Lesadónan di Deporte Kòrsou bondia. Laga nos bai rápido riba e kos ku nos gusta ku ta deporte, muy enespeshal Sòftbòl Slowpitch i Beisbòl Veterano. Tin un ekipo mas ku ta interesá pa bai Liga 50 di Beisbòl Veterano. Nan ta buskando algun hungadó mas pa sera entre 15 pa 20 hungadó pa nan bai dibertí i kompetí tur djadumingu mainta na Vi Jansen Ballpark òf un otro parke. By the way, un grandi di nos, un Big Leaguer lo bai tuma e parke na Emmastad over. Ta trata di e parke di UTS pabou di ofisina di Belasting na Groot Kwartier/Emmastad.
* * * * *
Pa otro aña Liga 50 di Beisbòl tin varios parke pa nan por move ariba. Ta bai tin moveshon serio pa drecha Heintje Kool Ballpark tambe. Den añanan ku ta sigi e parke di Muizenberg (Andruw Jones) tambe lo ta disponibel pa ekiponan di Beisbòl por move. Liga 50 tin Jandoret Raiders, Sigi Hunga, Yesterday, Vosama, probabel ekipo di Dolfi Mercera i ekipo nobo (Otrabanda) den 2021. Tabata pendiente pa Blue Hawks di añanan 80 dirigí pa Junny Obispo tambe. Oh…. 7 ekipo di 50+ di Beisbòl. Dimes si e kos bira banda di 6 pa 7 ekipo, mesora elo krese. Na 2017 tabatin 4 ekipo, na 2018 no tabatin kampion i na 2019 Jandoret Raiders a bira kampion. Na 2017 tambe Jandoret Raiders a bira kampion ganando di ekipo Yesterday. Un kombinashon di Azucar i Santa Maria enkabesá pa Raymond Alle a hunga torneo na 2017 na Heintje Kool Ballpark. Despues tabata Allee komo úniko hungadó di Santa Maria tabata bai e weganan di kampionato. Allee tabatin un nòmber speshal pa e ekipo ei. Saludo pa Raymond ‘Ke Mi Bon’ Allee.
* * * * *
Siman pasá direktiva di Sòftbòl Liga 50 a reuní na kas di presidente. A tuma desishon ku lo manda karta pa ekiponan pa otro siman, pa despues tuma un posishon, dependé kiko Gobièrnu anunsiá pa loke ta deporte próksimo dianan. Den komunikadonan anterior tabata menshoná medidanan tumá pa deporte tambe, pero e último komunikadonan no tabatin nada di deporte adén. Tene kuenta ku nan Kòrsou i tur kaminda na Mundu deportenan ta sigi den desèmber i yanüari normal. Riba mesa lo bini ku ta kaba e kampionato di Liga 50 di 2020 òf ta start di nobo. Naturalmente ta rekomendabel pa terminá esun di 2020, pa despues start ku esun di 2021. Tabata falta algún wega pa kaba promé buelta i por hunga play-off mesora, ké mèn hunga un buelta so. Lo por saka un kampion den dos pa 3 siman. Nos ta keda pendiente.
* * * * *
Danki pa e reakshonnan ku nos ta risibiendo for di Aruba bayendo bèk den tempu ku Sòftbòl Slowpitch. Tempu di gran podernan manera Aldrin Maduro, Carlos Croes, Pooy Flanegin, Richard ‘Nunn’ Flanegin, Aldrin Acosta ets. Ekiponan Survival, Happy Brothers, Gess Power, ets. Nos ta kòrda un wega final di Baranka vs Carpatula na Boneiru kaminda Baranka a nòkout Carpatula 22-8 na 2003. Na Kòrsou e aña promé Carpatula a dal Baranka. Den e final ei na Boneiru 2003, Gregory Reina a dal 3 homerun, Luigi Virginia i Bani Coffie a dal dos homerun. E tempu ei Baranka tabatin Wim Felicia, Gino Valeriaan, Luigi Virginia, Marlon Paz, Andry Plaate, 3 ruman Reina ets. Carpatula tabatin Beer Adelina, Guus Barhorst (QEPD), Angel Brunken, Ivor i Vernon de Lanoi ets. Baranka den e Kopa ABC ei na Boneiru a reforsá ku Bani Coffie, Rubelyn Nicasia i Raikel ‘Polè’ Ignacio. Varios hungadó ku bo no ta tende masha di nan mas.
* * * * *
Djaluna awor tin reunion di BEVEKO pa pone un fecha pa e gran final òf mihó bisá e parti final di e wega entre Jandoret Raiders i Quality Stars. Tin indikashon ku e wega lo bira sin fanátiko, ké mèn kompletamente sin fanátiko na Tio Daou Ballpark. No ta konosí si ta alkansá e fecha di 31 di yanüari. Pero mas pronto posibel lo terminá e wega entre Jandoret Raiders i Quality Stars ku a keda empatá na 6 kareda den kabes di e di 7 inning dia 6 di desèmber 2020. Nos ta keda te aki pa awe.
