Lesadónan di Deporte Kòrsou bon dia. Nos tei atrobe ku informashon di Sòftbòl Slowpitch i Beisbòl Veterano. Desishon a kai den Gobièrnu ku ta hasi toke di keda mas lat i alabes ta kita lei seku. Pa loke ta trata deporte mes nada konkreto òf mihó bisá no por tin aktividat di deporte ainda. Por tin si, pero sin fanátiko i sin fanátiko no ta kumbiní kasi niun federashon di deporte di konhuntu manera Beisbòl i Sòftbòl Slowpitch pa organisá wega.
* * * * *
No ta konosí ainda ku e wega entre Jandoret Raiders i ekipo Quality Stars lo sigi fin di luna aki. Parse ku no por tin deporte ku fanátiko, ké mèn e situashon a keda status quo. Organisashon The Greatest a manda un komunikado ofishal, kaminda nan ta partisipá ku e torneo no ta tuma lugá den 2021. Nan a skibi ku lamentablemente pa motibu di e situashon aktual, kaminda no ta pèrmití aglomerashon di hende, no por organisá e torneo. Organisashon The Greatest ta spera ku e situashon lo bira normal bèk den 2022 pa asina por organisá e torneo.
* * * * *
E siman aki nos a topa ku Fety Curie ku ta duru riba whatsapp awor. Fety Curie a bisa nos ku ekipo Jaws 60+ lo haña picher Manolo Gomez for di Nos Tambe Por. Tin mas sorpresa na kaminda pa ekiponan di 60+. Fety ta mira Nos Tambe Por hopi duru den e próksimo añanan, pero Jaws lo tin e formula pa gana ekipo Nos Tambe Por. Fety tin masha hopi artíkulo i historia di Slowpitch. Nos tabatin e map i nos a saka basta informashon di pasado di Slowpitch.
* * * * *
Nos ta bai bèk den tempu, tempu di gloria di Torneo Kopa Joy Alberto tur aña den lunanan yanüari i febrüari. Ekiponan tabata bini for di Aruba i for di Hulanda pa partisipá na e torneo i probechá wak Festival di Tumba i marchanan di Karnaval. Na 2003 e ekipo Warwaru a bini for di Hulanda. E aña ei dos hungadó tòp di e ekipo di Warwaru a reforsá Baranka. Tabata Angelo Clementina i Sandy Reina, tur dos èks Baranka a bini ku Warwaru i hunga pa Baranka. E tempu ei Randal ’Chulo’ Simon lo a hunga den e torneo i Myron Wijman a hunga pa e ekipo Warwaru. Maichiel de Roon tambe a hunga pa Warwaru e tempu ei.
* * * * *
Gerschwin Leuteria, otro hungadó di kaliber, gran hungadó tempu di su tempu tambe a hunga pa Warwaru. Nos ta kòrda Win Leuteria ku a subi na final di añanan 70 ku e ekipo di Santa Maria na un edat hopi hóben. E tempu ei hungadónan hóben no por a hunga fásil den Dòbel A. Bo mester a kumpli 18 aña òf bo mester keda evaluá. Gran kètcher tempu di su tempu ku a hasi estrago den Beisbòl Dòbel A ku Santa Maria pero un temporada kòrtiku. E piratanan tabata kargá ku prospekto den Dòbel A manera Richi Jakoba, Jacky Jakoba, Song Sofia, Renato Anasagasti, Siegfried Liberia, Sor Moesquit ets.
* * * * *
Boso ta kòrda torneo entre Bankonan ku tabata tuma lugá na Kòrsou i Aruba. Ekiponan di Banco di Caribe, MCB, CITCO, RBTT (Awor RBC ets.). Aruba tabata bini ku ekiponan di Aruba Mercantile Bank ets. Aworaki ta Torneo SKAK ta manda kaminda ekipo komersial ta hunga na Kòrsou i Aruba tur aña den luna di ougùstùs. Nostalgia debí ku aworaki tur kos ta wanta pendiente kiko ta bai pasa den e pandemia Covid-19 aki.
* * * * *
Bayendo pa Beisbòl riba nivel Dòbel A un ratu, Royal Scorpions ta duru tras di e shortstop Jonaikel Castro Arias di Groot Kwartier Stars. Royal Scorpions ké un shortstop ku ta bati. E shortstop Urwin Juaquin tin mihó defensa ku Castro Arias, pero Castro Arias ta tremendo batiadó ku tin poder. Kuerpo tékniko i algún fanátiko di Royal Scorpions ta pensa ku training e defensa di Jonaikel Castro lo bira muchu mas mihó. Parse ku Groot Kwartier no tabata train manera mester ta i esei a pone ku Jonaikel su defensa den short a kai un tiki. Ekiponan di Beisbòl Dòbel A ta ketu. Tin vershon ku presidente di FEBEKO ta bai drenta polítika. Basta éks presidente di FEBEKO ta ainda den polítika. Nos ta keda te aki pa awe.
