Informashon for di Juegos Centro Americano i Del Caribe na EL Salvador
SALVADOR - Fecha djamars dia 4 yüli 2023, tabata dia ku Kòrsou tabata parti di kompetensianan, den sòftbòl, arkeria i atletismo, den Weganan Sentro Amerikano i di Karibe 2023, na El Salvador.
ATLETISMO
E atleta Matthew Sophia, tabata e promé di e 3 atletanan pa kompetí den representashon di Kòrsou, den eventonan di atletismo.
Tabata den oranan di atardi, ku Matthew Sophia a kore den buèlta klasifikatorio, riba 110 meter ku opstákulo. Tabata kareda ku a konta ku partisipashon di 5 atleta.
Despues di tabata komandando, durante di e promé meternan, Matthew Sophia, ta krusa liña final komo e di 3 koredó, ku tempu di 13.83 sekònde, pa asina klasifiká pa final, ku lo kore djarason dia 4 yüli 2023.
E atleta YDK a krusa liña final, tras di e atleta di Barbados, Shane Brathwaite, ku a marka tempu di 13.76 sekònde, pa gana e kareda, miéntras ku e atleta hamaikino Odzario Phillips, ku a keda na di 2 lugá, a marka tempu di 13.79 sekònde.
E kareda final riba distansia di 110 meter ku opstákulo, lo kore awe 10 pa 7 di anochi, ku ta 10 pa 9 di anochi na Kòrsou.
E atleta Sophia, a kore ayera, ku miembronan di e ekipo di sòftbòl femenino den stadion, huntu ku demas dirigentenan i miembronan di prensa i di e kuerpo médiko, kende huntu a duna e atleta YDK e sosten, durante di e kareda.
ARKERIA
Seguidamente tabata e atleta Martijn Schoon, ku a kompetí den arkeria pa Kòrsou i a keda eliminá, despues di a klasifiká djadumingu último, den e buèlta preliminar.
Ta trata aki di e deporte di flecha, den kompetensia riba distansia di 70 meter. Schoon tabata den kompetensia di oktavo final buskando su pase pa kuartfinal.
Martijn a topa ku e atleta Oscar Ticas di El Salvador, den un kompetensia perta i emoshonante i finalmente ku skor di 6-2, ta keda kortiku.
Tabata un kompetensia konsiderá un revancha, despues ku tabata na aprel último, ku Martijn a pèrdè ku Ticas pa nokout.
E atleta di kas, Ticas ta number 7 di region i e di 12 riba ranking mundial.
Pues un eliminashon, unda ku e resultado tòg tabata un bon logro, pa tantu e atleta, komo su coach.
SOFTBOL FEMENINO
E selekshon di sòftbòl femenino a sufri derota ku skor mínimo. Tabata den wega ku nan a enfrentá e selekshon di Mexico, kual tabata un lucha pa e di 2 puesto di grupo B.
Esaki den e buèlta klasifikatorio pa por a logra e pase den lucha pa por alkansá medaya.
Sinembargo den un wega bon bringá, ku J’dah Girigorie, tirando un bon partido i a permití un bataso di kuater skina kontra for di den promé entrada, kual tabata sufisiente pa e resultado final.
Mexico ta gana di Kòrsou ku skor di 1-0, ku un atake di 4 hit. Kòrsou a konektá 3 hit, unda 2 tabata di Anaise Piar i e otro di Genvieve Hariquez.
Ku e resultado aki, Mexico ta klasifiká di 2 di grupo i ta entre e 4 nan pa lucha pa medaya, miéntras ku Kòrsou lo lucha entre e 4 nan pa puestonan 5 te ku 8 di e evento.
Kòrsou lo ta den akshon atrobe, unda ku e orario ainda no ta konosí, debí ku tabatin wega ku no a mira akshon debí na yobida, kualnan lo sigui den promé ora riba djarason dia 5 yüli 2023.
Komunikado djaluna 3 yüli 2023
Riba djaluna dia 3 yüni 2023, atletanan di Kòrsou tabata den akshon den tantu tènis, komo den sòftbòl femenino, na El Salvador. Esaki komo parti di e evento di Weganan Sentro Amerikano i di Karibe 2023.
TENIS
Den tènis, e tenistanan Aydan Gomez Osorio i Laurens Deelstra a mira akshon den wega di kategoria dòbel. Ta trata aki di e wega ku no a finalisá djadumingu último, dia 2 yüli 2023.
Esaki a wòrdu hungá den oranan trempan di mainta na Kompleho Deportivo Merliot, unda ku e duo for di Kòrsou a logra viktoria riba e duo for di Puerto Rico, formá pa tenistanan Gabriel Evans i Marko Mesarovic.
Tabata triunfo ku skor di 4-5, 5-4, 10-4, kual a pone ku Kòrsou a avansá pa kuartfinal.
E enkuentro aki a mira akshon den oranan di atardi, unda ku Aydan i Laurens a enfrentá e duo for di Venezuela, formá pa tenistanan Brandon Perez i Ricardo Rodriguez. Despues di un lucha fuerte, Kòrsou ta kai vensí 6-3, 6-3 i ta keda eliminá.
Despues di e aktuashon di nos tenistanan, ta pendiente awor si nan lo klasifiká pa ‘Nations Cup’. Esaki lo bira konosí djamars dia 4 yüli 2023. Lo bira evento ku ta tuma lugá djarason dia 5 yüli 2023.
SOFTBOL FEMENINO
Den sòftbòl femenino e selekshon di Kòrsou a resultá viktorioso den wega bálido pa grupo B, ku a hunga den stadion Pablo Arnoldo Guzman. Kòrsou a topa i gana di Guatemala, pa blankeo ku skor mínimo.
Kòrsou a anotá 1 kareda, konektá 5 hit i a kometé 1 eror.
J’dah Girigorie a picha den gran forma durante di 7 entrada kompletu, pa logra e triunfo pa Kòrsou. Miéntras ku Thaima Maximiliana a konektá 2 di nos 5 hitnan. Deidra Da Costa Gomez a anotá e úniko kareda di wega, ku a keda empuhá, riba hit di Julisse Koffy. Anais Piar i Tanisha Gill tambe a konektá di hit pa Kòrsou. Guatemala no a anotá, konektando 5 hit i no a hasi eror.
Ku e resultado aki, Kòrsou tin un triunfo i un derota, miéntras ku Guatemala a sufri nan di 2 derota den grupo B. Den e otro wega di grupo B, ku tambe a mira akshon, Cuba tambe a gana Mexico 1-0.
Cuba ta enkabesá grupo B, ku 2 triunfo sin derota i Mexico tambe ta keda ku un viktoria i un derota. Esaki ta pone ku Kòrsou ta topa Mexico awe, pa 3’or di atardi ora di Kòrsou, den wega importantísimo, pa ku futuro den e torneo, pa por keda ku speransa pa por ta den premiashon.
