ku ta hunga Slowpitch i Beisbòl tambe tabata topa e balanan fásilmente duru riba hende.
* * * * *
E wega a terminá ku homerun di Julius Veeris ku tambe por tira modified, anto basta fèrfelu. Kompetensia lo bai bira fèrfelu den Liga Amstel ku ekiponan manera Cicoza, Thrillers i X-Treme den akshon. Djasabra na momentu ku abo komo fanátiko ta bai Van Engelen Ballpark, kuminsá buska lugá di parker pafó. By the way, djadumingu nos a pone skèdjel i skibi den www.deportekorsou.com ku ekipo Jaws di Liga 50 tin rekòrt di 1-1. Ta resultá ku Jaws tin 2 ganá I 1 pèrdí. Game Changer no a duna nos e weganan di e promé wikènt di sierto ekiponan. Den e promé wikènt ekipo Jaws a sorprendé Pitufos.
* * * * *
By the way, Jaws a pèrdè varios hungadó di klase, entre otro Persey Schoop ku a bai Catpower huntu ku Gerald Mathilda, pero e ekipo Jaws ta fuerte i ta batiendo masha hopi hit mes. Djasabra nan a bati 14 hit kontra di Marlins i pèrdè tòg. Kandela entre Ban Serio i ekipo Pitufos a keda suspendé for di promé inning debí na palu di awa ku a kai. Pitufos a habri ku Naai Hooi, e velos picher 60+ den Sòftbòl 50. Segun nos Naai tin 61 aña i ainda e ta un kos serio. Naai no sa habri wega masha. Hopi hende mes na Van Engelen Ballpark pa mira Naai kontra di Ban Serio. Nos ta keda te aki ku nos kolumna, pendiente pa kontesta di komienso di Liga van Engelen i Liga 40. Awe 30 di yüli Gilbert Avastia eks estrea tersera base ta di fiesta i Maria Leollina, nos tanta fanátiko di Jandoret Raiders tambe di fiesta awe.
