Lesadónan di Deporte Korsou bondia i felis fsiman. Beisbòl Veterano lo hunga Round Robbin, faltando dos fecha i den Liga 60 lo start ku play-off page system. Den e kolumna aki nos tin e skèdjel un biaha mas di e dos liganan aki. Liga 50 a wanta te otro aña i lo tin un kampionato kompletamente di nobo. Pa loke ta trata Liga Amstel nos no tin mas detaye kiko ta bai para ku e weganan ku ya a tuma lugá. Liga 40 a wanta kompletu e aña aki i Liga van Engelen tambe a wanta.
* * * * * *
Nos ta pendiente di informashon di Liga di Nos Tur ku a start ku play-off promé ku kosnan wanta pa motibu di e di dos ola di COVID-19. E aña aki no tabatin Liga Streanan di Ayera ku tabatin un eksitoso kampionato 2019, kaminda pa promé biaha a hunga Liga 50+ di Sòftbòl Femenino Veterano. Beisbòl Veterano lo bai Tio Daou dianan 1 i 8 di novèmber, pero parse ku direktiva ta pendiente di gobièrnu pa wak kiko ta bai pasa ku e maneho di deporte pa bai bèk Vi Jansen Ballpark. Hopi a baha pisá riba e fanátikonan di Vi Jansen Ballpark, pero a lubidá ku ta un tereno ku por mira e wega for di un distansia basta leu sin aglomerashon. Ya.. direktiva a sigi òrdu di grandinan i a move pa Tio Daou Ballpark sin fanátiko, pero kaminda dirigentenan di ekiponan por drenta stadion. Niun hende na Mundu nos sa ki dia kos lo normalisá pa loke ta trata COVID-19.
** * * * *
Skèdjel di Beisbòl Veterano ta lo sigiente djadumingu awor: Bulldogs ta topa ku Jandoret pa 10.30’or, sigí pa Santa Maria vs Quality Stars pa 1’or i finalmente Isla Crackers kontra Santa Rosa Memories den e wega di 3.30’or na Tio Daou Ballpark. Ora solo baha ta fèrfelu pa e primera base hèndel tirunan for di shortstop i tersera base. En todo kaso Beisbòl Veterano ta super kayente ainda. Niun ekipo no a sigurá nan klasifikashon. E situashon ta hopi pèrtá, fèrfelu ku tres ekipo ku rekòrt di 2-1 i e otro tresnan tin rekòrt di 1-2. Santa Rosa, Quality Stars i Jandoret tin rekòrt di 2-1. Bulldogs, Santa Maria i Isla tin rekòrt di 1-2. Tur 6 ekipo tin chèns di klasifiká, tur 6 ekipo tin chèns di keda afó i remarkabel ta ku tur ekipo tin kalidat pa gana di otro.
* * * * * *
Ban pa Liga 60 kaminda ekipo Nos Tambe Por ta gran faborito. Play-off Liga 60 ta start djadumingu 1 di Novèmber na Frank Curiel Ballpark. 1’or ekipo Nos Tambe Por (number 1) lo topa ku Lions (number 2). Pa 3’or pm Los Amigos ku a sali number 4 lo hunga kontra Jaws ku ta number 3. Lo hunga play-off sistema page i tur play-off ta solamente un wega. Ganadó di 1 vs 2 ta pasa pa final dirèkt i e pèrdèdó lo topa ku e ganadó entre 3 i 4. Ekipo Nos Tambe Por ta invikto ainda i ta rumbo pa bira kampion invikto. Saludo pa Emile Haswell Sr. ku a sali kampion bate di temporada regular.
* * * * * *
Awe nos tin algun detaye di e seri final di Sòftbòl Maskulino Fastpitch ku tabata super dramátiko. By the way, masha hopi seri a bai wega finalísimo e aña aki. Den Beisbòl Dòbel A, tur seri a bai wega finalísimo. Den final di Sòftbòl Maskulino Fastpitch a bai wega finalisimo, wega number 5. Suffisant Eagles, ekipo kargá ku estrea di Beisbòl Dòbel A, a bai dilanti den e seri 2-0 ku viktorianan di 11-10 i 5-2. Dream Team a gana e sigiente 3-nan ku viktorianan di 14-9, 8-4 i 9-8. Wega 14-9 a terminá den èkstra inning, wega number 4 a terminá den di 7 inning riba walk-off di Jonaikel Castro Arias di Dream Team. Juruengelo Thielman di Suffisant Eagles tabata lider di batiadónan den play-off. Jonaikel Castro Arais a empuhá 14 kareda den play-off. Alexander Rodriguez number 1 den picheo ku ERA di 3.00. Alexander Rodriguez i Frensel Meyer tabata empatá den ponche tirá ku 44. Frensel Meyer a tira den tur e último 4 weganan di Dream Team. Awor mester kuminsá pensa di traha riba un selekshon. Selekshon di Aruba a biaha tur aña ku esepshon di aña 2020 debí na COVID -19.
