Lesadónan di Deporte Kòrsou, bon dia i felis siman. Nos tei atrobe ku informashon di Sòftbòl Slowpitch i Beisbòl Veterano. E wega entre Jandoret Raiders i Vosama a resultá un wega riba un banda so, kaminda Jandoret a skor 16 kareda pa gana fásil 16 pa 1. Vosama tabata den gran forma algún dia promé kontra di Quality kaminda e wega a keda empatá na 2. Den standing pa un fayo nos a pone ku ekipo Quality tin un wega pèrdí. Quality ta úniko ekipo invikto den Beisbòl Veterano 2020.
* * * * *
Beisbòl Veterano a sigi ku bon púbiko na Vi Jansen Ballpark. Riba mal defensa di Santa Rosa ekipo Santa Maria tabata dilanti ku skor di 4-0 djadumingu último. Santa Maria a gana despues 5-1. Geronimo Daflaar tabata picher pa Santa Rosa i Amador ‘Shon A’ Nita pa Santa Maria. Ekipo Santa Maria ku Didi Gregorius mesora a bira un kos serio den Beisbòl Veterano. E ekipo a sera formal i nos a mira Nelly Jakoba bèk na segunda pa ekipo Santa Maria. Ramiro Balentina a bai bèk komo kètcher, Raylan Francisca a bai shortstop i Roque Zimmerman komo outfielder. By the way, Jandoret a gana Yesterday den Liga 50 Beisbòl ku tremendo picheo di Gregory Zimmerman ku a debutá komo picher den Liga 50. Gregory Zimmerman tabata e picher ganadó, miéntras Frensel Petronilia e picher pèrdèdó. Ando Cijntje di 2-2 pa Jandoret den 50+. Den dianan benidero nos tin detaye.
******
Sòftbòl 50 a sigi djasabra na Van Engelen Ballpark. Jaws ku tremendo picheo di Paiza Rosario a gana Slugger di Denley Marten ku skor di 8-0. Fernando Rosario a tuma solamente 4 hit den 6 inning kompletu. Un dje gran pichernan di Liga 50. Su ekipo Jaws ta sólido na promé puesto ku rekòrt di 5-2. Un wega basta fásil pa ekipo Jaws ku ta keda den kabes den Liga 50. Den e di dos wega di Liga 50 Marlins a dal Artemisia 5-2. Despues Ban Serio a derotá Catpower 5-2 pa finalmente Pitufos a dal Baranka Sharks fásil 11-6.
* * * * *
Despues di mas o ménos 8 siman di kompetensia e standing ta lo siguiente. Jaws 5-2, Marlins 5-3, Ban Serio 4-2, Flamboyan 4-3, Artemisia 3-3, Pitufos 3-3, Baranka/Sharks 3-4, Catpower 2-3, Lions 2-5 i Sluggers 2-5. Den dianan benidero nos tin mas resultado di Liga 50 ku ta tuma lugá den
Engelen Ballpark. Den Liga Amstel, Bombers a dal Thrillers durísimo 12-1. Bombers a presentá riba un rust ku nan ‘Old Par’ den tas pendiente pa e wega kaba mas lihe posibel. Jovan Wal ku a presentá atrobe despues di mas ku un luna, tabata hermétiko pa ekipo Bombers gana. Jovan Wal a pasa na Vi Jansen Ballpark, piki tur hungadó ku tabata hunga domino i selebrá ku Isla Crackers bai kuné pariba pa un viktoria sigur. Jovan Wal den dos wega presentá tin rekòrt di 2-0, un ERA di 2.80 (Den Slowpitch) i averahe di .500 na plato.
* * * * *
Den otro wega Sugar a dal Terremaster 12-10. Cicoza a dal Terremaster 17-13. Nos no a risibí e resultado di X-Treme kontra Gamers. Liga Amstel ta sigi otro siman djasabra na Van Engelen Ballpark. Kòrda sigi e notisianan den kuadro di COVID-19 pa keda na altura kiko ta bai pasa den tantu Liga van Engelen komo Liga 50 . Bombers ta úniko ekipo invikto den Liga Amstel ku rekòrt di 6 ganá i 0 pèrdí. Basta hungadó di Slowpitch pa mira Beisbòl Dòbel A na Stadion Johnny Vrutaal riba djasabra i djadumingu.
* * * * *
Mester wak e asuntu di solo si na Stadion Johnny Vrutaal i na Tio Daou Ballpark den oranan di atardi despues di 5.30’or pm. E solo ta pone ku e primera base no por mira tirunan ku ta bini for di shortstop i tersera base. Denzel Gregg, yu di Darwin Gregg shortstop di Santa Maria, despues di a tira un tiru haltu pero bon ku a pèrdè den solo, a tira un tremendo tiru one bounce fásil pa primera base Boeldak. Hugadanan di tinu pa hungadónan siña for di dje. Play-off LIga Di Nos Tur ta start djabièrnè awor i parse ku Liga 60 lo sigi djadumingu awor. Nos ta keda te aki.
