Informashon resultado i stènding di Futbòl FFK

Informashon resultado i stènding di Futbòl FFK

DICK ADVOCAAT A BIRA ENTRENADÓ DI SELEKSHON DI FUTBÒL KÒRSOU!

Entrante djaluna 15 di yanüari, sr. Dick Advocaat ta fungi komo entrenadó di e selekshon di futbòl maskulino di Kòrsou. Manera Federashon di Futbòl Kòrsou a anunsiá riba 3 di yanüari último, pa algun tempu kaba tabata hiba negosashonnan ku sr. Advocaat pa e fungi komo entrenadó di selekshon nashonal di futbòl maskulino di Kòrsou. Pa por a logra esaki tabata esensial pa Kòrsou por a yega na un Direktor Tèkniko promé i for di ayera, 14 di yanüari, despues ku sr. Khalid Sinouh a keda apuntá komo tal, negosashonnan a sigui i finalmente por a firma e kontratonan ku sr. Advocaat.

‍
Sr. Advocaat lo fungi komo entrenadó i aparte di su persona a kontratá tantu sr. Cornelis Pot pa forma parti di su staf komo e entrenadó asistente i sr. Kees Jansma ku lo ta enkargá ku prensa i media pa e selekshon nashonal di futbòl maskulino i tambe ‘sponsoring’. Na momentu ku sr. Advocaat a firma el a ekspresá bisando: “Mi ta kontentu di por kontribuí na e desaroyo di futbòl di Kòrsou. A dura largu pa yega asina leu pasó e direktiva aktual di FFK kier a kaba di regla tur asuntu interno promé. Mester a paga hungadónan, mester a kita e debenan di e organisashon, mester a buska spònsernan nobo i tambe gana konfiansa bèk. Ta parse ku esaki a logra i mi ta wak e totalidat aki komo un bunita aventura. Lo ta sigur hopi bunita pa mira kon un grupo di algun eksperto di edat, por bai logra hasi algu bunita pa Kòrsou voral durante e periodo ku nos tei komo despues ku nos bai. Nos por laga Kòrsou ku un organisashon stabil i ku un selekshon fenomenal”.

‍
Dia 27 di yanüari próksimo FFK lo tene un konferensia di prensa p’asina introdusí tantu e Direktor Tékniko nobo pa e na su turno por presentá e staf di entrenadó i médiko pa e selekshon nashonal maskulino di Kòrsou.

KHALID SINOUH APUNTÁ KOMO DIREKTOR TÉKNIKO DI E SELEKSHON MASKULINO DI KÒRSOU!
Federashon Futbòl Kòrsou a apuntá sr. Khalid Sinouh komo e próksimo Direktor Tékniko di e selekshon di futbòl maskulino di Kòrsou. E desishon aki ta forma parti di e esfuersonan di e direktiva di FFK, pa Kòrsou por kualifiká pa Mundial di futbòl di 2026.
E Direktor Tékniko nobo di Kòrsou tin diferente tarea pa kumpli kuné i un di e tareanan di mas importante ta pa yega na un entrenadó nobo pa e selekshon nashonal maskulino di Kòrsou.
E negosashonnan ku sr. Dick Advocaat pa bira e siguiente entrenadó ta tumando lugá kaba manera FFK a anunsiá den su komunikado di 3 di yanüari último i ta na sr. Sinouh pa kaba di finalisá e negosashonnan i apuntá e entrenadó nobo konforme e petishon di direktiva di FFK.

‍
Sr. Sinouh tin komo tarea tambe pa reforsá e selekshon nashonal maskulino huntu ku e entrenadó nobo p’asina por logra éksito ku e di dos i e di tres ronda di kualifikashon pa Mundial di Concacaf ku ta bai kuminsá den luna yüni 2024.
E Direktor Tékniko di Kòrsou, aparte di tin e tarea di por apuntá un entrandó, skout, staf tékniko i médiko, tin e responsabilidat tambe pa finalisá e kontrato di trabou di nan tur si esaki ta nesesario. Ademas, tur e tareanan lógistiko manera biahe, pagonan diario i estadia ta na su enkargo. E reklutamentu di hungadónan ponensial tambe ta parti di e tareanan di e Direktor Tékniko lòs di e tarea di krea raportahenan pa informá direktiva di FFK di e desaroyonan.
Dia 27 di febrüari próksimo FFK lo tene un konferensia di prensa p’asina introdusí tantu e Direktor Tékniko nobo i pa e na su turno por presentá e staf di entrenadó i médiko pa e selekshon nashonal maskulino di Kòrsou.

‍

KON E SITUASHON TA KU ELOY ROOM?

Skibi pa Pepi Sulvaran !
Sekresia
Hopi diskushon rondo di selekshon di futbòl. Di un banda esei ta normal, paso ta algu di pueblo i mester tin kontròl pa no bende nos gatu na saku. Ta reina manera un sekresia rondo di selekshon. Komo no ta habri konferensia di prensa pa por sa, kiko eksaktamente e intenshon ta ku por ehempel Advocaat, e fanatiko ta dependé di prensa Ulandes, pa por sa kiko e intenshon ta. Asina ta, ku ta e dos korantnan mas grandi i e revista di futbòl di mas grandi na Ulanda a publika ku Advocaat ta bin ku amigunan di hopi edat ku ta penshonado, komo parti di su kuerpo tekniko. (By the way mientras tantu FFK a aunsiá Dick Advocaat ofishalmente komo direktor tékniko i Khalid Sinouh komo general manager.). Awor tin papia di un agente chiki di hungadó na Ulanda komo skout of ta direktor tékniko di nos selekshon, un tal Khalid Sinouh. Kaminda tin Dean Gorré den servisio paga kaba. E notisia ei no a wòrdu refuta, ke men nos ta sali for di e punto di bista ku e ta korekto. Esaki tambe ta lanta pregunta serio kon bin?

