DIREKTIVA DI FFK TA SIGUI KONSEHO IREVOKABEL DI KOMISHON DI APELASHON RELASHONÁ KU E DISPUTA HUBENTUT FORTUNA- ATLETIKO SALIÑA!
WILLEMSTAD - Direktiva di Federashon di Futbòl Kòrsou a tuma e desishon pa sigui e konseho irevokabel di Komishon di Apelashon (KdA) den e kuestion di Hubentut Fortuna i Atlétiko Saliña. Ku e desishon akí direktiva ta skohe pa e kaminda korekto tantu hurídiko komo organisatorio i ta suprayá e nesesidat pa salbaguardiá e integridat i interes general di nos futbòl. Direktiva nobo di FFK a deklará for di 10 di aprel ku ela keda elegí ku “no por sende lus pafó i laga kas sukú”. Ku esaki direktiva a indiká e importansia pa futbòl lokal por start mas lihé posibel.
Desviá for di e konseho akí di KdA lo nifiká ku ta tacha seguridat hurídiko i oumentá e riesgo pa mas konflikto durante kompetensianan den futuro. Direktiva di FFK ta konfia di a krea klaridat ku e desishon akí. Koperashon di un i tur ta krusial p’asina nos por reanudá kompetensia lokal di futbòl mas pronto posibel, direktiva di FFK ta pidi tur miembro i gruponan di interes pa nos ban ‘focus’pa dilanti i mantené nos na futuro di nos futbòl i hasi e intermediashonnan nesesario pa lokual a pasa e delaster 3 añanan no sosodé nunka mas. E konseho di KdA ta enserá ku tur partido ku a keda hungá i nan respektivo resultadonan por keda konsiderá komo definitivo. Konkrektamente esaki ta nifiká ku resultado di e partido di 11 di desèmber 2022 entre Atletiko Saliña i Hubentut Fortuna ta keda intakto: esta tres punto pa Atletiko Saliña i sero punto pa Hubentut Fortuna.
A base di e echonan akí lo sigui organisá e kompetensia den futuro. Pues FFK lo no realisá e desishon number 1 (5 sèptèmber 2023) ni desishon number 2 (15 febrüari 2024) di e Komishon di Arbitrahe, ku entretantu a keda disolvé. E resultadonan di e kampionato 2021 i 2022 di e di dos divishon ta keda stipulá i mester sirbi komo punto di salida pa kompetensianan di futuro, inkluyendo e kambionan di ekiponan di un divishon pa otro. FFK a tene 2 reunion general kaba ku miembronan enkuanto kuminsamentu di kampionato 2025/2026, kaminda 7 di e 9 reglamentunan kardinal pa por start a kampionato 2025/2026 a keda aprobá pa miembronan, djárason último 24 di òktober a aprobá e penúltimo reglamentu i djárason promé di òktober próksimo lo aprobá e último reglamentu i tambe hasi e sorteo pa di e forma akí e kampionato nashonal maskulino por start djadumingu 12 di òktober ku e promé wega. Kampionato hubenil i femenino tambe lo inisiá den luna di òktober 2025.
Tur desishon relevante i dokumentunan ku ta pertenesé lo keda komuniká awe djabièrnè 26 di sèptèmber pa medio di e kanal ofisial (OO) ku miembronan di FFK. Dunando e direkshon i klaridat akí FFK ta dal un paso importante pa trese pas, trankilidat i struktura pa interes general di nos futbòl lokal na Kòrsou.
26 sèptèmber 2025.
