Lesadónan di Deporte Kòrsou, bondia. Deporte a kuminsá move. Nos a pasa mira varios moveshon di Beisbòl ku públiko aki aya. Weganan di Torneo Kenley Jansen di Beisbòl Junior i Senior ta bai start na varios parke rònt Kòrsou, entre otro Montab Ballpark, Tio Daou Ballpark i Shon Ki Nicasia Ballpark. Den kurso di dianan benidero nos lo tin resultado di e weganan menshoná. Kampionato di Little League tambe a start fin di siman na varios parke na Kòrsou.
* * * * *
Pa loke ta trata Slowpitch liganan ta pendiente di desishon di Gobièrnu pa plania nan kampionato di 2021. Djasabra tabatin 3 kaso positivo di 294 persona ku a tèst. E sigiente evento planiá ta wega òf iningnan final di wega entre Jandoret Raiders i Quality Stars den Beisbòl Veterano ku ta planiá pa tuma lugá djadumingu 7 di febrüari den Stadion Johnny Vrutaal sin públiko. Naturalmente BEVEKO ta pendiente kiko Gobièrnu lo bisa den e Konferensia di Prensa e siman aki.
* * * * *
Tin indikashon ku Liga 50 lo terminá kampionato 2020 den 2021 aki. Lo terminá promé buelta i bai play-off semi-final dirèkt, esta e tradishonal 1 vs 4 i 2 vs 3 i despues final. E play-off semi-final ta un wega so i ta pendiente di wak si final ta mihó di 3 òf un wega so. E standing promé ku e kampionato 2020 keda suspendé tabata lo sigiente: Ban Serio 5-2, Flamboyan/Tigers 5-3, Jaws 5-3, Marlins 5-3, Pitufos 4-3, Artemisia 3-3, Baranka/Shars 3-5, Lions 3-5, Catpower 2-4 i Sluggers 2-6. Práktikamente ta Catpower i Sluggers so ta eliminá. Ekiponan bon pará pa klasifiká ta Ban Serio, Flamboyan, Jaws i Marlins naturalmente. Tabatin dos wega krusial ku tabata pendiente promé ku a para e kampionato, Marlins vs Flamboyan ku Ban Serio vs Pitufos. Nos ta pendiente pa mas informashon.
* * * * *
Di Liga di Nos Tur ku a keda suspendé nos no a tende mas informashon. Ekipo Lions di 60+ ta pendiente di Gobièrnu pa nan programá Warm-Up di 60+ ku a tuma lugá di 2016 te ku 2019 i na 2020 no tabatin e tradishonal Warm-Up debí na e pandemia di Covid. Jaws 50+ un tempu super kampion di 60+ ku 4 kampionato sigí di 2012 pa 2015. Despues ekipo Amigos a sorprendé Liga 60 ku dos título sigí ku yegada di entro otro Wim Felicia. Den 2020 Wim Felicia a pasa pa ekipo Nos Tambe Por i e ekipo a bira kampion pa di dos aña sigí.
* * * * *
Den dianan benidero nos a sigi kombersá ku Edwin ‘Edichi’ Martina ku ta back on track. Edichi a bisa nos ku dos ekipo di 50+ a aserké, pero nada konkreto. Edichi ta bai dediká na Beisbòl di mucha tambe den 2021. Ta dependé ku e asuntu di Sòftbѽl bai na smak di nos amigu Edichi. Edichi: “Mi ta alkansabel pa asuntu serio i sigur (no praatjes, want die vullen geen gaatjes). Ekiponan serio den 50+ por tuma kontakto ku Edichi na 510-5633, (telefòn i app) mail ta estatic_eddyytxs@hotmail.com. Eddy tabata umpire tambe di The Greatest Umpire.
* * * * *
Nos a bai bèk den tempu kaminda torneonan tabata terminá ku animashon di GIO, ERA ets. Na mart 2003 tabatin un final di Torneo Sahart na Sabana Ballpark kaminda agrupashon musikál ERA a animá. Siegfried Hart (QEPD) tabata un dje motornan tras di ERA e tempu ei i tabata spònser di ekipo Padres Sahart. Gainan di Slowpitch tabata topa den Ole Ole Cafe djabièrnè pa despues bai hunga Sòftbòl un tiki kansá den wikènt. ERA tabata toka den Ole Ole Cafe den kurason di Salinja.
* * * * *
Na febrüari 2003 Cirilo Chirino Ballpark a organisá un Homerun Derby i tabatin un premio pa e hungadó ku dal e bala mas leu na Trai Seru (Cirilo Chirino Ballpark) ku e hungadó Ruben Rivera ku a dal e bala den un Homerun Derby anterior. Segun nos e hungadó Abigail ‘Junny’ Vilchez a dal e bala mas leu ku Rivera. E bala a bai dal den kurá di e tanki den centerfield. E hungadónan ku a partisipá e tempu ei tabata 12, Junny Vilchez (Buena Vista Power), Judsel Baranco (Catpower), Gibi Juliet (Carpatula), Nato Da Costa Gomez (Baranka), Jair Josepha (The Best), Arlison Rodriguez (The Best), Geronimo Daflaar (Swift), Sendley Reina (Warwaru), Angelo Clementina (Warwaru/Baranka). Nos peloteronan profeshonal ku a partisipá ta Yurendell de Caster, Randall Simon i Ivanon Coffie. Nos ta keda te aki pa awe.
