Lesadónan di Deporte Kòrsou bondia i felis siman. Nos tei atrobe ku informashon di Sòftbòl Slowpitch i Beisbòl Veterano. Djaluna tabatin reunión entre BEVEKO i ekiponan Jandoret Raiders i Quality Stars pa pone un fecha pa terminá e wega finalísimo di final di 2020. Despues BEVEKO lo invitá ekiponan pa hasi tramitenan pa organisá kampionato 2021. Ekiponan mester kuminsá relga nan traspaso, retiro di hungadó i mas detaye. Varios kambio di hungadó tin atrobe den Beisbòl Veterano. Aña pa aña Beisbòl Veterano ta bira mas kayente. Kontinuashon di e wega final entre Jandoret Raiders i Quality Stars lo ta djadumingu 7 di febrüari.
* * * * * *
Wikènt pasá nos a wak un vidio kaminda un hungadó di Beisbòl Dòbel A ta reta Beisbòl Veterano. Masha ten niun ekipo di Beisbòl Veterano no ta hunga kontra timnan mas yòng, por ta training si. 13 aña pasá mas o ménos un ekipo di Beisbòl Veterano a reforsá ku algun hungadó i bai Torneo Tio Daou kaminda ekiponan di Beisbòl Dòbel A ta kompetí. E tim di Veterano a klasifiká den promé buelta invikto i a haña un yamada pa baha mas debí ku e tim Veterano ei no tin mag di gana den play-off i bai final. E tim veterano a disidí di legumai kompetí fuerte i pèrdè pa keda sin avansá den Torneo Tio Daou. Esei ta e úniko historia ku nos tin di Beisbòl Veterano enfrentando ekiponan di Dòbel A. Nunka mas un tim veterano no a hunga wega ofishal (òf torneo) kontra di ekiponan di Dòbel A.
* * * * *
Ata nòmber di algún hungadó ku a partisipá den e torneo menshoná. Sor Moesquit, Percy Schoop, Rignald Martina, Momon Martina, Richenel Mauricia, Nelly Jakoba, Victor Caldera, Deron Clara, Lucho de Wind, Earl Virginia, Johnny Martina (QEPD), Winston Kirindongo, ets. En todo kaso e ‘challenge’ ei ta keda den man di esnan ku ta deseá. E hungadónan di Veterano ta train sigur un biaha pa siman, bai tùnel, bai gym, sosegá nan kurpa i presentá fuerte pa kompeti i un ora promé ku wega start. Nos ta sigi Beisbòl Veterano i Beisbòl Dòbel A basta djaserka.
Saludo pa èks hungadónan di Jaws, entre otro Giovanni ‘Vanchi’ Toppenberg. Vanchi a yama nos i bisa ku Jaws a bira kampion 10 biaha di Liga 40. Bèrdat un tempu Jaws tabata dominá Liga 40 fásil i bira kampion añanan tras di otro. Despues mesun hungadónan a sigi den 50+ pone pelíkula, despues den 60+ tambe ku 5 título. Hungadónan manera Vanchi i Riley Toppenberg, Fety i Broertje Curie, Kid Boca Chica i Bencho Imperator. Dinastía ruman. Danki di ta sigi nos kolumna stret konstant.
* * * * *
Na 2005 Jaws a bira kampion di Liga 40 pa último biaha, na 2006 Catpower a bira kampion invikto i na 2007 ekipo Baranka a bira kampion. Na 2005 ainda Baranka tabata Baranka/Dezu i ta nan a topa ku Jaws den final. E hungadónan Tyron de Palm, Gurtey Adriana, Pa Wiri Evers (coach), Sherman Cras, Chaleco Daal , Jo Martina, Vanchi i Riley Toppenberg, Shurman Zimmerman, Pito Postina, Kabayo Wilson, Kid Boca Chica i su ruman Wilbert Mercelina, Floranus, Fransje Lambertina, Win Obispo coach. Di einan Jaws no a bira kampion den Liga 40 nunka mas.
* * * * *
Nos tin e hungadónan ku a bira kampion ku Happy Stars na 2009. Baranka tabata kampion na 2007 i 2008. Wim Felicia i Yuchi Isabella a lanta un tim den purá i bai Liga 40. Hungadónan manera Rigo Thode, Gregory Martijn, Renato Anasagasti, Wim Felicia, Jair Josepha (coach), Yuchi Isabella, Frank Benito, Edison Sambo, Willy van Thijs, Depo ‘Pelikula’ Sint Jakoba, Ludwig Pietersz, Junny Marsden, Jeffrey Martina, Earl Virginia, Tutuchi La Croes, Rubelyn Nicasia, Farley Lourens (no kantante), Sherwin ‘Win di Mami’ Paulina i Cedrix Valies. E tim ei a bira kampion na 2011, 2013 i 2016.
* * * * *
Achi Bernabela ku ta bosero i direktiva di Liga 40, a keda di informá kiko ta bai pasa e aña aki. Direktiva lo bai yama un reunión ku ekiponan mas pronto posibel, pa plania 40+ Sòftbòl pa e aña aki. Kòrda ku vários ekipo ta kompetí den ABC, yamá Classico ABC. Ultimo biaha, na 2019 tabata Baranka ku a gana fásil na Kòrsou, despues ku na 2018 ekiponan di Aruba a bari na Aruba. Nos ta buskando e lista di kampionnan di Liga 40. Despues di 2000 nos tin e ekiponan kampion.