‍

Kon e situashon ta ku Eloy?
E pregunta grandi aki mes, ahinda no tin kontesta. E último 5 weganan di ‘Pantera Negra’ Eloy tabata ousente. Ni Eloy ni FFK no a duna motibu. Eloy sin duda ta e hungadó di mas importante di selekshon. Sin Eloy ta gol bashi nos ta hunga kontra e paisnan mas fuerte ku nos mester lucha kune pa e 4 puestonan ku CONCACAF tin disponibel pa mundial 2026. 3 puesto direkto i 1 via repechage. Nos tres otro kipernan (ainda) no tin e nivel. Doornbusch i Bodak ya tin un par di aña komo reserva den di dos divishon Ulandes i Fancito ta un junior den PSV, ku ahinda no sa kon leu e lo yega. Riba papel nos por gana e islanan chiki ku nan den gol, anke esei no ta sigur, paso resientemente nos a pèrdè hasta ku St. Kitts. Pero di tur manera nan no ta kla pa enfrenta e mundialistanan Costa Rica, Honduras, Jamaica, Panama, El Salvador, Haiti i Trinidad. E kontrinkantenan direkto pa un di e 4 puestonan.

Agente di hungadó komo Skout of Manager por ta problema.
Mi no ta kompronde dikon nunka nos no ta informa nos mes promé. Ata e echosnan. Nos no sa kiko e idea ta ku Khalid Sinouh. Un agente chiki di hungadó ku un hende so den servisio. Echo ta ku e no tin niun hungadó grandi aktualmente. Entre e tiki hungadónan ku poko  nòmber  ku e tabatin pa korto tempu ta Brian Brobbey na jong i nos portero Eloy. Pa korto tempu e tabatin Jeremy Antonisse tambe, ku tambe a hala kita for di dje. Dikon no a puntra Eloy ku Antonisse promé ku a aserké ta ku ken nos ta bai guera. Tin tur motibu pa esei. Un kuater aña pasá, a sali den prensa Ulandes ku Eloy a denunsiá ku Sinouh ku e tempu ei tabata su agente ta kana papia kos di Eloy ku no ta kompletamente bèrdat. Ahinda e kos ey ta riba internet. Nos no sa kon nan relashon ta awor, ta pesei mes nos ta simplemente puntra, kon e situashon di Eloy ta pa ku selekshon. Paso si Eloy tin problema ku su binimetu. E no por bin. Nos no sa i pesei ta puntra. Tin un otro di nos hungadónan ku tambe a kibra relashon kune. Jeremy Antonisse. No tabata mihó averiguá ku Room ku Antonisse promé ku bai laman ku un agente di hungadó, lokual riba su mes kaba ta potensial fuente di konflikto. Mester tin un motibu ku tur e hungadónan aki no a keda kune. Brobbey a bai Team Raiola, Eloy a move pa Prosport Management i Antonisse a bai DW Sportmanagement, kaminda Shurendy Sambo ku Nigel Thomas tambe ta.

Konflikto di interes
Riba su mes kaba un agente komo skout of manager tékniko di un selekshon so kaba ta un fuente pa konflikto. Pa esnan ku nos sa. Un agente ta buska hungadó profeshonal komo kliente pa e por haña parti of porsentage di nan entrada. Esei ta su trabou i su pan. Ke men ta hasimentu di negoshi e ta ku hungadó. Kada hungadó tin nan agente i agentenan semper ta buska mas hungadó. Un agente lo wak interés di un selekshon prome ku e wak interés di su negoshi? Na promé lugá e no por ni mag wòrdu pone den un posishon asina, te pa e por kore riesgo di kai den tentashon pa laga su interes prevalese. Den e kaso aki nos no sa tampoko kon e otro hungadónan i nan agentenan ta pensa di e asuntu aki. Ora e bai aserka hungadó nan lo bai pone nan agentenan na altura. E otro agentenan por interpretá kosnan robes i hungadónan ta tende di nan mes agentenan. Si nan agentenan bisanan keda leu for di otro agente, lokual sa sosode, einan por tin un problema pa nos kaba. Nos no sa tampoko kon e relashon ta entre e diferente agentenan ku ta opera na Ulanda i Europa kaminda nos hungadónan pa un gran majoria ta hunga. No ta negativo nos ke ta, pero ta basa nos riba echos i algu ku nos a studia pe na mes instituto ku por ehempel Guus Hiddink i pesei nos ta kritiko, paso e selekshon aki ta di nos tur. Selekshon nos lo keda no solamente sostene semper, pero vigila kritiko tambe. BIBA KÒRSOU.

‍

ULTIMO RESULTADONAN FUTBÒL LOKAL

‍